ފުޑް ކޯޓުތަކުގެ ދެ ބްލޮކްގެ މަސައްކަތް ޖުލައި މަހު ނިންމާލެވޭނެ:އެސްޓީއޯ
20 ޖޫން 2017 | އަންގާރަ 09:5525 ސްޓޯލް އެޅުމުގެ މަސައްކަތް ކުރެވޭނެ
ފުޓްކޯޓުތައް އެޅުމުގެ މަސައްކަރް ފެށުން
މާލޭގެ ހުޅަނގު ހާބަރު ސަރަަހައްދުގައި އެޅުމަށް ހަމަޖެހިފައިވާ ފުޑް ކޯޓުތަކުގެ މަސައްކަތުގެ ތެރެއިން ދެ ބްލޮކްގެ މަސައްކަތް އަންނަ ޖުލައި މަހުގެ ފަހުކޮޅު ނިންމާލެވޭނެ ކަމަށް އެސްޓީއޯ އިން ހާމަކޮށްފި އެވެ.
އެސްޓީއޯގެ މެނޭޖިން ޑިރެކްޓަރ އަހްމަދު ޝަހީރު ވިދާޅުވީ، މާލޭ ހުޅަނގު ހާބަރު ސަރަހައްދުގައި ފުޑް ކޯޓް އެޅުމުގެ މަސައްކަތުގެ ތެރެއިން އެ ސަރަހައްދުގައި ޒަމާނީ ޓެންޓްތައް އެޅުމުގެ މަސައްކަތު ގެ ތެރެއިން މިހާރު ފައުންޑޭޝަންގެ މަސައްކަތްތައް ކުރަމުންދާ ކަމަށެވެ. އެގޮތުން ބްލޮކް އެކެއް އަދި ދޭއްގެ މަސައްކަތް ނިންމާލެވޭނެ ކަމަށް އޭނާ ވިދާޅުވި އެވެ.
ޝަހީރު ވިދާޅުވީ، ހަތަރު ބްލޮކަށް ބަހާލައިގެން، ފުޑް ކޯޓުތައް އެޅުމުގެ މަސައްކަތް ކުރިއަށްދާ ކަމަށެވެ. މަސައްކަތް ލަސްވެގެންދިޔައީ ބޭރުން ގެންނަންޖެހޭ ސާމާނުތައް ގަނައުމުގައި ލަސްވުމުގެ ސަބަބުން ކަމަށް ޝަހީރު ވިދާޅުވި އެވެ.
މާލޭގެ ހުޅަނގު ދެކުނު ބަނދަރު ސަރަހައްދުގައި ކުރިން ހިންގަމުންދިޔަ ކެފޭތައް ނެގުމަށް ފަހު، ޒަމާނީ ފެންވަރުގެ ފުޑް ކޯޓްތަކެއް އެޅުމަށް އެސްޓީއޯ އާ ހަވާލުކޮށްފައިވަނީ، މިދިޔަ އަހަރުގެ ޖެނުއަރީ މަހު އެވެ. ހައުސިން މިނިސްޓްރީން އެ މަސައްކަތް އެސްޓީއޯއާ ހަވާލުކޮށްގެން ކުރުމަށް ރާވާފައިވާ އިރު، އެތަނުގައި 25 ނުވަތަ 27 ސްޓޯލު ގާއިމް ކުރެވޭނެ އެވެ.
މި މަސައްކަތް އެންމެ ފުރަތަމަ ފެށީ ހަ މަސް ދުވަހުގެ ތެރޭގައި ނިންމާލުމަށެވެ. އެހެން ނަމަވެސް އެ މަސައްކަތް ހަވާލު ކުރިތާ، އެއް އަހަރާއި ހަ މަސް ވާން ގާތްވެފައިވާ އިރުވެސް އެ ސަރަހައްދު ތަރައްގީ ކުރެވިފައެއް ނުވެ އެވެ. އެ ސަރަހައްދުގައި ފުޑް ކޯޓުތައް ގާއިމް ކުރާ އިރު، ޕާކިން ޒޯންތަކާއި ދެ ފާހާނާ ބަރިވެސް ހެދުމަށް ވަނީ ހަމަޖެހިފަ އެވެ.
