ވަކީލުންގެ ތެރެއިން ޖޭއެސްސީއަށް އައްޔަން ކުރަން ނަގާ ވޯޓުގައި 1،487 ވަކީލަކު ވޯޓުލާނެ
ވޯޓުލުން ކުރިއަށް ދާނީ ހޮނިހިރު ދުވަހު ހެނދުނު 9 އިން ހަވީރު 5 އަށް
ޖޭއެސްސީގައި މިހާރު ތިއްބަވާ ބައެއް މެމްބަރުން
ޖުޑީޝަލް ސަރވިސް ކޮމިޝަން(ޖޭއެސްސީ)އަށް ވަކީލުންގެ ތެރެއިން އައްޔަން ކުރަން ނަގާ ވޯޓުގައި 1،487 ވަކީލަކު ވޯޓު ލުމަށް ރެޖިސްޓްރީ ކޮށްފައިވާ ކަމަށް އިލެކްޝަންސް ކޮމިޝަން (އީސީ)އިން ބުނެފިއެވެ.
އީސީއިން ބުނީ ޖޭއެސްސީއަށް ވަކީލަކު އައްޔަން ކުރުމަށް ނަގާ ވޯޓުގައި ތިން ވޯޓު ފޮށި ބަހައްޓާނެ ކަމަށެވެ. އެއީ މާލޭގައި ދެ ފޮށި އަދި އައްޑޫ ސިޓީގައި އެއް ވޯޓު ފޮއްޓެވެ.
މާލޭގައި ބަހައްޓާ ފުރަތަމަ ވޯޓު ފޮއްޓަށް 790 ވަކީލަކު، ދެވަނަ ފޮއްޓަށް 688 ވަކީލަކު އަދި އައްޑޫ ސިޓީ ހިތަދޫގައި ބަހައްޓާ ވޯޓު ފޮއްޓަށް 9 ވަކީލަކު ވޯޓު ލާނެއެވެ.
ވޯޓުލުން ކުރިއަށް ދާނީ ހޮނިހިރު ދުވަހު ހެނދުނު 9 އިން ހަވީރު 5 އަށެވެ.
ވަކީލުންގެ ތެރެއިން ޖޭއެސްސީއަށް އައްޔަން ކުރަން ނަގާ ވޯޓުގައި މަގާމަށް ކުރިމަތިލެއްވީ އަލީ ރަޝީދާއި އަބްދުލްމާނިއު ހުސައިނާއި އަހުމަދު ރަޝީދު ހުސައިނާއި އަބްދުލްއަޒީޒް ޖަމާލް އަބޫބަކުރާއި ހަނީފާ ޚާލިދުގެ އިތުރުން އަބްދުލްހަންނާނު އަހުމަދެވެ.
ޖޭއެސްސީގައި ތިއްބަވަނީ ވަކީލުންގެ ތެރެއިން މެމްބަރަކާއި އާންމުންގެ މެމްބަރަކާއި ރައްޔިތުންގެ މަޖިލީހުގެ މެމްބަރަކާއި މަޖިލީހުގެ ރައީސާއި ރައީސްގެ މެމްބަރަކާއި ބަންޑާރަ ނައިބުގެ އިތުރުން ސިވިލް ސާވިސް ކޮމިޝަންގެ ރައީސާއި ސުޕްރީމް ކޯޓުގެ ފަނޑިޔާރަކާއި ހައި ކޯޓުގެ ފަނޑިޔާރެއްގެ އިތުރުން ދަށު ކޯޓެއްގެ ފަނޑިޔާރެކެވެ.
ޖޭއެސްސީގައި ތިއްބަވާނީ މަޖިލީހުގެ ރައީސާއި، މަޖިލީހުން ކަނޑައަޅާ މެންބަރަކާއި، ސުޕްރީމް ކޯޓުގެ ފަނޑިޔާރުންގެ ތެރެއިން ބޭފުޅަކާއި، ބަންޑާރަ ނައިބާއި ދަށު ކޯޓުތަކުން ފަނޑިޔާރަކާއި، ހައި ކޯޓުގެ ފަނޑިޔާރަކާއި، ރައީސުލް ޖުމްހޫރިއްޔާ ކަނޑައަޅުއްވާ މެންބަރަކާއި ސިވިލް ސާވިސް ކޮމިޝަންގެ ރައީސް އާއި، އާންމުންގެ ތެރެއިން މެންބަރެއްގެ ގޮތުގައި މަޖިލީހުން ކަނޑައަޅުއްވާ ބޭފުޅަކާއި، ގާނޫނީ ވަކީލުންގެ ތެރެއިން އިންތިޚާބުކުރާ ވަކީލެކެވެ.
ޖޭއެސްސީގައި ވަކީލުންގެ ތެރެއިން އައްޔަން ކުރައްވާ ވަކީލަކަށް ކުރިން އިންނެވީ ލަތީފާ ގާސިމެވެ. ނަމަވެސް ގާނޫނީ ފަންނުގެ ބިލް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތަސްދީގު ކުރެއްވުމާ ގުޅިގެން އޭނާގެ މަގާމު ވަނީ މިދިޔަ ޖޫން މަހުގެ 27 ވަނަ ދުވަހު ގެއްލިފައެވެ. ބާކައުންސިލް އުފެދުމާއި ގުޅިގެން ގާނޫނީ ވަކީލުންނަށް ވަކީލުކަމުގެ ހުއްދަ ދިނުމާއި ވަކީލުންނާ ގުޅުން ހުރި ހުރިހާ ކަމެއް ނިންމާނީ އެ ކައުންސިލުން ކަމަށް ގާނޫނީ ފަންނުގެ ގާނޫނުގައި ބުނެފައިވެއެވެ.
