ޑެނިސް ސުއަރޭޒް ސެލްޓަ ވިގޯއަށް ސޮއިކޮށްފި

އާސެނަލްއަށް ކުޅެމުން އަންނަ ސްޕެއިންގެ އެޓޭކިންގް މިޑްފިލްޑަރ ޑެނިސް ސުއަރޭޒް ސެލްޓަ ވިގޯއަށް ސޮއިކޮށްފިއެވެ.

ބާސާއާއެކު ސުއަރޭޒް ހަދާފައިވާ އެއްބަސްވުން 2021 ވަނަ އަހަރު ހަމަވާއިރު، އޭނާ ސެލްޓަވިގޯއަށް ސޮއިކޮށްފައިވަނީ 13 މިލިއަން ޔޫރޯގެ އަގަކަށެވެ.

ކުރިޔަށް އޮތް ސީޒަނަށް ގިނަ ކްލަބްތަކުން ފާރަލަމުންދިޔަ ސުއަރޭޒް ހޯދުމަށް ނަޕޯލީންވެސް ވަނީ މަސައްކަތްކޮށްފައެވެ. އަދި އޭނާ ހޯދުމަށް މިދިޔަ ޖެނުއަރީ ޓްރާންސްފާގައިވެސް ގިނަ ކްލަބްތަކުން މަސައްކަތް ކުރިއެވެ.

މެންޗެސްޓާ ސިޓީން 2011 ވަނަ އަހަރުގެ ސީޒަނުގައި ސީނިއާ ކެރިޔަރު ފެށި ސުއަރޭޒް ވަނީ ސެވިއްޔާ އަދި ވިޔަރެއާލް އަށް ކުޅެފައެވެ. އޭނާ ވަނީ ބާސާ އަށް މިހާތަނަށް ކުޅުނު 71 މެޗުގައި 8 ލަނޑު ވެސް ކާމިޔާބުކޮށްފައެވެ. އަދި ސުއަރޭޒް ވަނީ އާސެނަލްއަށް ބަދަލުވެ އެޓީމަށް ހަ މެޗު ކުޅެފައެވެ.

ބާސާއާ އެކު ސްޕެނިޝް ލަލީގާ އެއްފަހަރު، ކޮޕާ ޑެލްރޭ ދެފަހަރު އަދި ދެ ސްޕެނިޝް ސުޕާ ކަޕް ކާމިޔާބުކޮށްފައިވާ ސުއަރޭޒް ވަނީ ސެވިއްޔާއާ އެކު ޔޫރޮޕާ ލީގު ވެސް ކާމިޔާބުކޮށްފައެވެ.

ސްޕެއިންގެ 19 އަހަރުން ދަށުގެ ޓީމާއެކު 2012 ވަނަ އަހަރު ޔޫރޯ ކާމިޔާބު ކޮށްފައިވާ ސުއަރޭޒް ވަނީ ސްޕެއިންގެ އުމުރުފުރާތަކުގެ ޓީމުތަކުގެ އިތުރުން ސީނިއާ ޓީމަށް ވެސް ކުޅެފައެވެ.