ގައުމު އެދެނީ ޖަޒީރާވަންތަކަން ދިރުވައި ޤައުމު ތަރައްގީ ކުރުމަށް: ރައީސް ސޯލިހު
ތައުލީމީ މަރުހަލާގެ އިލްމީ ބަހުސްތަކުގައި އުޅޭއިރު އަބަދުވެސް ހިތުގައި ބާއްވަންވީ ގައުމު
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް، އަންގާރަ ދުވަހުގެ ރޭ ދަރުބާރުގޭގައި ބޭއްވި އޭ ލެވެލް ޓޮޕް އެޗީވާޒް އެވޯޑް ހަފްލާގައި
ދިވެހި ޒުވާނުންގެ ކިބައިން ގައުމު އެދެނީ ގައުމުގެ ޖަޒީރާވަންތަކަން ދިރުވައި, ގައުމު ތަރައްގީ ކުރަން ދަންނަ ބަޔަކަށް ޒުވާނުން ވުމަށް ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އަންގާރަ ދުވަހުގެ ރޭ ދަރުބާރުގޭގައި ބޭއްވި އޭ ލެވެލް ޓޮޕް އެޗީވާޒް އެވޯޑް ހަފްލާގައި ވާހަކަ ދައްކަވަމުން ރައީސް ސޯލިހު ވިދާޅުވީ ޤައުމު ބިނާކުރުމުގައި ދަރިވަރުންގެ ތައުލީމީ ގާބިލުކަމާއި ހުނަރުވެރިކަމުގެ ބޭނުން، އެންމެ އެދެވޭގޮތުގައި ހިފާނޭކަމާމެދު ޝައްކުނުކުރުއްވާކަމަށާއި ތައުލީމީ މަރުހަލާގެ އިލްމީ ބަހުސްތަކުގައި އުޅޭއިރު އަބަދުވެސް ހިތުގައި ބާއްވަންވީ ގައުމު ކަމުގައެވެ.
މުސްތަގްބަލުގައި ގައުމަށް ކުރިމަތިވެދާނެ އެކި ކަހަލަ ގޮންޖެހުންތަކާ ކުރިމަތިލައި، އެކަންކަމަށް ހައްލު ހޯދުމުގެ ކުޅަދާނަކަން ލިބިގެންވާ ބަޔަކަށް ވުމަށް މަސައްކަތް ކުރުމަށް ދަރިވަރުންނަށް ރައީސް އިލްތިމާސް ކުރެއްވިއެވެ. އަދި ކޮންމެ ދަރިވަރަކުވެސް މަސައްކަތް ކުރަންވީ، ރާއްޖެއަށް ބޭނުންޖެހިފައިވާ ދާއިރާތަކުން އުފެއްދުންތެރި އާ ގޮތްތައް އީޖާދުކުރަން ކަމަށް ރައީސް ސޯލިހު ފާހަގަކުރެއްވިއެވެ.
އިތުރަށް ވާހަކަ ދައްކަވަމުން ރައީސް ވިދާޅުވީ ގައުމު ތަރައްގީ ކުރުމަކީ ޒުވާނުންގެ ކޮޑުގައި އެޅިފައިވާ ވަރަށް މަތީ ޒިންމާއެއް ކަމަށާއި ގައުމަށް އެންމެ އެދެވޭ ތަރައްގީ ގެނެވޭނީ ފެންވަރު ރަނގަޅު ތައުލީމުން ސިކުނޑިތައް މުއްސަނދިވެފައިވާ ޒުވާން ޖީލެއް ބިނާކުރެވިގެންކަމަށެވެ. އަދި ހަޔާތުގައި އެންމެ ކާމިޔާބު މީހަކީ، އިލްމީ ނަޒަރިއްޔާތަކުގައި އަމަލީ ސިފަ ޖައްސަން އެނގޭ މީހާ ކަމަށް ރައީސް ވިދާޅުވިއެވެ.
މި ސަރުކާރުގެ ތަރައްގީ އާއި އިގްތިސާދުގެ ތަސައްވުރު ގުޅިފައިވަނީ، ތައުލީމް ލިބިފައިވާ ހުނަރުވެރި އަދި ފަންނުވެރި އިލްމީ ރައްޔިތެއް ބިނާކުރުމަށް ނަމަވެސް ގައުމަށް ބޭނުންވާ އާ އީޖާދު ތަކާއި އުފެއްދުންތައް ލިބިގެން ނޫނީ ތައުލީމަށް މި ކުރާ ހޭދައިގެ ފޮނިމީރުކަން ބޭނުންވާ މިންވަރަށް ހާސިލް ނުކުރެވޭނެކަމަށް ރައީސްގެ ވާހަކަފުޅުގައި ވިދާޅުވިއެވެ.
