ކުރީގެ ސަރުކާރުގައި ޕަބްލިކް ސާރވިސް މީޑިއާ (ޕީއެސްއެމް) އިން ހިންގި ބައެއް މަޝްރޫތަކުގައި ކޮރަޕްޝަނަށް މަގުފަހިވާ ގޮތަށް ހުރި ބައެއް މައްސަލަތައް އޭސީސީއަށް ހުށަހަޅާފައިވާތާ 5 މަހަށްވުރެ ގިނަ ދުވަސް ވެފައިވާ ކަަމަށް ޕީއެސްއެމްއިން ބުނެފިއެވެ.
ޕީއެސްއެމްގެ ލިޔެކިއުންތައް ގަސްދުގައި ނައްތާލާފައިވާ ކަމަށް އަންގާރަ ދުވަހު އޮތް ރައްޔިތުންގެ މަޖިލީހުގެ ސްޓޭޓް އެންޓަޕްރައިޒް ކޮމިޓީ (އެސްއޯއީ ކޮމެޓީ) ގައި އޭސީސީގެ ނައިބު ރައީސް މުއައްވިޒް ރަޝީދު ވިދާޅުވެފައިވަނިކޮށް ޕީއެސްއެމްއިން ނެރުނު ބަޔާނެއްގައި ބުނީ، ކުރީގެ ސަރުކާރުގައި އެ ކުންފުނިން ހިންގި ބައެއް މަޝްރޫތަކުގައި ކޮރަޕްޝަނަށް މަގުފަހިވާ ގޮތަށް ހުރި ބައެއް މައްސަލަތައް އޭސީސީއަށް ހުށަހަޅާފައިވާތާ 5 މަހަށްވުރެ ގިނަ ދުވަސް ވެފައިވާ ކަަމަށެވެ. އަދި އޭސީސީގެ މެމްބަރުންގެ މަސްލަހަތު ފުށުނާރާ ގޮތަކަށް އަދި އިންސާފުގެ މަގުން އެއްކިބާ ނުވެ އެ މައްސަލަތައް ބެލިދާނެ ކަމަށް ޤަބޫލު ނުކުރާ ކަމަށްވެސް ޕީއެސްއެމްގެ ބަޔާނުގައި ބުނެފައިވެއެވެ.
އޭގެ އިތުރުން، މިހާރުގެ މެނޭޖްމަންޓުން އެ މައްސަލަތައް އޭސީސީއަށް ހުށައެޅީ ކުންފުނީގެ އިންޓާރނަލް އޮޑިޓަކަށް ފަހު އިތުރަށް ބަލަންޖެހޭ ސީރިއަސް މައްސަލަތަކެއް ހުރިކަން ކުންފުންޏަށް ފާހަގަކުރެވިފައިވާތީ ކަމަށްވެސް ބަޔާނުގައި ބުނެފައިވެއެވެ.
ޕީއެސްއެމް އިން އެހެން ބުނެފައިވާއިރު، އެސްއޯއީ ކޮމިޓީގައި މެމްބަރަކު ކުރި ސުވާލަކަށް ޖަވާބު ދެއްވަމުން މުއައްވިޒު ވިދާޅުވެފައިވަނީ ކުންފުނިތަކުގައި ހުންނަން ޖެހޭ ބައެއް ކަހަލަ ލިޔެކިއުންތައް ނެތް ކަމަށާއި، މިހާރު ތަހުހީގު ކުރަމުންދާ މައްސަލަތަކަށް ބަލާއިރު ޕަބްލިކް ސާވިސް މީޑިއާގައި ހުންނަން ޖެހޭ ވަރަށް ގިނަ ލިޔެކިއުންތަކެއް ނެތްކަން ފާހަގަ ކުރެވޭ ކަމަށެވެ.
އެކަމާ ގުޅޭގޮތުން ޕީއެސްއެމް އިން ބުނީ، އޭސީސީއަށް ބޭނުންވާ ތަހުޤީޤީ ލިއެކިއުންތައް ގުޅުންހުރި ޑިޕާރޓްމަންޓްތަކުން ހޯދޭނެ އިންތިޒާމް ޕީއެސްއެމްއިން ހަމަޖައްސާފައިވާނެ ކަމަށާއި، ޕީއެސްއެމްގެ ކަމާ ގުޅޭ މުވައްޒަފުންގެ ކޮމްޕިއުޓަރތަކުގެ ހާރޑްޑިސްކްތަކާއި، އީމެއިލް މުއާމަލާތްތައްވެސް ފޯރުކޮށްދީފައިވާނެ ކަމަށެވެ. ވުމާއެކު ތަހުގީގަށް ހުރަސް އެޅިފައިވާ ކަމަށް އޭސީސީން މަޖިލީހުގައި ހާމަކުރުމަކީ މައްސަލަ ނުބަލައި ފައިލް ކުރުމުގެ ނިޔަތުގައި ހިންގި އަމަލެއް ކަމަށް ގަބޫލު ކުރުމުގެ ފުރުސަތު އޮތް ކަމަށްވެސް ޕީއެސްއެމްގެ ބަޔާނުގައި ވަނީ ބުނެފައެވެ.
