ކޮރަލް ބުލިވާޑް ޕްރޮޖެކްޓަށް ފައިސާ ދައްކާފައި ވަނީ އެންމެ ނުވަ ފަރާތުން: ހައުސިން މިނިސްޓްރީ
27 ޖޫން 2019 | ބުރާސްފަތި 12:32އެވްރެޖްކޮށް އެޕާޓްމަންޓްތަކަށް އެ ނުވަ ފަރާތުން ދައްކާފައިވަނީ 315،350 ޑޮލަރު
ކޮރަލް ބުލިވާޑް އިފްތިތާހުކުރުމުގެ ރަސްމިއްޔާތުގެ ތެރެއިން
ރައީސް ޔާމިންގެ ސަރުކާރުގައި ސިންގްޕޫރުގެ ޗަންގ ހުއާ ކޮންސްޓްރަކްޝަން ކުންފުނިން ތަރައްގީކުރަން ފެށި ކޮރަލް ބުލިވާޑް މަޝްރޫއުގެ ދަށުން އެޕާޓްމަންޓްތައް ގަތުމަށް ފައިސާ ދައްކާފައިވަނީ އެންމެ ނުވަ ފަރާތުން ކަމަށް ހައުސިން މިނިސްޓްރީން ހާމަކޮށްފިއެވެ.
ކޮރަލް ބުލިވާޑް މަައްސަލައިގައި މީޑިއާތަކަށް މައުލޫމާތު ދެއްވަމުން ހައުސިން މިނިސްޓަރ އާތިފާ ޝަކޫރު ވިދާޅުވީ، އެޕާޓްމަންޓު ގަތުމަށް ހިންގާފައިވާ މުއާމަލާތްތަކުގެ އެވްރެޖް އަގަކީ 315،350 ޑޮލަރެވެ. އަދި ޑައުން ޕޭމަންޓްގެ ގޮތުގައި 9 ފަރާތަކުން އެވްރެޖްކޮށް 104،500 ޑޮލަރު ދައްކާފައިވާ ކަމަށް ވެސް މިނިސްޓަރ ވިދާޅުވިއެވެ.
މިނިސްޓަރ އާތިފާ ވިދާޅުވީ މީޑިއާތަކުގައި މިތަންތަނަށް ފައިސާ ދެއްކި ފަރާތްތަކުން ބަދަލު ހޯދަން އެދިފައިވާ ކަމަށް ރިޕޯޓްކޮށްފައި ވިޔަސް، އަދި މިހާތަނަށް މިނިސްޓްރީއަށް އެކަހަލަ އެއްވެސް ޝަކުވާއެއް އައިސްފައި ނުވާކަމަށެވެ. އެފަދަ ހާލަތެއް މެދުވެރިވެއްޖެ ނަމަ، މިނިސްޓްރީން މެދުވެރިވެގެން އެ ފަރާތްތަކުން ބޭނުންވާ ގޮތަށް އެކަަން ނިންމަން މަސައްކަތްކުރާނެ ކަމަށް ވެސް އޭނާ ވިދާޅުވިއެވެ.
މި މަޝްރޫއާ ގުޅޭގޮތުން ޑިވެލޮޕަރާއެކު އެންމެ ފަހުން ކުރެވުނު މަޝްވަރާތަކަށް އަލި އަޅުވާލާ، މިނިސްޓަރ އާތިފާ ވިދާޅުވީ 25 މާޗް 2019 ގައި ޑިވެލޮޕަރާ އެކު އެއްބަސްވެވުނު ޓައިމްލައިނާ އެއްގޮތަށް މަޝްރޫއަށް ހިނގާފައިވާ ހަރަދުގެ ތަފްސީލް ހުށައެޅުމަށް އިތުރު ދެ ހަފުތާ ދިނުމަށް އެ ފަރާތުން އެދިވައިކަމަށެވެ. މިހާތަނަށް ކުރަވިފައިވާ މަސައްކަތްތަކަށް ބަލާއިރު، އެ މަޝްރޫއުގެ ދަށުން ތަރައްގީކުރަން ނިންމާފައިވާ 28 ބުރީގެ 4 ޓަވަރުގެ ތެރެއިން ޓަވަރ 1 ގެ ފައުންޑޭޝަންގެ މައިކްރޯޕައިލްސްގެ 13 އިންސައްތަ މަސައްކަތް ވަނީ ނިމިފައެވެ. އެހެން އެއްވެސް ޓަވަރެއްގެ މަސައްކަތް އަދި ފަށާފައެއް ނުވެއެވެ.
ސަރުކާރުން މާލޭ ތޮއްޖެހުމުގެ މައްސަލައަށް ހައްލެއް ގެންނަން ކަމަށް ބުނެ ހުޅުމާލެއަށް މި މަޝްރޫއު ބަދަލުކުރަން ނިންމީ 25 ފެބްރުއަރީ 2019 ގައެވެ. އަދި ސަރުކާރުގެ ނިންމުމާއި އެއްގޮތަށް ކޮރަލް ބުލިވާޑް ތަރައްގީކުރާ ޑިވެލޮޕަރަށް މިނިސްޓްރީއާ އެޗްޑީސީއާ ގުޅިގެން އެ މަސައްކަތް ކުރިޔަށް ގެންދިޔުމަށް ކުންފުންޏަށް އަންގާފައިވެއެވެ. މިނިސްޓަރ އާތިފާ ވިދާޅުވީ މިހާތަނަށް އެ ކުންފުނިން ހުޅުމާލެއަށް މަޝްރޫއު ބަަދަލުކުރުމާ ދެކޮޅު ހަދާފައި ނުވާކަމަށެވެ.
މި މަޝްރޫއު ކުރިޔަށް ގެންދަން ހުޅުމާލެއިން 129000 އަކަ ފޫޓުގެ ބިމެއް މި މަހުގެ 18 ވަނަ ދުވަހުގެ ތެރޭގައި ހަމަޖައްސާފައިވެއެވެ. ޑިވެލޮޕަރު އަދި މިތަނުގައި މަޝްރޫއު ހިންގުމާ މެދު ގޮތެއް ނިންމާފައި ނުވާއިރު، ސަރުކާރުން މާލީ ބުރަ އުފުލަން ޖެހުނު ކަމުގައިވީ ނަމަވެސް މި މަޝްރޫއު މާލޭގައި ކުރިޔަށް ގެންދަން ހުއްދައެއް ނުދޭނެ ކަމަށް މިނިސްޓަރ އާތިފާ ވިދާޅުވިއެވެ. މާލެއިން ދިން ސަރަހައްދަށް ވުރެ ބޮޑު ސަރަހައްދެއް ހުޅުމާލެއިން ދޭން ނިންމީ އެތަނުގައި ހެދިފައިވާ ގަވައިދުތަކުން އެންމެ އުހަށް ވެސް 15 ބުރިޔަށް އިމާރާތް އެޅޭތީއެވެ. މާލެއިން އެ ކުންފުންޏަށް ދިނީ 70000 އަކަ ފޫޓުގެ ބިމެކެވެ.
ކޮރަލް ބުލިވާޑް އެޕާޓްމަންޓަކީ މާލޭ ރަސްފަންނު ސަރަހައްދުގައި، މިކްސްޑް ރެޒިޑެންޝަލް ޕާރޕަސްއަށް ތަރައްގީ ކުރަން ނިންމި އިމާރާތްތަކެކެވެ. އެގޮތުން ހައިއެންޑް އެޕާޓްމަންޓާއި ވިޔަފާރީގެ ބޭނުމަށާއި އޮފީސް ވެސް ހިމެނޭގޮތަށް ތަރައްގީކޮށް ނިންމަން އޭރު އެއްބަސްވެވުނީ ތިން އަހަރު ދުވަހުގެ ތެރޭގައެވެ.
