ޑިގްރީ ކޯސްތަކުގެ އިތުރުން ދަށް ލެވަލްގެ ކޯސްތަކަށް ހިލޭ ކިޔެވޭނެ ގޮތް ހަދަންޖެހޭ: އެމްއެންޔޫ
1 ޖުލައި 2019 | ހޯމަ 10:36އެއީ ކިޔެވުމަށް ދަށް ކުދިންނަށް ވެވޭ ބޭއިންސާފެއް
އެމްއެންޔޫގެ ލެކްޗަރާ އަޒީޒާ އަފީފު ކޮމެޓީގައި ވާހަކަދައްކަވަނީ
ޑިގްރީ ކޯސްތަކުގެ އިތުރުން ދަށް ލެވަލްގެ ކޯސްތަކަށް ހިލޭ ކިޔެވޭނެ ގޮތަށް އިސްލާހު ހުށަހަޅާ ދިނުމަށް ދިވެހި ރާއްޖޭގެ ގައުމީ ޔުނިވަރސިޓީ (އެމްއެންޔޫއިން) އެދެފިއެވެ.
ޔުނިވަރސިޓީން މިކަމަށް އެދިފައިވަނީ ޔުނިވަރސިޓީގެ ގާނޫނަށް އިސްލާހު ގެނައުމުގެ ބިލް ދިރާސާ ކުރަމުން އަންނަ ގައުމީ ތަރައްގީއާއި ތަރިކައިގެ ކޮމިޓީގައި ބައްދަލުވުމުގައެވެ.
ކޮމެޓީގައި ވާހަކަދައްކަވަމުން އެމްއެންޔޫގެ ލެކްޗަރާ އަޒީޒާ އަފީފު ވިދާޅުވީ އޭލަވަލްއާ، ޑިގްރީ ކޯސް ހިލޭ ސަރުކާރުން ކިޔަވާދޭއިރު މިއީ ކިޔެވުމަށް ދަށް ކުދިންނަށް ވެވޭ ބޭއިންސާފެއް ކަމަށެވެ.
އަޒީޒާ ވިދާޅުވީ ޑިގްރީ ކޯހުގައި ބައިވެރިވެވެނީ އޭލަވަލްގައި އެންމެ ދަށްވެގެން 3 ފާސް ލިބޭ ދަރިވަރުން ކަމަށާއި، އޭލަވަލް ނުކިޔަވާ ނުވަތަ އޯލަވަލް ނިންމާފައި މަތީ ތައުލީމަށް ކިޔަވަން ބޭނުންވާ ދަރިވަރުން ފައުންޑޭޝަން ނުވަތަ ސެޓްފިކެޓް ލެވަލް ކޯހަކުން ފެށި ނަމަވެސް ކޯސް ފީ ދައްކަން ޖެހޭ ކަމަށެވެ. އަދި އެއީ ދަރިވަރުންގެ މެދުގައި ކުރެވޭ ވަރަށް ބޮޑު ފަރަގެއް ކަމަށް އޭނާ ވިދާޅުވި އެވެ.
މީގެ އިތުރުން އަޒީޒާ ވިދާޅުވީ ޑިގްރީ ހިލޭ ކިޔަވާދޭއިރު، އެފުރުސަތު ސަރުކާރުގެ ދެ ޔުނިވަރސިޓީއަށް އެކަނި ދިނުމުން ކޯސްތަކަށް ދަރިވަރުން ނުލިބިގެން ނުވަތަ ކޯސްތައް ނުހިންގިގެން އުޅެން ނުޖެހޭ ކަމަށެވެ.
ބިލް ދިރާސާ ކުރުމަށްފަހު ކޮމެޓީގެ ރިޕޯޓު މިމަހުގެ 9 ވަނަ ދުވަހު މަޖިލީހުގެ ތަޅުމަށް ފޮނުވަން ޖެހެއެވެ. މީގެ އިތުރުން ޔުނިވަރސިޓީގެ އިސްލާހަށް އާންމުންގެ ހިޔާލު ހޯދުމަށް ވެސް ހުޅުވާލިއެވެ. އެފުރުސަތު އާދިއްތަ ދުވަހުގެ ނިޔަލަށް ވަނީ ހަމަވެފައެވެ.
