ފިޔާޒްގެ ނަމާއެކު އިންފޮމޭޝަން ކޮމިޝަނަރު މަގާމަށް 4 ނަމެއް
29 ޖުލައި 2019 | ހޯމަ 06:41މި މަގާމަށް މީހަކު އައްޔަންކުރަނީ ،މި ވަގުުތު ހުންނެވި އަބްދުލް އަޒީޒް ޖަމާލް އަބޫބަކުރުގެ މަގާމްގެ މުއްދަތު 22 ވަނަ ދުވަހު ހަމަވެފައިވާތީ
ރާއްޖެޓީވީގެ ކުރީގެ ސީއީއޯ ހުސެއިން ފިޔާޒް މޫސާ
ރާއްޖެޓީވީގެ ކުރީގެ ސީއީއޯ ހުސެއިން ފިޔާޒްގެ ނަމާއެކު އިންފޮމޭޝަން ކޮމިޝަނަރު ކަމުގެ މަގާމަށް ހަތަރު ނަމެއް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު މަޖިލީހަށް ފޮނުވައިފިއެވެ.
ހޯމަ ދުވަހުގެ ރައްޔިތުންގެ މަޖިލިސް ޖަލްސާގައި އެ ހަތަރު ނަން މަޖިލީހުގެ ރައީސް މުހައްމަދު ނަޝީދު ވަނީ އިއުލާން ކުރައްވާފައެވެ. އިއުލާން ކުރެއްވުމަށް ފަހު، އެ ނަންތައް ދިރާސާ ކުރުމަށް މިނިވަން މުއައްސަސާތަކާއި ބެހޭ ކޮމިޓީއަށް ވަނީ ފޮނުވާފައެވެ.
އިންފޮރމޭޝަން ކޮމިޝަނަރު ކަމަށް ބޭފުޅަކު އައްޔަން ކުރަނީ، އެ މަގާމުގައި މި ވަގުތު ހުންނެވި އަބްދުލް އަޒީޒް ޖަމާލް އަބޫބަކުރުގެ މަގާމްގެ މުއްދަތު މި މަހުގެ 22 ވަނަ ދުވަހު ހަމަވާތީއެވެ.
އިންފޮމޭޝަން ކޮމިޝަނަރުގެ މަސްއޫލިއްޔަތުތަކަކީ ދައުލަތުގެ އެކި އިދާރާތަކުން ހާމަކުރަންޖެހޭ މައުލޫމާތު ހާމަކުރުމަށް ބާރު އަޅައި، އެ ކަމަށް ހުރި ހުރަސްތައް ނައްތާލުމެވެ.
