ވީއައިއޭގެ ސައުތް ވެސްޓް އޭޕްރަން ރަސްމީކޮށް ހުޅުވައިފި
17 ޖުލައި 2019 | ބުދަ 06:32އޭޕްރޮން ގައި 70،000 އަކަ މީޓަރ ގެ ޕާކިން ސްޕޭސް ހުރޭ
އޭޕްރޮންގައި ޕާކް ކޮށްފައި އޮތް ފްލައިޓެއް
ވެލާނާ އިންޓްނޭޝަނަލް އެއަރޕޯޓްގެ ސައުތް ވެސްޓް އޭޕްރަން ރަސްމީކޮށް ހުޅުވައިފި އެވެ.
އާ އޭޕްރަންގައި ފުރަތަމަ ޕާކުކޮށްފައިވަނީ ގައުމީ އެއާލައިން މޯލްޑިވިއަންގެ ވައިޑް ބޮޑީ އެއާކްރާފްޓެކެވެ.
ފްލައިޓަށް މަރުހަބާ ކިޔުމަށް ވަނީ ވޯޓާ ސެލިޔުޓެއް ވެސް އަރުވައިފަ އެވެ.
ބުދަ ދުވަހު ހުޅިވި ފުރަތަމަ ފޭސް އޭޕްރަން ގައި 70،000 އަކަ މީޓަރ ގެ ޕާކިން ސްޕޭސް ހިމެނެއެވެ.
އެމްއޭސީއެލްގެ އެސޯސިއޭޓް ޖެނެރަލް މެނޭޖަރު ކޯޕަރޭޓް ކޮމިޔުނިކޭޝަންސް ހަސަން އަރީފް ވިދާޅުވީ އާ އޭޕްރަންގެ ފުރަތަމަ ފިޔަވަހި ނިންމައި، ރަސްމީކޮށް ހުޅުވުމަކީ އެއާޕޯޓަށް ލިބުނު ކުރިއެރުމެއް ކަމަށެވެ.
މި އޭޕްރަން ގައި ތިން މާސްކޯޑް އީ ގެ މަތިންދާ ބޯޓާއި، ކޯޑް އީގެ ދެ ޑެޑިކޭޓެޑް ސްޓޭންޑް އަދި ކޯޑް ސީގެ އެއް ޑެޑިކޭޓެޑް ސްޓޭންޑް ބެހެއްޓޭނެ ކަމަށެވެ.
"ކޮމްބިނޭޝަނަށް ބަލާނަމަ ފަސް ވައިޑް ބޮޑީ އެއަރކްރާފްޓް އަދި އެއް ނެރޯ ބޮޑީ ބޭއްވޭނެ.
އަނެއް ކޮމްބިނޭޝަން އަކީ ދެ ވައިޑް ބޮޑީ އެއަރކްރާފްޓް ބޭންދިފައި ހަތް ނެރޯ ބޮޑީ އެއަރކްރާފް ބޭންވޭނެ" ހަސަން ވިދާޅުވިއެވެ.
ހަސަން ވިދާޅުވީ ފުރަތަމަ ފޭސްގައި އޭޕްރޮން ހެދުމަށް 15 މަސް ހޭދަވެފައިވާ ކަމަށެވެ.
ދެވަނަ ފޭސް އޭޕްރަންގެ މަސައްކަތް ވެސް މިހާރު ފެށިފައިވާ ކަމަށާއި ހަތްމަސް ދުވަސް ތެރޭގައި މަސައްކަތް ނިންމާލެވޭނެ ކަމަށް ހަސަން ވިދާޅުވިއެވެ. ދެވަނަ ފޭސްގެ އޭޕްރަން އަކީ 66،000 އަކަ މީޓަރުގެ ސްޕޭސްއެކެވެ.
އެމްއޭސީއެލްގެ ސީނިއަރ ޖެނެރަލް މެނޭޖަރ ރޭމްޕް ސާރވިސް އަލީ ނަސީރު ވިދާޅުވީ މި އޭޕްރަން އަކީ އެއަރ ލައިން އާއި މުވައްޒަފުން ސަލާމަތް ކުރުމަށް އެޅޭނެ ހުރިހާ ފިޔަވަޅެއް އަޅާފައިވާ އޭޕްރަންއެއް ކަމަށެވެ.
އަދި މި އޭޕްރަންގައި މަތިންދާބޯޓަށް ކައިރި ކުރާ އިކުއިޕްމެންޓުތަކަށް ވަކި ސަރަހައްދެއް ހާއްސަކޮށްފައިވާ ކަމަށާއި ދުނިޔޭގެ އެންމެ ފެންވަރު ރަނގަޅު އެއާޕޯޓުތަކުގެ އޭޕްރަން އާއި މި އޭޕްރަންގެ ސްޓޭންޑާޑް އެއްވަރުވާނެ ކަމަށެވެ.
ހުރިހާ އެޕްރަން ސްޕޭސް އެއް ނިމިގެން ދާއިރު ގާތްގަނޑަކަށް 212000 (ދެލައްކަ ބާރަހާސް) ސްކޮޔާ މީޓަރ ގެ ސްޕޭސް ލިބޭނެ ކަމަށް އެމްއޭސިލް އިން މައުލޫމާތު ދެއެވެ.
