ބާރ ކައުންސިލަށް ހުރިހާ ގޮތަކުން އެހީތެރިކަން ފޯރުކޮށްދިނުމަށް އިލެކްޝަންސް އިން ނިންމައިފި
ޖޭއެސްސީ އަށް ގާނޫނީ ވަކީލަކު ހޮވުމަށް ބާއްވާ އިންތިޚާބު އޮންނާނީ މި މަހު 27 ވަނަ ދުވަހު
އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމުގެ ތެރެއިން
ބާރ ކައުންސިލަށް ހުރިހާ ގޮތަކުން އެހީތެރިކަން ފޯރުކޮށްދިނުމަށް އިލެކްޝަންސް ކޮމިޝަންސް އިން ނިންމައިފިއެވެ.
އިލެކްޝަންސް ކޮމިޝަނުން ކުރި ޓުވީޓެއްގައި ބުނެފައިވަނީ ޤާނޫނީ ވަކީލުންގެ ތެރެއިން ޖުޑީޝަލް ސަރވިސް ކޮމިޝަން (ޖޭއެސްސީ) އަށް އައްޔަން ކުރާ ވަކީލުން އިންތިހާބު ކުރުމުގައި ބާރ ކައުންސިލަށް ހުރިހާ އެހީތެރިކަން ފޯރުކޮށްދިނުމަށް ނިންމާފައިވާ ކަމަށެވެ.
ޖުޑީޝަލް ސަރވިސް ކޮމިޝަން (ޖޭއެސްސީ) އަށް ގާނޫނީ ވަކީލަކު ހޮވުމަށް ބާއްވާ އިންތިޚާބު އޮންނާނީ މި މަހު 27 ވަނަ ދުވަހު ކަމަށް ބާރ ކައުންސިލުގެ އެގްޒެކެޓިވް ކޮމިޓީން ވަނީ ނިންމާފައެވެ.
ޖޭއެސްސީއަށް ގާނޫނީ ވަކީލަކު ހޮވުމަށް ބާއްވާ އިންތިޚާބަށް ކުރިމަތިލުމަށް އެދޭ މީހުން އެ މަގާމަށް ކުރިމަތިލުމުގެ ފުރުސަތު، ޖުލައި 19 ވާ ހުކުރު ދުވަހުން ފެށިގެން ޖުލައި 23 ވާ އަންގާރަ ދުވަހުގެ ހަވީރު 5:00 އާ ހަމައަށް ހުޅުވާލާފައިވާ ކަމަށް ބާރ ކައުންސިލުން މައުލޫމާތުދެއެވެ.
މީގެ އިތުރުން ބާރ ކައުންސިލުން ބުނީ އިންތިޚާބަށް ކުރިމަތިލާން އެދޭ ފޯމާއި ތަކެތި ހުށަހަޅަންޖެހެނީ ދިވެހިރާއްޖޭގެ ބާރ ކައުންސިލުގެ އެގްޒެކެޓިވް ކޮމިޓީން މި އިންތިޚާބުގެ ކަންތައް ބެލެހެއްޓުމަށް ގާއިމުކޮށްފައިވާ މަރުކަޒު ބައު ޖަމާލުއްދީނަށް ކަމަށެވެ. އަދި ފޯމް ބަލައިގަންނާނީ ޖުލައި 21 ވާ އާދީއްތަ ދުވަހުން ފެށިގެން ޖުލައި 23 ވާ އަންގާރަ ދުވަހުގެ ނިޔަލަށް، ސަރުކާރު ބަންދުނޫން ކޮންމެ ދުވަހެއްގެ ހެނދުނު 9:00 ން ހަވީރު 5:00 އަށެވެ.
