އައްޑޫގައި މަސައްކަތްކުރާ ބިދޭސީންގެ ދަފްތަރެއް އެކުލަވާލަނީ
މި މަސައްކަތް ކުރަމުން އަންނަނީ އަވަށު އޮފީސްތައް މެދުވެރިކޮށް ވެބް ޕޯޓަލްއަކުން
އައްޑޫ ސިޓީ: މާލެ ފިޔަވައި އެންމެ ގިނައިން ބިދޭސީން މަސައްކަތް ކުރަމުން އަންނަ އެއް ސަރަހައްދު
އައްޑޫ ސިޓީގައި މަސައްކަތްކުރާ ބިދޭސީންގެ ދަފްތަރެއް އެކުލަވާލުމުގެ މަސައްކަތް އައްޑޫ ސިޓީ ކައުންސިލުން ފަށައިފިއެވެ.
އައްޑޫ ސިޓީ ކައުންސިލުން ކޮށްފައިވާ އިއުލާނެއްގައި ބަޔާންކޮށްފައިވަނީ، މި މަސައްކަތް ކުރަމުން އަންނަނީ އެ ރަށުގެ އަވަށު އޮފީސްތައް މެދުވެރިކޮށް، "ހަރަހެރި" މިނަމުގައި ފަރުމާކޮށްފައިވާ ވެބް ޕޯޓަލްއެއްގެ ޒަރިއްޔާއިން ކަމަށެވެ.
ވެބް ޕޯޓަލްއަށް ބޭނުންވާ މައުލޫމާތު ފޯރުކޮށްދޭން ޖެހެނީ ބިދޭސީންނާއި ހަވާލުވެފައިވާ ފަރާތްތަކުންނެވެ. އެގޮތުން އައްޑޫސިޓީ ކައުންސިލުން ވަނީ އެ ބިދޭސީއަކު މަސައްކަތްކުރާ އަވަށެއްގެ އަވަށު އޮފީހަށް އެ މައުލޫމާތު ދިނުމަށް އަންގާފައެވެ. މިކަމުގައި އެއްބާރުލުން ނުދޭ ފަރާތްތަކާއި މެދު ސިޓީކައުންސިލްތަކަށް ލިބިދީފައިވާ ބާރުގެ ދަށުން ފިޔަވަޅު އަޅާނެކަމަށް ވެސް އައްޑޫސިޓީ ކައުންސިލުން އިލްތިމާސްކޮށްފައި ވެއެވެ.
މިކަމާއި ގުޅޭގޮތުން ސަން އޮންލައިންއަށް މައުލޫމާތު ދެއްވަމުން އައްޑޫ ސިޓީގެ މޭޔަރު އަބްދުﷲ ސޯދިގު ވިދާޅުވީ މިމަސައްކަތް ކުރިޔަށްދާ އިރު، އެ ސިޓީގައި ގަވައިދާ ޙިލާފަށް މަސައްކަތް ކުރަމުން އަންނަ ބިދޭސީންނަށް އިތުރު ފުރުސަތެއްދީ އަލުން ވާކް ވިސާއަށް އެދުމުގެ ފުރުސަތު ވެސް ހުޅުވާލާފައިވާ ކަމަށެވެ.
ދިވެހިރާއްޖޭގައި މަސައްކަތްކުރާ ބިދޭސީންގެ ރަޖިސްޓްރީއެއް ސަރުކާރުން ބެލެހެއްޓުމަށްޓަކައި މީހުންދިރިއުޅޭ ކޮންމެރަށެއްގައި ބިދޭސީން ރަޖިސްޓްރީކުރާ ދަފްތަރެއް އޮންނަންވާނެކަމުގައި ވަޒީފާ އަދާކުރުމަށް ދިވެހިރާއްޖެއަށް ބިދޭސީން ގެނައުމުގެ ޤަވާޢިދުގެ 24 ވަނަ މާއްދާގައި ބަޔާންކޮށްފައި ވެއެވެ.
