ކޮރަޕްޝަންގެ އެއްވެސް އަމަލެއް ހިންގާފައި ނުވާނެ، މަސައްކަތް ކުރެއްވީ ރައްޔިތުންނަށް ފައިދާވާނެގޮތަށް ސަރުކާރުގެ ސިޔާސަތުތައް ތަންފީޒުކުރުމަށް - ސައީދު
މަސައްކަތް ކުރައްވާފައިވާނީ ޒަމާނުއްސުރެ ރައްޔިތުންނަށް ބޮޑު ތަކުލީފަކަށް ވެފައިވާ އަސާސީ ހިދުމަތްތައް ރައްޔިތުން ހިތްހަމަ ޖެހޭ މިންވަރަށް ހަރުދަނާ ކަންމަތީ ގާއިމްކޮށްދިނުމަށް
ކުރީގެ ރައީސް އިބްރާހިމް މުހައްމަދު ސާލިހާއި، ފެނަކަ އެމްޑީ އަހްމަދު ސައީދު މުހައްމަދު
ކޮރަޕްޝަންގެ އެއްވެސް އަމަލެއް ހިންގާފައި ނުވާނެ، މަސައްކަތް ކުރެއްވީ ރައްޔިތުންނަށް ފައިދާވާނެގޮތަށް ސަރުކާރުގެ ސިޔާސަތުތައް ތަންފީޒުކުރުމުގައި ކަމަށް ފެނަކަ ކޯރަޕޭޝަންގެ ކުރީގެ މެނޭޖިންގ ޑިރެކްޓަރު އަހުމަދު ސައީދު މުހައްމަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ އެސްއޯއީ ކޮމިޓީއަށް އޭސީސީގެ ރައީސް އާދަމް ޝާމިލް ވިދާޅުވީ އާދަޔާ ހިލާފަށް ގިނަ މައްސަލަތަކެއް ހުށަހަޅާފައިވާތީ ޚާއްސަ ސަމާލުކަމެއްދީގެން މިދިޔަ އަހަރު މައްސަލަތައް ބަލަން ފަށާފައިވާނެކަމަށެވެ. އެގޮތުން މިހާރުވެސް ފެނަކައިގެ ވެރިންނަށް ތުހުމަތުކުރެވޭ 6 މައްސަލައެއް އޭސީސީން ބަލަމުން އަންނަކަމަށް ޝާމިލު ވިދާޅުވިއެވެ.
މީގެ އިތުރުން ފެނަކަ ކުރީގެ އެމްޑީގެ މައްޗަށް ތުހުމަތުކުރާ މައްސަލަތާއި ގުޅިގެން ރާއްޖެއެމްވީއަށް މައުލޫމާތުދެއްވަމުން ސައީދު ވިދާޅުވީ ކޮރަޕްޝަންގެ އެއްވެސް އަމަލެއް ހިންގައިފައި ނުވާނެކަމަށެވެ. އަދި އެފަދަކަމަށް މަގުފަހިވާ ފަދަ ކަމެއް ވެސް ކުރައްވާފައި ނުވާނެކަމަށެވެ. ސައީދު ވިދާޅުވީ މަސައްކަތް ކުރައްވާފައިވާނީ ޒަމާނުއްސުރެ ރައްޔިތުންނަށް ބޮޑު ތަކުލީފަކަށް ވެފައިވާ އަސާސީ ހިދުމަތްތައް ރައްޔިތުން ހިތްހަމަ ޖެހޭ މިންވަރަށް ހަރުދަނާ ކަންމަތީ ގާއިމްކޮށްދިނުމާއި، ސަރުކާރުގެ ސިޔާސަތުތައް ރައްޔިތުން ބޭނުންވާ ގޮތަށް އަދި ރައްޔިތު މީހާއަށް ހެވާ ލާބައާއި މަންފާ ކުރާ ގޮތަށް ކަމަށެވެ.
ސައީދު ވިދާޅުވީ އެކަންކަން ތަންފީޒުކުރުމާއެކު މުވައްޒަފުންނަށް ރަނގަޅު މަސައްކަތު މާހައުލެއް ގާއިމްކުރުމަށްވެސް މަސައްކަތް ކުރައްވާފައިވާނެ ކަމަށެވެ. ސައީދު ވަނީ ތަހުގީގީ އިދާރަކަށް ދޭންޖެހޭ ފުރިހަމަ އެއްބާރުލުން ދެއްވާނެކަމަށް ވިދާޅުވެފައެވެ.
މި ސަރުކާރު ވެރިކަމަށް އައި ފަހުން ވެފައިވާ ވައުދުތައް ނުފުއްދި ރައްޔިތުންނާއި ހަމައަށް ކަންކަން ނުގެނެވޭތީ އެކަންކަން ފޮރުވުމަށް ކުރީ ސަރުކާރު ބަހަނާއަކަށް ދައްކާ ވާހަކަތައް އޮޅުވާލުމަށް އަންނަނީ މަސައްކަތް ކުރަމުންނެވެ. އަދި ކުރީ ސަރުކާރުގެ އިސްފަރާތްތަކުގެ މައްޗަށް ސާބިތު ނުވާކަންކަމުގެ ކޮރަޕްޝަންގެ ވާހަކަތައް ދައްކަ މި ސަރުކާރުން ކުރާ ނުރަނގަޅު ކަންކަން ފޫބައްދަން އަންނަނީ މަސައްކަތް ކުރަމުންނެވެ.
ފެނަކައިގެ ކުރީގެ ވެރިންގެ ކޮރަޕްޝަންގެ މައްސަލަތެއް އެބަހުރިކަމަަށް ބުނަމުންދާއިރު، އެ މައްސަލަތަކުގެ މައުލޫމާތުތައް ހޯދަން އެދިގެން މިހާތަނަށްވެސް އެ މައުލޫމާތެއް ފޯރުކޮށްދެވިފައިނުވެއެވެ. އެޕްރީލް މަހު ހުށަހެޅި ކަންކަން އަދިވެސް ނުލިބޭކަމަށް ވެސް އޭސީސީން ބުނެއެވެ. އެހެންކަމުން އޭސީސީން އެ މައުލޫމާތު ނުދީ ލަސްވުމަކީ އެފަދަ ކަންކަން ނެތި އެކަންކަން އުފައްދަންވެގެން ކުރާ މަސައްކަތެއް ކަމަށް ބައެއް ފަރާތްތަކުން އަންނަނީ ބުނަމުންނެވެ.
