އައިއޯއައިޖީ 2019: ޓީޓީ ސިންގަލްސް ރަން މެޑަލް ހޯދާ ދީމާ ތާރީހުގެ ތެރެއަށް
27 ޖުލައި 2019 | ހޮނިހިރު 13:46ދީމާ ރަން މެޑަލް ހޯދީ ފައިނަލުގައި ރަފާ ހަތަރު ސެޓް އެއް ސެޓުން ބަލިކޮށްގެން
ރަފާ (ކ) އަދި ދީމާ (ވ)
މޮރިޝަސްގައި މިހާރު ކުރިޔަށްދާ އިންޑިއަން އޯޝަން އައިލޭންޑް ގޭމްސްގައި ޓީޓީ އަންހެން ސިންގަލްސް އިވެންޓުން ރާއްޖޭގެ ފާތިމަތު ދީމާ އަލީ ރަން މެޑަލް ހޯދިއިރު، އައިޝަތު ރަފާ ނިޒާމް ރިހި މެޑަލް ހޯދައިފިއެވެ.
ފައިނަލުގައި ރާއްޖޭގެ ދެ ކުޅުންތެރިން ވާދަކޮށްފައިވާއިރު، ދީމާ ރަން މެޑަލް ހޯދީ ރަފާއާ ވާދަކޮށް ހަތަރު ސެޓް އެއް ސެޓުން މެޗު ކާމިޔާބުކޮށްގެންނެވެ.
ހޮނިހިރު ދުވަހު ކުޅުނު މި މެޗުގެ ފުރަތަމަ ސެޓު 6-11 އިން ރަފާ ކާމިޔާބުކުރިއިރު، ޖެހިގެން އައި ހަތަރު ސެޓުވެސް ދީމާ ވަނީ ކާމިޔާބުކޮށްފައެވެ. ދީމާ ސެޓްތައް ގެންދިޔައީ 7-11، 5-11، 7-11 އަދި 4-11 އިންނެވެ.
ގޭމްސްގައި ރާއްޖޭގެ އަންހެން ޓީޓީ ޓީމު ވަނީ ޓީމު އިވެންޓުން ރަން މެޑަލް ހާސިލުކުރުމުގެ އިތުރުން އަންހެން ޑަބަލްސްގެވެސް ރަން މެޑަލް ހޯދާފައެވެ. އަދި އަންހެން ޑަބަލްސް އިވެންޓުންވެސް ރާއްޖެއިން ވަނީ ރިހި މެޑަލް ހޯދާފައެވެ.
އެގޮތުން މިފަހަރުގެ ގޭމްސްގައި ޓީޓީން އެކަނިވެސް ވަނީ ފަސް މެޑަލް ހޯދާފައެވެ. މިފަހަރު ގޭމްސްއަށް ރާއްޖެއިން 15 މެޑަލްއަށް ޓާގެޓްކޮށްފައިވާއިރު، މި މެޑަލްތަކާއެކު އެ ޓާގެޓް ވަނީ ހާސިލުވެފައެވެ.
