ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ގދ. ތިނަދޫ ޑޮކްޓަރ އަބްދުލް ސަމަދު ހޮސްޕިޓަލަށް ޒިޔާރަތް ކުރައްވާ ބަލިމީހުންގެ ހާލަތު ބައްލަވާލައްވައިފިއެވެ.
ރައީސުލް ޖުމްހޫރިއްޔާ ތިނަދޫއަށް ވަޑައިގެންފައިވަނީ "ޖަޒީރާ ހޮޅުއަށި" ސިލްސިލާގެ ދަށުން ކުރައްވާ ދަތުރުފުޅެއްގައި ހުކުރުދުވަހުއެވެ.
ހުކުރު ދުވަހުގެ ހަވީރުގެ ވަގުތެއްގައި ރައީސުލްޖުމްހޫރިއްޔާ ތިނަދޫއަށް ވަޑައިގެންފައިވާއިރު، އެ މަނިކުފާނުގެ އަރިހުގައި ނައިބު ރައީސް ފައިސަލް ނަސީމާއި، ފިޝަރީޒް އެންޑް އެގްރިކަލްޗަރ މިނިސްޓަރު ޒަހާ ވަހީދުގެ އިތުރުން ތިނަދޫ އުތުރު ދާއިރާގެ މެމްބަރު އަބްދުލްމުޢްނީ އަދި ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފު ބައިވެރިވަޑައިގަންނަވައެވެ. ރައީސްގެ އަރިހު އެސްޓީއޯގެ މެނޭޖިންގ ޑިރެކްޓަރު ހުސެން އަމްރު އަދި ރައީސް އޮފީހުގެ އިސް ބޭފުޅުން ވެސް ވަނީ ތިނަދޫއަށް ވަޑައިގެންފައެވެ.
"ޖަޒީރާ ހޮޅުއަށި" ސިލްސިލާގެ ތެރެއިން ތިނަދޫއަށް ކުރައްވާ ދަތުރުފުޅުގައި މައިގަނޑު ގޮތެއްގައި އެ ރަށު ރައްޔިތުންނާ އެކު މަޝްވަރާކޮށްފައިވަނީ ސަރުކާރުގެ މަސްވެރިކަމާގުޅޭ ސިޔާސަތުގެ ދަށުން "މަސްވެރިކަމުގެ ނަފާއިތުރުކުރުން" މި މައުލޫގެ މައްޗަށެވެ.
މި މައުލޫއުގެ މައްޗަށް ވާހަކަފުޅު ދައްކަވަމުން ރައީސް ވިދާޅުވެފައިވަނީ ރާއްޖޭގެ ކޮންމެ ސަރަހައްދަކުން ވެސް މަސްގަތުމަށް ބޭނުންވާ ދިރާސާއެއް ފިޝަރީޒް މިނިސްޓްރީއިން ހަދާފައިވާ ކަމަށާއި، އަދި މި ދިރާސާ މިހާރު އިކޮނޮމިކް މިނިސްޓްރީއަށް ފޮނުވާފައިވާ ކަމަށް ރައީސް ވިދާޅުވި އެވެ.
މިއީ "ޖަޒީރާ ހޮޅުއަށި" ސިލްސިލާގެ ދަށުން ބޭއްވުނު ތިންވަނަ ބައްދަލުކުރެއްވުމެވެ. މި ސިލްސިލާގެ މަގުސަދަކީ ރައްޔިތުންނާ ގުޅުން ހުރި ކަންކަމުގައި ސަރުކާރުން ގޮތް ނިންމުމުގައި ރައްޔިތުންގެ ލަފަޔާއި ހިޔާލު ހުރި ގޮތް ދެނެގަތުމެވެ. މި ސިލްސިލާގެ ކުރިން ބޭއްވި ދެ ބައްދަލުވުންތައް ވެސް ބާއްވާފައި ވަނީ މާލޭގައެވެ.
