ފެމެލީ ކޯޓުގެ ތެރޭގައި ހައްޖު ގްރޫޕު ހިންގި، އެއީ ތެދެއް: ގާޒީ ހަސަން ސައީދު
14 ޖުލައި 2019 | އާދީއްތަ 12:05އަބަދުވެސް ކޯޓުގައި ކޮރަޕްޝަން ފެތުރުން ހުއްޓުވުމަށް މަސައްކަތް ކުރައްވާ ކަމަށް ވިދާޅުވި
ފެމިލީ ކޯޓުގެ އިސް ގާޒީ ހަސަން ސައީދުގެ މައްސަލައިގެ އަޑުއެހުމުގެ ތެރެއިން
ފެމެލީ ކޯޓުތެރޭގައި ހައްޖު ގުރޫޕުގެ މަސައްކަތް ކުރަމުންދާކަމަށް ބުނެފައިވާ ބުނުމަކީ ތެދެއްކަމަށް ޖުޑީޝަލް ސަރވިސް ކަމިޝަން (ޖޭއެސްސީ) އިން ސަސްޕެންޑްކޮށްފައިވާ ފެމެލީ ކޯޓުގެ އިސް ގާޒީ ހަސަން ސައީދު ވިދާޅުވެއްޖެ އެވެ.
އާދީއްތަ ދުވަހު ޖޭއެސްސީއިން ބޭއްވި ހަސަން ސައީދުގެ މައްސަލައިގެ އަޑުއެހުމުގައި އޭނާ ވިދާޅުވީ އެކޯޓު ތެރޭގައި ހައްޖު ގުރޫޕެއްގެ މަސައްކަތް ކުރަމުން އައިކަން ސަމާލުކަމަށް ގެނައީ ރާއްޖެޓީވީން އެވާހަކަ ދެއްކުމުން ކަމަށެވެ. އެމައްސަލަ ރާއްޖެޓީވީއިން ރިޕޯޓް ކޮށްފައިވަނީ މިއަހަރުގެ ޖެނުއަރީ މަހުގެ ތެރޭގައެވެ. އަދި ބެލި ބެލުމުން އެއީ ތެދެއްކަމަށާއި އެމައްސަލައިގައި ހިމެނޭ ފަރާތެއް ސަސްޕެންޑްވެސް ކުރެއްވި ކަމަށް ހަސަން ސައީދު ވިދާޅުވިއެވެ.
އެ މައްސަލައިގައި ފެމިލީ ކޯޓުގެ ކައިވެނީގެ ރެޖިސްޓްރާ އަހުމަދު އަބްދުﷲ ސަސްޕެންޑްކޮށްފައިވަނީ މިދިޔަ މާޗް މަހުގެ 26 ވަނަ ދުވަހު އެވެ.
އެކަމާއި ގުޅިގެން އެގޮތަށް ރަޖިސްޓްރާ ސަސްޕެންޑް ނުކުރެވޭނެކަމަށް ހުށައެޅި ޝަކުވާތަކާއި ގުޅިގެން ހަސަން ސައީދު ވިދާޅުވީ ރަޖިސްޓްރާ ސަސްޕެންޑް ކުރީ ޝަރުއީ މުއައްޒަފުންގެ ގަވައިދުގެ 213 ވަނަ މާއްދާއިން އޭނާއަށް ލިބިލައްވާ ބާރުގެ ދަށުން ކަމަށެވެ.
ހަސަން ސައީދު ވިދާޅުވީ އެމައްސަލައިގައި ރަޖިސްޓްރާ ސަސްޕެންޑްކޮށްފައިވަނީ އެއީ ކޯޓު ހިމާޔަތް ކުރުން އެއީ އެންމެ އިސްކަމެއް ދެއްވާ ކަމަކަށްވާތީ ކަމަށެވެ. އޭނާއަކީ އަބަދުވެސް ކޯޓުގައި ކޮރަޕްޝަން ފެތުރުން ހުއްޓުވުމަށާއި މީހުންގެ އިތުބާރު ކޯޓަށް ހޯދުމަށް މަސައްކަތް ކުރައްވާ ބޭފުޅެއް ކަަމަށް ވިދާޅުވިއެވެ. އެމައްސަލަ އަމިއްލައަށް ބައްލަވާ ރަޖިސްޓްރާ ސަސްޕެންޑްކުރީ މައްސަލަ ތަހުގީގު ކުރަން ވެސް ތިބީ ކަރަޕްޝަނުން މަންފާ ލިބޭ މީހުންކަމަށާއި އެ ތަހުގީގުން ނަތީޖާ ނުލިބޭނެކަން އެނގިލައްވާތީ ކަަށް ވިދާޅުވިއެވެ.
އާދީއްތަ ދުވަހުގެ އަޑުއެހުމުގައި ވަނީ ޖޭއެސްސީގެ ތަހުޤީޤު ޓީމުން ވަނީ މިއަހަރުގެ ފެބްރުއަރީ 28 ވަނަ ދުވަހު ރެޖިސްޓްރާ އަހުމަދު އެކޯޓުގެ ކޮންފަރެންސް ރޫމަށް ހާޒިރުކޮށް އޭނާއާއި ދިމާލަށް "ކަލޭ ކީއްކުރަން ހިފާ ރޯދައެއްހޭ ތިއީ މުނާފިގެކޭ" ވިދާޅުވެ އަތުގައި އޮތް "ޕްލާސްޓިކް ފައިލް" އަހުމަދު އަބްދުﷲ އާއި ދިމާލަށް އެއްލާލެއްވިތޯ ސުވާލުކުރައްވާފަ އެވެ.
ޖަވާބުގައި ގާޒީ ހަސަން ސައީދު ވިދާޅުވީ ރެޖިސްޓްރާ އަހުމަދު ކޮންފަރެންސް ރޫމަށް ހާޒިރު ކުރެއްވީ އޮފީސްތެރޭގައި ހައްޖު ގުރޫޕެއްގެ މަސައްކަތް ކުރަމުން އައިކަމަށް ލިބުނު ޝަކުވާއަކާއި ގުޅިގެން ކަމަށެވެ. ހަސަން ސައީދު ވިދާޅުވީ އޭނާއަކީ "ކަލޭ" ކިޔައިގެން ވާހަކަ ދައްކާ މީހެއް ނޫން ކަމަށެވެ. އަދި އަތުގައި އޮތް ފައިލް ރަޖިސްޓްރާގެ އަތަށް ދިނީ ރީތިކޮށް ކަމަށެވެ. އެފައިލް ރެޖިސްޓްރާއާއި ދިމާލަށް އެއްލާނުލައްވާ ކަމަށް ވިދާޅުވިއެވެ.
އެދުވަހު ރެޖިސްޓްރާ ހުންނެވީ ރޯދައަށް ކަމަށާއި އެކަން އެނގުނީ ކޮންފަރެންސް ރޫމަށް ހާޒިރުކޮށް ކޮފީއެއް ބޯލުމަށް އެދުމުން ރޯދައަށް ހުންނެވިކަމަށް ވިދާޅުވުމުން ކަމަށް ގާޒީ ހަސަން ސައީދު ވިދާޅުވިއެވެ.
އެ މައްސަލައިގައި ރަޖިސްޓްރާ ސަސްޕެންޑްކޮށް މައްސަލަ ބެލުމަށް ފެމެލީ ކޯޓުން ޖުޑީޝަލް އެޑްމިނިސްޓްރޭޝަނަށް މައްސަލަ ހުށައެޅިއެވެ. އެ އިދާރާއިން ވަނީ އޭނާ މަގާމުން ވަކިކޮށްފައެވެ.
މީގެ ކުރިން 2016 ވަނަ އަހަރު ޖޭއެސްސީން ގާޒީ ހަސަން ސައީދާ ގުޅޭ ގޮތުން ބެލި މައްސަލައެއްގައި އޭނާ ސަސްޕެންޑްކުރިއެވެ. އަދި އޭނާއާ ދެކޮޅަށް ރެޖިސްޓްރާ އަހްމަދު ހެކިބަސް ދެއްވި ކަމަށް ބުނާ މައްސަލައެއްގައި ހޫނުވެފައިވާކަމަށް ބުނެވެއެވެ.
