އަންނަ ހަފްތާގައި އެލްޖީއޭގެ މެމްބަރުން ކޮމިޓީއަށް ހާޒިރުކުރަން ނިންމައިފި
8 ޖުލައި 2019 | ހޯމަ 07:01ހުށައަޅާފައިވަނީ މައްޗަންގޯޅި އުތުރު ދާއިރާގެ މެމްބަރު މުހައްމަދު ރަޝީދު
ލޯކަލް ގަވަރމަންޓް އޮތޯރިޓީ
ފާއިތުވި ސަރުކާރުން ކައުންސިލަރުންނާމެދު އަޅާފައިވާ ފިޔަވަޅުތަކާ ގުޅޭގޮތުން ސުވާލުކުރުމަށް ލޯކަލް ގަވަރމަންޓް އޮތޯރިޓީ (އެލްޖީއޭގެ) ބޯޑު މެމްބަރުން އަންނަ ހަފްތާގައި މަޖިލީހަށް ހާޒިރުކުރަން މަޖިލީހުގެ ލާމަރުކަޒީ ކޮމިޓީން ނިންމައިފިއެވެ.
ހޯމަ ދުވަހު މަޖިލިސް އިދާރާގައި އޮތް ކޮމިޓީ ބައްދަލުވުމުގައި މި ހުށައެޅުން ހުށައަޅާފައިވަނީ މައްޗަންގޯޅި އުތުރު ދާއިރާގެ މެމްބަރު މުހައްމަދު ރަޝީދެވެ. އެގޮތުން ރަޝީދު ވިދާޅުވީ، ގިނަ އަދަދެއްގެ ކައުންސިލަރުންނާމެދު ފިޔަވަޅު އަޅާފައިވާއިރު، އެ ފިޔަވަޅުތަކާ ގުޅޭ ޔައުމިއްޔާ ބައްދަލުވުމުގެ ތަފްސީލުތައްވެސް ބޭނުންވާ ކަމަށާއި، އެކަންކަމާ ގުޅޭ ތަފްސީލުތައް ހޯދުމަށް އެލްޖީއޭގެ ބޯޑު މެމްބަރުން ހާޒިރު ކުރުމަށް ހުށައަޅުއްވާ ކަމަށެވެ.
އެކަމާ ގުޅޭގޮތުން މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސައިން ވިދާޅުވީ، އެލްޖީއޭއިން ނިންމާފައިވާ ބައެއް ނިންމުންތަކާމެދު ސުވާލު އުފެދޭ ކަމަށާއި، ބައެއް ކައުންސިލަރުންނާމެދު އަޅާފައިވާ ފިޔަވަޅުތަކަކީ އުސޫލުގެ ކޮން މާއްދާއަކާ ގުޅޭގޮތުން އަޅާފައިވާ ފިޔަވަޅުތަކެއްކަންވެސް ސާފު ނުވާ ކަމަށެވެ. އެެގޮތުން 2015 ވަނަ އަހަރުން ފެށިގެން 2018 ވަނަ އަހަރަށް 106 ކައުންސިލަރަކު ސަސްޕެންޑް ކޮށްފައިވާއިރު، އެ ފިޔަވަޅުތަކާ ގުޅޭގޮތުން ދިރާސާކޮށް އިތުރަށް ބެލުމަށް ކުޑަ ކޮމިޓީއެއް ހެދުމަށް ހިސާން ވަނީ ހުށައަޅުއްވާފައެވެ.
ހިސާންގެ ހުށައެޅުމަށް ތާއީދުކޮށް މެމްބަރުން ވަނީ 3 މެމްބަރުންގެ ކޮމިޓީއެއް ފާސްކޮށްފައެވެ. އެ ކޮމިޓީގައި ހިމެނެނީ ތުޅާދޫ ދާއިރާގެ މެމްބަރު ހިސާން ހުސައިންއާއި، މައްޗަންގޯޅި އުތުރު ދާއިރާގެ މެމްބަރު މުހައްމަދު ރަޝީދާއި، އުނގޫފާރު ދާއިރާގެ މެމްބަރު މުހައްމަދު ވަހީދެވެ.
މި ކޮމިޓީން ފިޔަވަޅުތައް ދިރާސާކޮށް ނިމުމުން އަންނަ ހަފްތާގައި އެލްޖީއޭ މެމްބަރުން ހާޒިރު ކުރުމަށް ނިންމާފައިވީ ނަމަވެސް ވަކި ދުވަހެއް ކަނޑައަޅާފައެއް ނުވެއެވެ.
