މަސައްކަތްތެރިންގެ ހައްގުތައް ކަށަވަރު ކޮށްދިނުމަށް ނައިބު ރައީސް އިލްތިމާސް ކުރައްވައިފި
ނައިބު ރައީސް ވިދާޅުވީ ގުޅީފަޅު އަދި ތިލަފުށީގައި މަސައްކަތްކުރާ ފަރާތްތަކަށް ސިއްހީ ފަރުވާދެވޭނެ ގޮތް ފަހިވުމަކީ އުފަލެއް ކަމަށް
ނައިބު ރައީސް ފައިސަލް ނަސީމްތިލަފުށީގައި ގާއިމްކޮށްފައިވާ ކުލިނިކާއި ބޭސްފިހާރައިގެ ހިދުމަތް އިފްތިތާހުކުރުމުގެ ރަސްމިއްޔާތުގައި ވާހަކަފުޅު ދައްކަވަނީ
މަސައްކަތްތެރީންގެ ހައްގުތައް ކަށަވަރުކޮށްދީ މަސައްކަތުގެ މައިދާނުގައި އެއްބާރުލުންދީ އެހީތެރިކަން ދިނުމަށް ނައިބު ރައީސް ފައިސަލް ނަސީމް އިލްތިމާސް ކުރައްވައިފިއެވެ.
އެމަނިކުފާނު މިކަމަށް އިލްތިމާސް ކުރެއްވީ ތިލަފުށީގައި ގާއިމްކޮށްފައިވާ ކުލިނިކާއި ބޭސްފިހާރައިގެ ހިދުމަތް އިފްތިތާހު ކުރުމަށް ތިލަފުށީގައި ހޯމަ ދުވަހު ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ ގުޅީފަޅު އަދި ތިލަފުށީގައި މަސައްކަތްކުރާ ފަރާތްތަކަށް ސިއްހީ ފަރުވާދެވޭނެގޮތަށް ތިލަފުށީގައި ކުލިނިކަކާއި ބޭސްފިހާރައެއްގެ ހިދުމަތް ފެށުމަކީ އެކަން ފާހަގަކޮށް އެކަމާ އުފާފުޅު ކުރައްވާ ކަމެއްކަމުގައެވެ.
ފައިސަލްގެ ވާހަކަފުޅުގައި، މަސައްކަތްތެރީންނާމެދު ވަރަށް ބޮޑަށް ވިސްނަންޖެހޭ ކަމަށާ އަދި މަސައްކަތުގެ މާހައުލުގައި ރައްކާތެރިކަން ޔަގީންކުރެވިފައިވުމަކީ މަސައްކަތްކުރުވާ ހުރިހާ ފަރާތްތަކުން ވެސް އިތުރު ސަމާލުކަމެއްދޭންވީ ކަމެއްކަމުގައި ފާހަގަކުރެއްވިއެވެ. އަދި، މަސައްކަތްކުރުވާ މީހާއެކޭ އެއްފަދައިން މަސަތްކަތްކުރާ މީހާގެވެސް ހައްގުތަކެއް ވާނެކަން ހަނދާންކޮށް އެކަންތައްތަކަށް ސަމާލުވުމަށް ގޮވާލެއްވިއެވެ.
ނައިބު ރައީސްގެ ވާހަކަފުޅުގައި ރައީސުލްޖުމްހޫރިއްޔާ އެންމެ އިސްކަމެއް ދެއްވާ އެއް ދާއިރާއަކީ ރާއްޖޭގެ ސިއްހީ ދާއިރާކަން ފާހަގަކުރައްވައި ސިއްހީ ދާއިރާގެ ކަންކަން އިތުރަށް ތަރައްގީ ކުރުމަށް ވަރަށް ބޮޑު އިސްކަމެއް ދެއްވާކަން ފާހަގަކުރެއްވިއެވެ. އެމަނިކުފާނު ވިދާޅުވީ، ދިރިއުޅޭ ރަށުން ރަނގަޅު ސިއްހީ ފަރުވާ ލިބޭނެ މަގު ތަނަވަސް ކޮށްދިނުމަކީ މި ސަރުކާރުން އަމާޒު ހިފާފައިވާ މުހިންމު ކަމެއް ކަމުގައެވެ.
މީގެއިތުރުން، ރާއްޖޭގެ ތަރައްގީއަށް މަސައްކަތްކުރާ އެންމެހާ ފަރާތްތަކަށް ސަރުކާރުން ދޭންޖެހޭ އެއްބާރުލުމާ އެހީތެރިކަން އަބަދުވެސް ފޯރުކޮށްދޭނެކަމުގެ ޔަގީންކަން ނައިބު ރައީސް ވަނީ ދެއްވާފައެވެ.
