ލަންކާގެ ޑިފެންސް މިނިސްޓްރީން ހުއްދަ ލިިބުމާއެކު 3 ނޮވެމްބަރު 1988 ވަނަ އަހަރު ދިން އުދުވާނީ ހަމަލާގެ މޭސްތިރިޔާ ހ. ހާޖަރާގޭ އަބްދުﷲ ލުތުފީ، ރާއްޖެ ގެންނާނެ ކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.

މިނިސްޓަރ މިހެން ވިދާޅުވީ ލުތުފީ ރާއްޖެ ގެނައުން ލަސްވެފައިވާތީ، އެކަމާއި ސުވާލު ކުރުމަށް އެ މަނިކުފާނު މަޖިލީހަށް ހާޒިރުކޮށް ނޮޅިވަރަމް ދާއިރާގެ މެމްބަރު މުހައްމަދު އަބްދުﷲ ކުރެއްވި ސުވާލަށް ޖަވާބު ދެއްވަމުންނެވެ.

އެ ސުވާލަށް ޖަވާބުދެއްވަމުން މިނިސްޓަރ ވިދާޅުވީ ލުތުފީ ގެންނަން ލަންކާގެ ކަމާއި ބެހޭ ގިނަ މުއައްސަސާގެ ހުއްދަ ލިބިފައިވާ ކަމަށެވެ. އަދި ހަމައެކަނި މިހާރު ހުއްދަ ލިބިފައި ނުވަނީ ލަންކާގެ ޑިފެންސް މިނިސްޓްރީން ކަމަށް އެމަނިކުފާނު ވިދާޅުވި އެވެ. އިމްރާން ވިދާޅުވީ ލަންކާގެ ޑިފެންސް މިނިސްޓްރީން ހުއްދަ ލިބުނުހާ އަވަހަށް ލުތުފީ ރާއްޖެ ގެންނާނެ ކަމަށެވެ.

މެއި މަހުގެ 1 ވަނަ ދުވަހު ލަންކާގައި ހުންނަ ދިވެހި އެމްބަސީއަށް ގޮސް ލުތުފީ އަމިއްލައަށް "ސަރަންޑަރ" ކުރުމާއެކު އޭނާ ގެނައުމުގެ މަސައްކަތް ފަށާފައިވާ ކަމަށާއި، ނަމަވެސް އެކަމުގައި ލަސްތަކެއް ދިމާވެފައިވަނީ އޭރު ލަންކާ އޮތް ހާލަތުން ކަމަށް މިނިސްޓަރ ވިދާޅުވި އެވެ. އަދި ލުތުފީ އެމްބަސީއާއި ހަވާލުވި ދުވަސްވަރަކީ ލަންކާއަށް ދިން ޓެރަރިސްޓް ހަމަލާއަށްފަހު، އެ ގައުމު ވަރަށް ނާޒުކު ހާލަތެއްގައި އޮތް ދުވަސްވަރެއްކަން މިނިސްޓަރ އިމްރާން ފާހަގަކުރެއްވި އެވެ.

މިނިސްޓަ ވިދާޅުވީ ލުތުފީ ލަންކާއަށް ބޭސް ފަރުވާއަށް ފޮނުވާފައިވަނީ އޭރުގެ މެޑިކަލް ބޯޑާއި، އެހެނިހެން ކަމާއި ބެހޭ ފަރާތްތަކުންވެސް ހުއްދަ ދީގެން ކަމަށެވެ. އޭނާ ފިލާފައިވާތީ، ކަރެކްޝަންސް އިން ކަމާއިބެހޭ ހުރިހާ މުއައްސަސާއަކަށް އޭރު އަންގާފައިވާކަމަށްވެސް މިނިސްޓަރ ވިދާޅުވި އެވެ.

ލުތުފީ ބޭސްފަރުވާއަށް ފޮނުވުމަށް ހުއްދަ ދީފައިވަނީ އޭރުގެ މެޑިކަލް ބޯޑުން، 2010 ވަނަ އަހަރުގެ ޖެނުއަރީ މަހުގެ 16 ވަނަ ދުވަހުއެވެ.

ބުރާސްފަތި ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެފައިވަނީ، ލަންކާގެ ކަމާއި ބެހޭ އިދާރާތަކުގެ ހުއްދަ ލިބުނުހާ އަވަހަށް ލުތުފީ ރާއްޖެ ގެނެސް ޖަލަށް ލެވޭނެ ކަމަށެވެ. ރައީސް ވިދާޅުވީ ލުތުފީ ޚާއިނެއް ކަމަށާއި، އޭނާ އަށް މާފެއް ނޯންނާނެ ކަމަށެވެ.