ކޯޓުތަކުގެ އިދާރީ މައްސަލަތަކާއި ފަނޑިޔާރުންނަކަށް ނުބެހެވޭނެ: ހަސަން އަފީފް
21 ޖުލައި 2019 | އާދީއްތަ 04:27ޑީޖޭއޭ އަކީ ސްޕްރީމް ކޯޓުގެ ދަށަށް އަންނަން ޖެހޭ ތަނެއް ނޫން ކަމަށް ވިދާޅުވި
ވިލުފުށީ ދާއިރާގެ މެންބަރު ހަސަން އަފީފް
ކޯޓު ތަކަކީ ޝަރިޢަތް ހިންގާ ފަރާތް ކަމަށާއި ފަނޑިޔާރުންގެ ވަގުތު ޚާއްސަ ކުރަން ޖެހޭނީ ޝަރިއަތްތަކަށް ކަމަށް ރައްޔިތުންގެ މަޖިލީހުގެ ވިލުފުށީ ދާއިރާގެ މެންބަރު ހަސަން އަފީފް ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުޚީ" ގައި ވާހަކަ ދައްކަވަމުން އަފީފް ވިދާޅުވީ ފަނޑިޔާރުންނަކީ ރައްޔިތުންގެ މަޖިލީހުން ފާސްކުރާ ޤާނޫނު ތަކުގައި ބުނާ ގޮތަށް އަމަލުކުރަން ތިއްބެވި ބައެއް ކަމަށާއި އެބޭފުޅުންނަށް ހަމައެކަނި ގެނެވޭނެ އިސްލާހަކީ ޖުޑިޝަރީ ތެރޭގައި އެނޫން ގޮތަކަށް މަސައްކަތް ކުރާ ބައެއް އުޅޭ ކަމަށް ވަނީ ނަމަ އެފަރާތްތަކަށް ތަމްރީން ދީ ޤާނޫނާ އެއްގޮތަށް ޝަރީއަތް ހިންގުމަށް އެބޭފުޅުން ތަމްރީން ކުރެއްވުން ކަމަށެވެ.
އަފީފް ވިދާޅުވީ ރައްޔިތުންގެ މަޖިލިސް ވިޔަސް، ރައީސުލްޖޫމްހޫރިއްޔާ ވިޔަސް އަދި ކޯޓުތައް ވިޔަސް އަމަލު ކުރަން ޖެހޭނީ ޤާނޫނު އަސާސީ އާއި ޤާނޫގައި ބަޔާންކުރެވިފައިވާ ގޮތުގެ މަތިން ކަމަށެވެ. ޤާނޫނުގައި ބަޔާންކޮށްފައި ނެތްނަމަ ދެން ބަލަން ޖެހޭނީ އިސްލާމީ ޝަރީޢަތަށް ކަމަށެވެ.
އަފީފް ވިދާޅުވީ ކޯޓު ތަކުގެ އިދާރީ ކަންކަން ފަނޑިޔާރުންނަށް ނުބެލޭނެ ކަމަށާއި އިދާރީ ކަންކަން މުސްތަގިއްލު ގޮތެއްގައި ގެންދިއުމަށް ޓަކައި ޖުޑިޝަލް އެޑްމިނިސްޓްރޭޝަން ޑިޕާޓްމަންޓް އުފެއްދަވާފައިވާ ކަމަށެވެ.
ޖުޑިޝަލް އެޑްމިނިސްޓްރޭޝަން ޑިޕާޓްމަންޓަކީ ސުޕްރީމްކޯޓުގެ ދަށަށް އަންނަން ޖެހޭ ތަނެއް ނޫން ކަމަށް އަފީފް ވިދާޅުވިއެވެ. ދުނިޔޭގެ ގިނަ ގައުމުތަކުގައި ވެސް އިދާރީ މަސައްކަތް ބަލަހައްޓަމުންދަނީ ކޯޓްތަކުގެ ބެލުމުގެ ދަށުން ނޫންކަން އަފީފް ފާހަގަ ކުރެއްވިއެވެ.
