ރާއްޖޭގެ ކަންކަމާއި ބޭރުގެ ފަރާތްތަކަށް ނުބެހެވޭނެއެކޭ ނުބުނެވޭނެ: އިބްރާ
އަވަށްޓެރި އިންޑިއާއި ގުޅުން ކެނޑި އެދެމެދުގައިވާ ވިޔާފާރި ހުއްޓިއްޖެނަމަ، ރާއްޖޭގެ ގޭގޭގެ ބަދިގޭގައި ރިހައެއް ނުކެއްކޭނެ
މަންދުކޮލެޖްގެ ގްރެޖުއޭޝަން ހަފްލާގައި އިބުރާ ވާހަކަދައްކަވަނީ
ރާއްޖޭގެ އެތެރޭގެ ކަންކަމާއި ބޭރުގެ ފަރާތްތަކަށް ނުބެހެވޭނެކަމަށް ސަރުކާރަށް ނުބުނެވޭކަމަށް އެމްޑީޕީގެ ކުރީގެ ރައީސް އިބުރާހިމް އިސްމާއިލް (އިބުރާ) ވިދާޅުވެއްޖެ އެވެ.
މަންދު ކޮލެޖްގެ ގްރެޖުއޭޝަން ހަފްލާގައި ވާހަކަ ދައްކަވަމުން އިބްރާހިމް އިސްމާއިލް ވިދާޅުވީ، ރާއްޖެއިން ބޭނުންވާ ކޮންމެ ފަހަރަކު، އެހީ ދީފައިވަނީ ބޭރު މީހުން ކަމަށާއި، އަދި ބޭރު މީހުންނަށް ރާއްޖޭގެ ކަންކަމާއި ބެހުމުގެ ފުރުސަތެއް ނޯންނާނެކަމަށް ނުބުނެވޭނެ ކަމަށެވެ. އަދި އެހެންގައުމުތަކުގެ ވިސްނުންތަކާއި އެކީ އުޅެން ދަސްކުރަންޖެހޭކަމަށާއި، ދުނިޔޭގައި އެހެން މީހުންވެސް އުޅޭގޮތަށް އެމީހުންނާއި އެއްބައިވެގެން އުޅުމުން މުހުތާދުތައްވެސްފުއްދުމަށް ފަސޭހަވާނޭ ކަމަށް އޭނާ ވިދާޅުވި އެވެ.
މިސާލުޖައްސަވަމުން އިބުރާ ވިދާޅުވީ، އަވަށްޓެރި އިންޑިއާއި ގުޅުން ކެނޑި އެދެމެދުގައިވާ ވިޔާފާރި ހުއްޓިއްޖެނަމަ، ރާއްޖޭގެ ގޭގޭގެ ބަދިގޭގައި ރިހަވެސް ނުކެއްކޭނޭކަމަށެވެ.
" ރިހަކައްކާނެ ހަވާދެއްވެސް، ފިޔައެއްވެސް ނުލިބޭނެ. އެ ފިޔާ ހޯދަން ބޭނުންނަމަ ބައެއް ކަންކަމުގައި އެމީހުން ދޭ ނަސޭހަތް ގަބޫލުކުރަން ޖެހޭ" އިބުރާ ވިދާޅުވިއެވެ.
އިބުރާ ވިދާޅުވިގޮތުގައި މަތީ ތައުލީމުގެ ބޭނުމަކީ، އެހެން ގައުމުތަކާއި އޮންނަ ގުޅުން ހަރުދަނާ ކުރަން ދަސްކުރުމެވެ.
ތައުލީމީ ދާއިރާގައި ތިއްބެވި ބޭފުޅުންނަށް ވަރަށް ބޮޑަށް ފާޑު ވިދާޅުވަމުން އިބުރާ ވިދާޅުވީ، މުޅި ރާއްޖެއަށް ބަލާއިރު މަތީ ތައުލީމަށް ވާސިލްވާ ދަރިވަރުންގެ އަދަދު މަދުވަމުންދާކަމަށާއި ސަބަބަކީ ތައުލީމީ ނިޒާމުގައި ހުރި މައްސަލަތައް ކަން އޭނާ ވަނީ ފާހަގަކުރައްވާފައެވެ. އިބުރާ ވިދާޅުވީ، ޕީއެޗްޑީ ހާސިލްކޮށްގެން ހުންނަވާ ބޭފުޅާ ރާއްޖޭގެ ދެބައިކުޅަ އެއްބައި ވިއްކާލިޔަސް ލާރި ލިބެންޏާ ހެވޭ ވިދާޅުވާ ހިސާބުން މަތީ ތައުލީމާއި އެ ޕީއެޗްޑީގެ ބޭނުމެއް ނެތްކަމަށެވެ.
އިބުރާ ވިދާޅުވީ ގައުމުގައި ހިނގާ ކަންކަމަށް ލޯ ހުޅުވާ، ވިސްނުން ހެޔޮގޮތުގައި ގެންގުޅެން ނޭނގޭނަމަ ޕީއެޗްޑީއެއްގެ އެއްގެ ބޭނުމެއް ނެތް ކަމަށެވެ.
