އަތޮޅު ތެރޭގައި ބިދޭސީންގެ ޑޯމިޓަރީ ހަދަން އެހެން ކުންފުނިތަކަށް ހުޅުވާލުމަކީވެސް އޮތް ފުރުސަތެއް: އިޙްސާން

މާލެ އޭރިއާ ނޫން އެހެން ސަރަޙައްދުތަކުގައި ބިދޭސީންގެ ޑޯމިޓަރީ ހަދަން އެހެން ކުންފުނިތަކަށް ހުޅުވާލުމަކީވެސް އޮތް ފުރުސަތެއްކަމަށް ދާޚިލީ ވަޒީރު އަލީ އިޙްސާން ވިދާޅުވެއްޖެއެވެ.

އިޙްސާން އެހެން ވިދާޅުވީ ބިދޭސީ މަސައްކަތްތެރިން ބައިތިއްބާ އެކޮމޮޑޭޝަންގެ ޚިދުމަތް ހަމައެކަނި މެލޭޝިއާ ކުންފުންޏަކަށް ކުރެވޭ ގޮތަށް ހަދާ އެ ކުންފުންޏަށް މަހަކު 12 މިލިއަން ޑޮލަރު ލިބޭ ވިޔަފާރި އަކަށް ބިޑް ކުރުމަކާ ނުލާ ސަރުކާރުން ފުރުސަތު ދޭން މަސައްކަތް ކުރަމުންދާކަމަށް އަޑު ފެތުރިފައިވާތީ އެކަމާ ގުޅޭގޮތުން ވާހަކަ ދައްކަވަމުންނެވެ.

ބުދަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ، މެލޭޝިއާއިން އަންސޮލިސިޓަޑް ޕްރޮޕޯސަލްއެއް ފޮނުވުމުން އޮންނަ އުސޫލުގެ ތެރެއިން ހަދަންޖެހޭ ޑިއު ޑިިލިޖެންސް ހެދުމަށްފަހު އިކޮނޮމިކް ކައުންސިލަށް ފޮނުވި ކަމަށެވެ.

އެހިސާބުން އިކޮނޮމިކް ކައުންސިލުން ބަލަންޖެހޭ ކަންކަން ބެލުމަށްފަހު، އެމީހުންގެ ޕްރޮޕޯސަލްއަށް ޝައުޤު ހުރިކަން ބަޔާންކޮށް، އެވޯޑް ލެޓަރ އެއް ފޮނުވާފައިވާ ކަމަށާއި، ބޭރުގެ ނޫސްތަކުގައި ރިޕޯޓު ކޮށްފައިވަނީ އެ ސިޓީގެ ވާހަކަ ކަމަށް އިޙްސާން ވިދާޅުވިއެވެ.

އެހެންނަމަވެސް އެއީ ރާއްޖެއިން އެ މަޝްރޫއުގައި ޤާނޫނީ ގޮތުން ބަނދެވޭ ފަދަ ސިޓީއެއް ނޫން ކަަމަށާއި، އެ މަޝްރޫއާ ގުޅޭ ކަންކަމުގައި ދެފަރާތުން އެއްބަސްވެ ސޮއި ކުރަން ޖެހޭނެކަމަށް އިޙްސާން ވިދާޅުވިއެވެ.

އަދި އެގްރީމަންޓަކާ ހިސާބަށް ދިއުމާމެދު އަދި މިހާތަނަށް ވަކި ގޮތެއް ނިމިފައި ނުވާކަމަށްވެސް އިޙްސާން ވިދާޅުވިއެވެ.

އިޙްސާން ވިދާޅުވީ، މިއީ އެ ކުންފުނިން ކުރާ ވަރަށް ބޮޑު އިންވެސްޓްމަންޓެއް ކަމަށާއި، ފުރަތަމަ މަރުޙަލާގެ ސެޓަޕްތައް ޤާއިމު ކުރުމަށްވެސް 4 އަހަރެއްހާ ދުވަސް ނަގާނެ ކަމަށެވެ. އެ ކުންފުނިން މި މަޝްރޫއުގެ އެކްސްކްލޫސިވީޓީ ބޭނުންވާ ސަބަބެއްގެ ގޮތުގައި ފާހަގަކުރަނީވެސް އެ ސަބަބުކަމަށް އިޙްސާން ވިދާޅުވިއެވެ.

މިފަދަ މަޝްރޫއެއް އާންމުކޮށް ހުޅުވާނުލެއްވި ސަބަބާ ގުޅޭގޮތުން ސުވާލު ކުރުމުން އިޙްސާން ވިދާޅުވީ، މިއީ ބީލަމަށް ހުޅުވާލި މަޝްރޫއެއް ނޫން ކަމަށާއި، މި މަޝްރޫއަށް ފުރަތަމަ ޝައުޤުވެރިކަން ފާޅުކުރީ ބޭރުގެ ކުންފުނިން އަމިއްލައަށް ކަމަށެވެ.

އެހެންނަމަވެސް، މި ހިނގާ މަރުޙަލާގެ ތެރެއިން އެކްސްކްލޫސިވިޓީއާމެދު ގޮތެއް ނުނިމިއްޖެނަަމަ، ހުޅުވާލުމަކީވެސް އޮތް ފުރުސަތެއްކަން އިޙްސާން ފާހަގަ ކުރެއްވިއެވެ.   

މިނިސްޓަރ އިހްސާން ވިދާޅުވީ މެލޭޝިއާގެ ކުންފުނިން ހުށަހަޅާފައިވަނީ އެ ކުންފުނީގެ އެކަމަޑޭޝަން ގައި ތިބޭ ކޮންމެ ބިދޭސީ އަކަށް ބޮލަކަށް 120 ޑޮލަރު ކޮންމެ މަހަކު ޗާޖް ކުރާ ގޮތަށެވެ. އަދި މާލޭގެ ސަރަހައްދުގައި 100،000 އެއްހާ ބޭރުގެ މަސައްކަތްތެރިން އުޅޭ ކަމަށްވެސް މިނިސްޓަރ ވިދާޅުވިއެވެ.