ރައީސް އިބްރާހިމް މުހައްމަދު ސޯލިހް ގެ ސަރުކާރުން ދޫކޮށްފައިވާ 4000 ފްލެޓްގެ ގެ ހައްގުވެރިން ކަނޑައެޅުމުގައި، އެންޓި ކަރަޕްޝަން ކޮމިޝަން (އޭސީސީ) އިން ހައުސިންގ މިނިސްޓްރީ އަށް ދީފައިވާ ލަފަޔާ އެއް ގޮތައް ފްލެޓް ލިބޭ މީހުން ކަނޑައެޅުމުގެ ކަންތައް ކުރިއަށް ގެންދިއުމަށް ސިޓީ ކައުންސިލް އިން ފާސް ކޮށްފިއެވެ.

ބުދަ ދުވަހު ބޭއްވުނު މާލެ ސިޓީ ކައުންސިލްގެ 4 ވަނަ ދައުރުގެ 154 ވަނަ ރަސްމީ އާއްމު ޖަލްސާގައި ރައީސް ސޯލިހް ގެ ސަރުކާރުން 4000 ފްލެޓް ދޫކޮށްފައި އޮތް ގޮތާ ގުޅޭ ގޮތުން ހުރި މައްސަލަތައް ދެނެގަނެ އެއަށް ގޮތެއް ނިންމުމަށްޓަކައި ސަރުކާރުން އުފެއްދި ފްލެޓް ކޮމިޓީއަށް ލަފާ ދިނުމަށްޓަކައި މާލޭ ސިޓީ ކައުންސިލް ގައި އުފެއްދި ކޮމިޓީގެ ރިޕޯޓް ބައްދަލުވުމަށް ހުށަހަޅުއްވަމުން ލަފާދޭ ކޮމިޓީގެ ރިޔާސަތު ބެލެހެއްޓެވި ޑެޕިއުޓީ މޭޔަރ އަހްމަދު ނަރީޝް ވިދާޅުވީ، ކޮމިޓީން ގޮތެއް ނިންމުމުގައި ބަލާފައިވާނީ އޭސީސީން ކޮށްފައިވާ ތަހުގީގީ ރިޕޯޓްގައި ފާހަގަ ކޮށްފައިވާ ކަންތައްތަކަށާއި، ގެދޮރުވެރިކަމުގެ މައްސަލައިގައި ބައްދަލު ކުރަން އައި އެކި ފަރާތްތަކުން ހުށަހަޅާފައިވާ ޝަކުވާ ތަކުގެ މައްޗަށް ކަމަށެވެ.

ކޮމިޓީގެ ރިޕޯޓު ފާސްކުރި އިރު މިހާރު ފްލެޓް ލިބޭ މީހުންގެ ލިސްޓުގައި ހިމެނޭ މީހުންގެ ތެރެއިން އެއްވެސް މައްސަލަ އެއް ނެތް ކަމަށް ފާހަގަ ކުރެވޭ ފަރާތްތަކަށް ފްލެޓް ދިނުން އަވަސް ކުރުމަށާއި، އަދި އެއްވެސް ފަރާތެއް ލިސްޓުން އުނި ކުރާނަމަ، އެ ފަރާތެއް އުނިވި ސަބަބު ސާފުކޮށް ބުނެދޭން ޖެހޭ ގޮތައް ރެކޮމެންޑޭޝަންގައި ހިމެނުމަށްވެސް ކައުންސިލްގެ ބައްދަލުވުމުގައި ވަނީ ފާސް ކޮށްފައެވެ.

ކުރީގެ ސަރުކާރުން ދޫކުރި ގޯއްޗާއި ފްލެޓްތަކާ ގުޅޭ ގޮތުން ހައުސިން މިނިސްޓްރީއަށް ލަފާ ދިނުމަށް އުފެއްދި ކޮމިޓީއަށް މާލެ ސިޓީ ކައުންސިލަރުން ހިމެނޭ އިތުރު ލަފާދޭ ކޮމިޓީއެއް އުފެއްދީ ޖޫން މަހުގެ މެދުތެރޭގައެވެ.

ހައުސިން މިނިސްޓްރީން ބުނެފައިވަނީ މާލޭ ސިޓީ ކައުންސިލުގެ ލަފާދޭ ކޮމިޓީއެއް އުފެއްދީ "ހައުސިން ކޮމިޓީ"ގެ މުހިއްމު ނިންމުންތައް ނިންމުމުގައި ސިޓީ ކައުންސިލްގެ ބައިވެރިވުން ހިމަނަން ބޭނުންވާތީ ކަމަށެވެ.

ރައީސް އިބްރާހިމް މުހައްމަދު ސޯލިހްގެ ސަރުކާރުގެ އެންމެ ފަހު ދުވަސް ކޮޅުގެ ތެރޭގައި، ސަރުކާރުން ފްލެޓަށް ޕޮއިންޓު ދިނުމުގައި ގޯސްތަކެއް ހަދާފައިވާ ކަމުގެ ތުހުމަތު ކޮށް ފްލެޓު ހަވާލުކުރުން ހުއްޓުވައި އޭސީސީ އިން ތަހުގީގެއް ވަނީ ކުރިއަށް ގެންގޮސްފައެވެ.

އޭސީސީން ހިންގި ތަހުގީގަށް ފަހު ބުނެފައި ވަނީ 4،000 ފްލެޓް ލިބުނު މީހުންގެ ތެރެއިން 60 އިން ސައްތަ މީހުންނަކީ ޝަރުތު ހަމަނުވާ މީހުން ކަމަށެވެ. ބާކީ ފޯމުތަކުގެ ތެރެއިން އެއްވެސް މައްސަލައެއް ނެތް ކަމަށް އޭސީސީން ބުނެފައިވަނީ އެންމެ 20.7 އިންސައްތަ ފޯމުގައި ކަމަށެވެ. އަދި އަނެއް 19.7 އިން ސައްތަ އަކީ ޝަރުތު ހަމަވި ނަމަވެސް މައުލޫމާތުގެ ފުށުއެރުންތަކެއް ހުރި ފޯމުތައް ކަމަށް ބުނެފައިވެއެވެ.

އޭސީސީން ހާމަ ކުރި ކެޓަގަރީ ތަކަށް ފެތެނީ އެ ލިސްޓުން ކޮންކޮން ފަރާތްތަކެއް ކަމެއް މިހާތަނަށް ހާމަ ކޮށްފައެއް ނުވެއެވެ.

ފްލެޓް ހަވާލު ކުރުން ލަސްވުމާއެކު އެތައް ބައެއްގެ ކަންބޮޑުވުން އެކަމުގައި އުފުލަމުން ދަނިކޮށް، އަދި ރިޔާސީ އިންތިޚާބުގެ ކެމްޕޭންގައި، ކުރީ ސަރުކާރުން ފްލެޓް އާއި ގޯތީގެ ރަސްމީ ލިޔުން ދީފައިވާ ހުރިހާ ފަރާތަކަށްވެސް އެމަނިކުފާނު ވެރިކަމަށް ވަޑައިގަތަސް އެ ލިޔުމާ އެއްގޮތައް އަމަލު ކުރާނެ ކަމަށް ވިދާޅުވި ނަމަވެސް، ރައީސް ޑރ. މުހައްމަދު މުއިއްޒު ވަނީ ފްލެޓްތަކަށް ކުރިމަތިލީ މީހުންގެ ލިސްޓް މިނިވަން ކޮމިޓީއެއް މެދުވެރިކޮށް ރިވިއު ކުރާ ގޮތައް ހަމަ ޖައްސަވާ "ފްލެޓް ކޮމިޓީ" އުފައްދަވާފައެވެ.

މިދިޔަ މާޗު މަހުގެ ކުރީ ކޮޅު، ދެ ހަފްތާއެއްގެ ތެރޭގައި ފްލެޓް ހަވާލުކޮށް ނިމޭނެ ކަމަށް ރައީސް ޑރ. މުއިއްޒު ވިދާޅުވި ނަމަވެސް މިހާތަނަށް އައި އިރު އަދިވެސް މިކަމުގައި ޝަކުވާ ކުރާ ފަރާތްތަކަށް ސާފު ޖަވާބެއް ލިބޭ ގޮތް ވަނީ ނުވެފައެވެ. ފްލެޓް ދޫކުރުން ލަސްވާ މައްސަލައިގައި ހައުސިންގ މިނިސްޓްރީގައި އާންމުން ޝަކުވާ ކުރުމުން މި ފަހަކަށް އައިސް ބުނަމުން އައިސްފައިވަނީ ސިޓީ ކައުންސިލްގެ ލަފާދޭ ކޮމިޓީ އިން ވަކި އެއްޗެއް ނާންގައިގެން ގޮތެއް ނުނިންމި ދިގުލަނީ ކަމުގައެވެ.

ކުރީގެ ސަރުކާރުން އިއުލާންކުރި ގެދޮރުވެރިޔާ ސްކީމްގެ ދާއިމީ ލިސްޓުގައި ފްލެޓަށް ޝަރުތު ހަމަވާ 13،000 މީހުން ތިބި އިރު އޭގެ ތެރެއިން 4،000 ފްލެޓް ލިބޭ މީހުން ވަނީ ކަނޑައަޅާފައެވެ. ކުރީ ސަރުކާރުން ހަމަ ޖައްސާފައި އޮތީ 76 ޕޮއިންޓަށް ވުރެ މަތިން ލިބޭ މީހުންނަށް ތިން ކޮޓަރީގެ ފްލެޓް ދިނުމަށެވެ. އަދި 73 ޕޮއިންޓަށް ވުރެ މަތިން ލިބުނު މީހުންނަށް 2 ކޮޓަރީގެ ފްލެޓް ދިނުމަށެވެ.