އައިއޯއައިޖީ 2019: ކުޅުނު ހުރިހާ މެޗަކުން ބަލިވެ ފުޓުބޯޅަ ޓީމު ކަޓައިފި

މިހާރު ކުރިޔަށްދާ އިންޑިއަން އޯޝަން އައިލޭންޑް ގޭމްސްގައި ކުޅުނު ހުރިހާ މެޗަކުން ބަލިވެ، ފުޓުބޯޅަ ޓީމު ކަޓައިފިއެވެ.

ހޯމަ ދުވަހު ގްރޫޕް ސްޓޭޖުގައި ކުޅުނު ފަހު މެޗުގައި ރާއްޖެ ބަލިވީ މަޔޯޓޭއާ ވާދަކޮށް 1-3 ގެ ނަތީޖާއަކުންނެވެ.

މޮރިޝަސްގައި ކުޅުނު މި މެޗު ފެށިގެން ދެޓީމުގެ ފަރާތުން ވެސް ފެނިގެންދިޔައީ ދާދި ހަމަހަމަ ކުޅުމެކެވެ. ލަނޑު ޖަހަން ދެޓީމަށް ވެސް ވަނީ މިހާފުގައި ގިނަ ފުރުސަތުތައް ލިބި ބޭކާރުވެފައެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ މަޔޯޓޭއިންނެވެ. މި ލަނޑު 15 ވަނަ މިނެޓުގައި އެޓީމުން ކާމިޔާބުކުރިއިރު، ލަނޑަށްފަހު އެޓީމުން ވަނީ އެޓޭކްތައް ވަރުގަދަ ކޮށްފައެވެ.

ނަމަވެސް މަޔޯޓޭއިން ރަނގަޅަށް ކުޅެމުންދަނިކޮށް، 22 ވަނަ މިނެޓުގައި ރާއްޖެއިން ވަނީ ނަތީޖާ ހަމަހަމަ ކޮށްފައެވެ. މި ލަނޑު ރާއްޖެއަށް ކާމިޔާބު ކޮށްދިނީ މުހައްމަދު ނާއިމްއެވެ.

މަޔޯޓޭއިން ވަނީ މި ލަނޑާއެކު އެޓީމުގެ ކުޅުން އިތުރަށް ވަރުގަދަ ކޮށްފައެވެ. އެގޮތުން ފުރަތަމަ ހާފް ނިމުމުގެ ކުރިން އެޓީމުން ވަނީ މެޗުގެ ލީޑު އަނބުރާ ހޯދާފައެވެ.

ދެވަނަ ހާފް ފެށިގެން ވެސް މަޔޯޓޭގެ ފަރާތުން މޮޅު ކުޅުމެއް ފެނިގެންދިޔައިރު، 55 ވަނަ މިނެޓުގައި އެޓީމުން ވަނީ ތިންވަނަ ލަނޑު ކާމިޔާބު ކޮށްފައެވެ. މި ލަނޑަށްފަހު ވެސް އެޓީމުން ވަނީ ފުލުފުލުގައި ހަމަލާތައް އުފައްދާފައެވެ.

މި ހާފްގައި ރާއްޖޭގެ ފަރާތުން ހަމަލާތަކެއް ފެނުނު ނަމަވެސް، ލަނޑު ޖެހުމަށް މާ އެދެވޭ ފުރުސަތުތަކެއް ލިބިފައެއް ނުވެއެވެ.

މެޗުގެ ފަހު 10 މިނެޓު ތެރޭގައި ކޮމޯރަސްއަށް ލަނޑު ޖެހުމަށް ގިނަ ފުރުސަތުތަކެއް ލިބުނެވެ. ނަމަވެސް އެ ފުރުސަތުތަކުގެ ބޭނުން އެޓީމަށް އެންމެ އެދެވޭ ގޮތެއްގައި ހިފިފައެއް ނުވެއެވެ.

މި ނަތީޖާއާއެކު ރާއްޖެ ހިމެނޭ ގްރޫޕުން ސެމީއަށް ދަތުރު ކޮށްފައިވަނީ އެއް ވަނަ ޓީމު ގޮތުގައި ހަތް ޕޮއިންޓާއެކު ރީޔޫނިއަންއެވެ. ދެވަނަ ޓީމު ގޮތުގައި ހަ ޕޮއިންޓާއެކު ސެމީއަށް ދަތުރުކުރީ މަޔޯޓޭއެވެ. ކޮމޯރަސްއަށް ތިން ޕޮއިންޓާއެކު ގްރޫޕްގެ ތިންވަނަ ލިބުނުއިރު، ރާއްޖެއަށް އެންމެ ޕޮއިންޓެއް ވެސް ނުލިބި އޮތީ ފުލުގައެވެ.

މުބާރާތުގައި ރާއްޖެ ކޮޅަށް 10 ލަނޑު ވަދެފައިވާއިރު، ރާއްޖެއަށް ކާމިޔާބު ކުރެވުނީ އެންމެ ލަނޑެކެވެ.