ވޯލްޑް ޔޫތު ސްކިލްސް ޑޭ ފުރަތަމަ ފަހަރަށް ރާއްޖޭގައި ފާހަގަކުރަން ނިންމައިފި

ވޯލްޑް ޔޫތު ސްކިލްސް ޑޭ ފުރަތަމަ ފަހަރަށް ރާއްޖޭގައި ފާހަގަކުރަން ނިންމައިފިއެވެ.

ދުނިޔޭގެ ފެންވަރުގައި ފާހަގަކުރާ "ވޯލްޑް ޔޫތު ސްކިލްސް ޑޭ" ރާއްޖޭގައި ފާހަގަކުރުމަށްޓަކައި ޚާއްސަ ރަސްމިއްޔާތެއް ބޭއްވުމަށްވަނީ ހަމަޖެހިފައެވެ. މި ރަސްމިއްޔާތު ބޭއްވުމަށް ހަމަޖެހިފައިވަނީ ހޯމަ ދުވަހު މޯލްޑިވްސް ޕޯޓްސް ލިމިޓެޑްގެ މާލޭ ހާބަރ ސަރަހައްދުގައެވެ. މި ރަސްމިއްޔާތު ޝަރަފްވެރިކޮށްދެއްވުމަށް ހަމަޖެހިފައިވަނީ މިނިސްޓަރ އޮފް ހައުސިންގ އެންޑް އަރބަން ޑިވެލޮޕްމަންޓް އާމިނަރު އާޠިފާއެވެ. މި ރަސްމިއްޔާތުގައި "ނެޝަނަލް އެޕްރެންޓިސްޝިޕް ޕްރޮގްރާމް" އަދި "އެމްޕްލޮއިމަންޓް ސެކްޓަރ ކައުންސިލް"ތައް އިފްތިތާހް ކުރުމަށް ވަނީ ނިންމާފައެވެ.

Advertisement

ނެޝަނަލް އެޕްރެންޓިސްޝިޕް ޕްރޮގްރާމް

"ނެޝަނަލް އެޕްރެންޓިސްޝިޕް ޕްރޮގްރާމް" އަކީ ދިވެހިރާއްޖޭގެ ވަޒީފާދޭ ފަރާތްތަކާއި ގުޅިގެން ރާއްޖޭގެ އެކި ރަށްތަކާއި ސިނާއީ ސަރަހައްދުތައް ހިމެނޭ މަސައްކަތު މާހައުލުތަކުގައި ތިބެގެން އެ މަސައްކަތްތަކާއި، ހުނަރުތައް އުނގެނި، ތަމްރީނުވެ، ތަޖުރިބާ ހޯދުމުގެ ފުރުސަތު ދިވެހީންނަށް ފަހިކޮށްދިނުމަށް ހިންގާ ޚާއްސަ ޕްރޮގްރާމެކެވެ. މި ޕްރޮގްރާމުގެ ދަށުން ހިންގާ ހުރިހާ ތަމްރީނު ޕްރޮގްރާމެއް ހިންގުމަށް ހަމަޖެހިފައިވަނީ ޓިވެޓް އޮތޯރިޓީގެ ނެޝަނަލް ކޮމްޕިޓެންސީ ބޭސްޑް ޓްރޭނިންގ ސްޓޭންޑާރޑްތަކާއި އެއްގޮތަށެވެ.

އެމްޕްލޮއިމަންޓް ސެކްޓަރ ކައުންސިލްތައް

ވަޒީފާގެ ބާޒާރަށް މަސައްކަތްތެރިން ބޭނުންވާ ފެންވަރާއި، މިންވަރު ދެނެގަތުމަށްފަހު އެ މަސައްކަތްތަކަށް އަމާޒުކޮށްގެން ނެޝަނަލް ކޮމްޕިޓެންސީ ބޭސްޑް ޓްރޭނިންގ ސްޓޭންޑާރޑްތައް ޓިވެޓް އޮތޯރިޓީއިން ދަނީ އެކުލަވާލަމުންނެވެ. މި ގޮތަށް އެކުލަވާލެވިފައިވާ ސްޓޭންޑާރޑްތަކުގެ އިތުރުން އަލަށް ވަޒީފާގެ ބާޒާރަށް ބޭނުންވާ އެކި މަސައްކަތްތަކާއި ގުޅޭ މިފަދަ ސްޓޭންޑާރޑްތައް އެކުލަވާލުމަށާއި، ކުރިންވެސް ހުރި ސްޓޭންޑާރޑްތައް ރިވިއުކުރުމަށް ބޭނުންވާ ފަންނީ ލަފަޔާއި، ތަޖުރިބާކާރުންގެ އިރުޝާދު ހޯދައި، އެއްކުރުމަށްޓަކައި އެމްޕްލޮއިމަންޓް ސެކްޓަރ ކައުންސިލްތައްވަނީ އެކުލަވާލެވިފައެވެ. މިގޮތުން އެކުލަވާލައިފައިވާ ސެކްޓަރ ކައުންސިލްތައް އިފްތިތާހްކުރުމަށް ހަމަޖެހިފައިވަނީ "ވޯލްޑް ޔޫތު ސްކިލްސް ޑޭ" ފާހަގަކުރާ ޚާއްސަ ރަސްމިއްޔާތުގައެވެ. މި ރަސްމިއްޔާތުގައި އިފްތިތާހްކުރުމަށް ހަމަޖެހިފައިވަނީ 6 އެމްޕްލޯއިމަންޓް ސެކްޓަރ ކައުންސިލކެވެ. އެއީ އިޖްތިމާއީ ދާއިރާގެ އެމްޕްލޯއިމަންޓް ސެކްޓަރ ކައުންސިލް، ދަތުރުފަތުރުގެ ދާއިރާގެ އެމްޕްލޯއިމަންޓް ސެކްޓަރ ކައުންސިލް، ފަތުރުވެރިކަމުގެ ދާއިރާގެ އެމްޕްލޯއިމަންޓް ސެކްޓަރ ކައުންސިލް، މަސްވެރިކަމާއި ދަނޑުވެރިކަމުގެ ދާއިރާގެ އެމްޕްލޯއިމަންޓް ސެކްޓަރ ކައުންސިލް، އިމާރާތްކުރުމުގެ ދާއިރާގެ އެމްޕްލޯއިމަންޓް ސެކްޓަރ ކައުންސިލް އިތުރުން އިންފޮމޭޝަން ކޮމިއުނިކޭޝަން ޓެކްނޮލޮޖީގެ ދާއިރާގެ އެމްޕްލޯއިމަންޓް ސެކްޓަރ ކައުންސިލް ހިމެނެއެވެ.

"ވޯލްޑް ޔޫތު ސްކިލްސް ޑޭ" ފާހަގުކުރުމުގެ ގޮތުން ރޭވިފައިވާ ހަރަކާތްތަކުގެ ތެރޭގައި ރާއްޖޭގައި މީހުން ދިރިއުޅޭ ހުރިހާ ރަށެއްގައި މި ދުވަސް ކުލަގަދަކޮށް ފާހަގަކުރުން ހިމެނެއެވެ. މިގޮތުން ކޮންމެ ރަށެއްގެ ސްކޫލުގައި ޚާއްސަ އެސެމްބްލީއެއް ބޭއްވުމާއި، އެސެމްބްލީގައި އެ ރަށަކަށް ނިސްބަތްވާ މަސައްކަތެއް، ހުނަރެއް ނުވަތަ އެ ރަށެއްގެ ޒުވާނުން ޝައުޤުވެރިވާ މަސައްކަތަކާއި ގުޅޭ ގޮތުން ރަށުގައި އުޅޭ މަސައްކަތްތެރި، ތަޖުރިބާކާރު ބޭފުޅެއް ނުވަތަ ޚިދުމަތްތެރިއެއްގެ ވާހަކަ ދެއްކުމަށް ވަނީ ނިންމާފައެވެ.

ކޮންމެ އަހަރެއްގެ ޖުލައި މަހުގެ 15 ވަނަ ދުވަހަކީ ދުނިޔޭގެ ފެންވަރުގައި ފާހަގަކުރާ "ވޯލްޑް ޔޫތު ސްކިލްސް ޑޭ" ކަމުގައި 2014 ވަނަ އަހަރުގެ ނޮވެމްބަރ މަހު ބޭއްވި ޔޫ.އެންގެ ޖެނެރަލް އެސެމްބްލީގައި ނެރުނު ޤަރާރަކުން ވަނީ ފާސްކޮށްފައެވެ. މިއީ ދުނިޔޭގެ ފެންވަރުގައި މަސައްކަތްތެރިކަމާއި ހުނަރުގެ މުހިއްމުކަން ފާހަގަކުރުމަށާއި، ތަފާތު ދާއިރާތަކުގެ މަސައްކަތްތެރީންގެ މަސައްކަތުގެ އަގުވަޒަންކޮށް، މަސައްކަތްތެރިކަމާއި، ހުނަރު ޕްރޮމޯޓްކުރުމުގެ މަޤްސަދުގައި ފާހަގަކުރަމުން އަންނަ ދުވަހެކެވެ.