ބާއިމާރާތްތައް ތަޅާލަން ޖެހިއްޖެ ހާލަތެއްގައި އެކަން ކުރާނަން: މިނިސްޓަރު އަސްލަމް
21 ޖުލައި 2019 | އާދީއްތަ 12:22ހުރިހާ އިމާރާތްތައް ސަރުކާރުގެ ހަރަދުގައި ތަޅާކަށް ނުޖެހޭނެ
ޕްލޭނިން މިނިސްޓަރު މުހައްމަދު އަސްލަމް
ބާއިމާރާތްތަކުގެ މައްސަލަތަކުގެ ވަރަށް ގިނަ ރިޕޯޓު ލިބެމުންދާ ކަމަށާއި، ސަރުކާރުން ހަރަދުކޮށްގެން ނަމަވެސް ތަޅާލަންޖެހޭ ތަނެއް ވެއްޖެނަމަ ތެޅުމުގެ މަސައްކަތް ވެސް ކުރާނެ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ޕްލޭނިން މިނިސްޓްރީގެ މަސައްކަތްތަކާއި ބެހޭ ގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަސްލަމް ވިދާޅުވީ ބާއިމާރާތްތަކާ ބެހޭ ގޮތުން އަންނަ ޝަކުވާތައް ވަރަށް ގިނައިން ލިބޭ ކަމަށާއި، ސިޓީ ކައުންސިލްއާ ގުޅިގެން މަސައްކަތް ކުރިއަށްދާ ކަމަށެވެ. އަދި މަޝްވަރާއަށްފަހު ތަޅާލަން ޖެހޭ އިމާރާތެއް ނަމަ ސަރުކާރުގެ ހަރަދުގައި ވެސް އެކަމެއް ކުރާނެ ކަމަށް މިނިސްޓަރު ވިދާޅުވިއެވެ.
މާލޭގައި ވަރަށްގިނަ ބާއިމާރާތްތައް ހުރިކަން ފާހަގަކުރައްވައި މިނިސްޓަރު އަސްލަމް ވިދާޅުވީ މާލޭގެ އިމާރާތްތަކުގެ އިންޖިނިއަރިން މަސައްކަތްތައް ކޮށްފައިއޮތީ އެންމެ ރަނގަޅަށް ނޫން ކަމަށެވެ. ބައެއް އިމާރާތްތައް ސަރުކާރުގެ ހަރަދުގައި ތަޅާލުމުގެ މަސައްކަތް ކުރި ނަމަވެސް ހުރިހާ އިމަރާތްތަކަކީ ސަރުކާރުގެ ހަރަދުގައި ކުރަންޖެހޭ މަސައްކަތްތަކެއް ނޫން ކަމަށެވެ. މިނިސްޓަރު ވިދާޅުވީ އިމާރާތްތަކުގެ ވެރިފަރާތުން ވެސް އެތަންތަނަކީ އިންސާނުން ދިރިއުޅެން އެކަށީގެން ނުވާ ތަނެއް ކަމަށްވާނަމަ ވެރިފަރާތުން މީހުން ހުސްކޮށް އެޒިންމާ ނަގަން ޖެހޭ ކަމަށެވެ.
މީގެ އިތުރުން މިނިސްޓަރު އަސްލަމް ވިދާޅުވީ މިހާރަށް ވުރެވެސް ބޮޑަށް މިމައްސަލަތަކަށް އިސްކަންދީގެން ބަލަންޖެހޭ ކަމަށް ގަބޫލުކުރަންޖެހޭ ކަމަށެވެ.
ކޮންސްޓަރަކްޝަން ސައިޓްތަކުގެ އިމާރާތްކުރުމުގެ އަމަލީ މަސައްކަތް ކުރުމުގައި ގެންގުޅެންޖެހޭ ސަލާމަތީ މިންގަނޑުތައް ބެލުމަށް 252 ސައިޓަކަށް ޒިޔާރަތްކޮށް ބަލާފައިވާ ކަމަށް މިނިސްޓްރީން މައުލޫމާތުދެއެވެ.
