ބްރޯޑްކާސްޓިން ކޮމިޝަންގެ މެމްބަރުކަމުން ހަސަން ނަބާހު ވެސް އިސްތިއުފާ ދެއްވައިފި އެވެ.
ރާއްޖެ.އެމްވީ އަށް ނަބާހު ވިދާޅުވީ، އޭނާ އިސްތިއުފާދެއްވީ މިހާރުގެ ހާލަތަށް ބަލާފައި އެއީ އެންމެ ރަނގަޅުގޮތް ކަމަށް ފެނުމުން ކަމަށެވެ. އިތުރު ސަބަބެއް އޭނާ ހާމައެއް ނުކުރެވެއެވެ.
ބްރޯޑްކާސްޓިން ކޮމިޝަންގެ މެމްބަރުންނަށް ސިޔާސީ ގޮތުން އެއްވެސް ނުފޫޒެއް ފޯރަފައިވޭތޯ ރައްޔިތުންގެ މަޖިލީހުގެ މިނިވަން މުއައްސަސާ ކޮމިޓީގައި މެމްބަރުން ކުރިމަތި ކުރި ސުވާލަކަށް ޖަވާބުދެމުން ނަބާހު ވިދާޅުވެފައިވަނީ، އޭނާ އަށް ސިޔާސީ ގޮތުން އެއްވެސް ނުފޫޒެއް ފޯރާފައިނުވާ ކަމަށެވެ. އެހެން ނަމަވެސް އޭނާ އަކީ ވިލިމާލޭ ދާއިރާގެ ކުރީގެ މެމްބަރު ނިހާން ހުސައިން މަނިކުއާ ގާތްގުޅުމެއް އޮންނަ މީހެއް ކަމަށް ނަބާހް ވިދާޅުވި އެވެ.
ނަބާހު އިސްތިއުފާ ދީފައިވާއިރު، ބްރޯޑްކޮމްގެ ކުރީގެ މެމްބަރު ސޮފްވާން ވަނީ އޭނާ މަގާމުން ވަކިކުރުމަށް މަޖިލީހަށް ހުށައަޅާފައި ވަނިކޮށް އަމިއްލައަށް ވަނީ އިސްތިއުފާދެއްވާފައެވެ.
ކޮމިޝަންގެ މެމްބަރު ޒޭނާ ވަކިކުރުމަށްވެސް ވަނީ ހުށައަޅާފައެވެ.
