ސަރުކާރާއި، ރައްޔިތުންގެ މަޖިލީސް ގުޅިގެން މަސައްކަތްކުރާނެގޮތާއިމެދު މަޝްވަރާކޮށްފި
4 ޖުލައި 2019 | ބުރާސްފަތި 06:37އެ ބައްދަލުވުމަކީ އެމްޑީޕީގެ ޕީޖީއަށް މެމްބަރުން އިންތިހާބުވުމަށްފަހު ބޭއްވި ފުރަތަމަ ބައްދަލުވުން
ރައީސުލްޖުމްހޫރިއްޔާ އެމްޑީޕީގެ ޕާލަމެންޓަރީ ގްރޫޕުގެ ލީޑަރުންނާއި ބައްދަލުކުރެއްވުން
ސަރުކާރުގެ ސިޔާސަތުތައް ތަންފީޒު ކުރުމުގައި ސަރުކާރާއި ރައްޔިތުންގެ މަޖިލީހުގެ މެންބަރުން ގުޅިގެން މަސައްކަތްތައް ކުރިޔަށްގެންދާނެ ގޮތްތަކާއި ގުޅޭގޮތުން މަޝްވަރާކޮށްފި އެވެ.
މި މަޝްވަރާތައް ކުރިއަށްގެންގޮސްފައިވަނީ ރައީސް އިބްރާހިމް މުހައްމަދު ސޯލިހާއި، އެމްޑީޕީގެ ޕާލިމެންޓްރީގެ ގުރޫޕްގެ ލީޑަރުންނާއެކު ބޭއްވި ބައްދަލުވުމުގަ އެވެ. އެ ބައްދަލުވުމަކީ އެމްޑީޕީގެ ޕީޖީއަށް މެމްބަރުން އިންތިހާބުވުމަށްފަހު ބޭއްވި ފުރަތަމަ ބައްދަލުވުމެވެ.
އެ ބައްދަލުވުމުގައި ޕީޖީ ލީޑަރު ކަމަށް ހޮވިވަޑައިގެންފައިވާ އަލީ ޢާޒިމާއި، ޑެޕިއުޓީ ލީޑަރުންގެ ގޮތުގައި ހޮވިވަޑައިގެންފައިވާ ހެންވޭރު ދެކުނު ދާއިރާގެ ޙުސައިން ޝަހީމާއި، ހުޅުދޫ ދާއިރާގެ މެމްބަރު އިލްޔާސް ލަބީބު އަދި ޕީޖީ ގުރޫޕުގެ އަމީން އާއްމު ކަމުގެ މަގާމަށް ހޮވިވަޑައިގެންފައިވާ އަލިފުށީ ދާއިރާގެ މެމްބަރު މުޙައްމަދު ރަޝީދު ޙުސައިން ބައިވެރިވެ ވަޑައިގެންނެވިއެވެ.
ރައީސް އޮފީހުން ބުނީ އެ ބައްދަލުވުމުގައި ސަރުކާރުގެ ސިޔާސަތުތައް ތަންފީޒު ކުރުމުގައި މަޖިލީހާ ގުޅިގެން މަސައްކަތްކުރާނެގޮތްތަކާއި ގުޅެގޮތުން މަޝްވަރާކުރެވުނު އިރު، ސަރުކާރުގެ ވައުދުތައް ފުއްދުމަށް ފާސްކުރަންޖެހޭ ޤާނޫނުތައް ފާސްކުރުމާއި ގުޅޭގޮތުންވެސް މަޝްވަރާކުރެވުނު ކަމަށެވެ. އަދި އެމްޑީޕީ ޕާލިމެންޓްރީ ގުރޫޕްގެ މަސައްކަތްތައް ރޭވިފައިވާގޮތް ޕީޖީ ގުރޫޕުން ރައީސާ ހިއްސާކުރެއްވި އެވެ.
ވެރިކަމަށް އިންތިހާބުވެވަޑައިގެންނެވުމާއި ހަމައަށް 18 ވަނަ މަޖިލީހުގައި އެމްޑީޕީ ޕީޖީ ލީޑަރުކަން ކުރެއްވީ ރައީސް އިބްރާހިމް މުހައްމަދު ސޯލިހް އެވެ. އެމަނިކުފާނު ވަނީ ކޯލިޝަންގެ ޖޮއިންޓް ޕާލިމެންޓްރީ ގުރޫޕްގެ ލީޑަރުކަންވެސް ކުރައްވާފަ އެވެ.
