ދިރާސާއަށް ބޭނުންކުރެވޭގޮތަށް ކޯޓުތަކުގެ ނިންމުންތައް ޝާއިޢުކުރަން ފަށައިފި
މިއީ ސުޕްރީމް ކޯޓުގެ 9 ވަނަ އަހަރީ ދުވަސް ފާހަގަ ކުރުމަށް ބޭއްވި ރިސެޕްޝަނެއް
އުއްތަމަ ފަނޑިޔާރު، އަލްއުސްތާޛް ޢަބްދުﷲ ސައީދު
ބައިނަލްއަޤުވާމީ ފަރާތްތަކުން ކުރާ ދިރާސާތަކަށް ބޭނުންކުރެވޭގޮތަށް، ރާއްޖޭގެ ޝަރުޢީ ދާއިރާއިން ނިންމާ ނިންމުންތައް ބޭނުންކުރެވޭނޭހެން ޝާއިޢުކުރަން ފަށައިފިއެވެ.
ދިވެހިރާއްޖޭގެ ސުޕްރީމް ކޯޓްގެ 9 ވަނަ އަހަރީ ދުވަސް ފާހަގަކުރުމަށް ހޯމަ ދުވަހުގެރޭ އުއްތަމަ ފަނޑިޔާރު، އަލްއުސްތާޛް ޢަބްދުﷲ ސައީދު ދެއްވި ރިސެޕްޝަންގައި، މި މަސައްކަތުގެ ދަށުން ޝާއިޢުކުރެވުނު ފުރަތަމަ ޗާޕު ވަނީ ނެރެފަ އެވެ. މިއީ ބައިނަލްއަޤަވާމީ ޝަރުޢީ ދިރާސާއަށް ބޭނުންކުރާ އޮންލައިން ސޮޓްވެއަރ، އަދި ވެބްސައިޓްގެ ޚިދުމަތްދޭ ކޯޕަރޭޝަނެއް ކަމުގައިވާ ލެކްސިސް ނެކްސިސް އާއި ދިވެހިރާއްޖޭގެ ޝަރުޢީ ދާއިރާއާދެމެދު ވެފައިވާ އެއްބަސްވުމުގެ ފުރަތަމަ ފިޔަވަހީގެ ދަށުން ޝާއިޢުކުރެވުނު ފުރަތަމަ ޗާޕެވެ. މިއީ ރާއްޖޭގެ މަތީމަރުހަލާގެ ކޯޓުތަކުގެ ނިންމުންތައް ބައިނަލްއަޤުވާމީ ފެންވަރެއްގައި ޝާއިޢުކުރުމަށް ކުރެވުނު ފުރަތަމަ މަސައްކަތަށް ވާއިރު، މި މަސައްކަތުގެ ފުރަތަމަ ފިޔަވަހީގައި، ހޯމަ ދުވަހުގެރޭ ޝާއިޢުކުރެވުނީ ސުޕްރީމް ކޯޓުތަކުގެ ނިންމުންތައް ހިމެނޭ ޗާޕެވެ. ދެވަނަ ފިޔަވަހީގައި ޝާއިޢުކުރުމަށް ނިންމާފައިވަނީ ހައިކޯޓުގެ ނިންމުންތަކެވެ.
ސުޕްރީމް ކޯޓުން ދަނީ އެ ކޯޓުގެ ނިންމުންތައް އިނގިރޭސިބަހަށް ތަރުޖަމާކުރުމުގެ މަސައްކަތްވެސް ކުރަމުންނެވެ.
މީގެ އިތުރުން، ހޯމަ ދުވަހުގެރޭގެ ރަސްމިއްޔާތުގައި ޝަރުޢީ ދާއިރާގެ ސްޓެރެޓީޖިކް އެކްޝަން ޕްލޭނާއި، ކުޑަކުދިންގެ ޢަދުލުގެ ނިޒާމު ހަރުދަނާކުރުމަށްޓަކައި އެކުލަވާލި އެކްޝަން ޕްލޭންވެސް އުއްތަމަ ފަނޑިޔާރުވަނީ ނެރެދެއްވާފައެވެ.
ހޯމަ ދުވަހުގެރޭގެ ރިސެޕްޝަންގައި ފަނޑިޔާރުންނާއި، ރިޓަޔަރ ކުރައްވާފައިވާ ފަނޑިޔާރުންނާއި، ބަންޑާރަނާއިބު މުޙައްމަދު އަނިލް ވަނީ ބައިވެރިވެވަޑައިގެންފައެވެ.
