ފަތުރުވެރިކަމުގެ ދާއިރާގެ މަސައްކަތްތެރީންގެ ދަފްތަރުގެ މަސައްކަތް ޖުލައި މަހު ފަށަނީ
9 ޖުލައި 2019 | އަންގާރަ 13:09އިފްތިތާހު ކުރާނީ ޖުލައި މަހުގެ 30 ގައި އޮންނަ ހާއްސަ ހަފްލާއެއްގައި
ޓޫރިޒަމް މިނިސްޓަރު އަލީ ވަހީދު
ފަތުރުވެރިކަމުގެ ސިނާއަތުގައި މަސައްކަތްކުރާ ދިވެހިންގެ ދަފްތަރެއް އެކުލަވާލުމުގެ މަސައްކަތް ކުރަމުން އަންނަ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
ހޯމަ ދުވަހު ޓޫރިޒަމް މިނިސްޓްރީގައި އޮތް ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އަލީ ވަހީދު ވިދާޅުވީ މި މަހުގެ 30 ވަނަ ދުވަހު އެ މިނިސްޓްރީން ބާއްވާ ހާއްސަ ހަފްލާއެއްގައި އެ މަސައްކަތް އިފްތިތާހު ކުރައްވާނެ ކަމަށެވެ.
ޓޫރިޒަމް ދާއިރާގައި މަސައްކަތް ކުރާ މުވައްޒަފުންގެ މައުލޫމާތު ސަރުކާރުން އެކުލަވާލާނީ މަސައްކަތްތެރިން ކުރެން އެ ފަރާތްތަކުގެ މައުލޫމާތު ހޯދައިގެންނެވެ. މިނިސްޓަރ އަލީ ވަހީދު ވިދާޅުވީ މި ދަފްތަރު އެކުލަވާލުމުގެ ބޭނުމަކީ ފަތުރުވެރިކަމުގެ ސިނާއަތުގައި މަސައްކަތް ކުރާ މުވައްޒަފުން ދެނެގަނެ އެ ފަރާތްތަކުން ކުރިން ވަޒީފާ އަދާ ކޮށްފައިވާ ތަންތަނުގެ މައުލޫމާތު އެއްކުރުން ކަމަށެވެ.
ރައީސުލްޖުމްހޫރިއްޔާ އިބްރާޙިމް މުހައްމަދު ސޯލިހުގެ އިސްނެންގެވުމުގެ ދަށުން ފަށާ މަސައްކަތް، އަންނަ އަހަރުގެ މަސައްކަތްތެރިންގެ ދުވަހު (މޭ ޑޭ) ގެ ކުރިން އެއްކޮށް ނިންމާލެވޭނެ ކަމަށް އުއްމީދު ކުރައްވާ ކަމަށް އަލީ ވަހީދު ވިދާޅުވިއެވެ. މި މަސައްކަތް ފަސޭހަ ކުރުމުގެ ގޮތުން ދަފްތަރު އެކުލަވާލުން ފޯނާ ހަމައަށް ގެނެސްދެއްވާނެ ކަމަށް ވެސް އަލީ ވަހީދު ވިދާޅުވިއެވެ.
ފަތުރުވެރިކަމުގެ ސިނާއަތުގެ މަސައްކަތްތެރީންގެ ދަފްތަރެއް އެކުލަވާލުމުގެ މަސައްކަތް މި ސަރުކާރުން އިއުލާން ކޮށްފައި ވަނީ މި އަހަރުގެ މޭ ޑޭ އާއި ގުޅިގެން ކުރެއްވި ޓްވީޓެއްގައި މިނިސްޓަރ އަލީ ވަހީދެވެ.
ފަތުރުވެރިކަމުގެ ދާއިރާގައި މަސައްކަތްކުރާ މީހުންގެ ހައްގުތައް ކަށަވަރުކޮށް ދިނުމަކީ މި ސަރުކާރުގެ މުހިންމު ވައުދެކެވެ. އެގޮތުން މަސައްކަތްތެރީންނަށް ރިސޯޓުތަކުން ދޭންޖެހޭ ސާވިސް ޗާޖު ގަވައިދުން ލިބޭނެ ގޮތް ކަށަވަރުކޮށްދިނުމަކީ، ޖަޒީރާ ރާއްޖެ މެނިފެސްޓޯ އަދި ސަރުކާރު ހިންގާ މައި ޕާޓީ އެމްޑީޕީން މަޖިލިސް އިންތިހާބަށް ހުށައެޅި އެޖެންޑާ 19ގައި ހިމެނިފައިވާ ކަންކަމެވެ.
