ޕޯސްޓް މެދުވެރިކޮށް އެތެރެކުރަން އުޅުނު މަސްތުވާތަކެތި އަތުލައިގެންފި
27 ޖޫން 2019 | ބުރާސްފަތި 09:35މިތަކެތި އަތުލައިގެންފައިވަނީ ޕާރުސަލްތައް ބަލައި ފާސްކުރުމުގެ ތެރޭގައި
ފުލުހުންގެ ބެލުމުގެ ދަށުގައި ކުރިން ހުރި ބައެއް މަސްތުވާތަކެތި
ޕޯސްޓްގެ ޒަރިއްޔާއިން ރާއްޖެ އެތެރެކުރަން އުޅުނު މަސްތުވާތަކެތި ކަސްޓަމްސް އިން އަތުލައިގެންފިއެވެ.
މިތަކެތި އަތުލައިގެންފައިވަނީ ޕާރުސަލްތައް ބަލައި ފާސްކުރުމުގެ ތެރޭގައި ކަމަށް ކަސްޓަމްސް އިން މައުލޫމާތު ދެއެވެ.
މިމަހުގެ 13 ވަނަ ދުވަހާއި 19 ވަނަ ދުވަހު އަތުލައިގެންވާ މި ތަކެއްޗަކީ ތިން ގައުމަކުން އެތެރެކުރަން އުޅުނު މަސްތުވާތަކެއްޗެވެ.
އެއީ ތުރުކީ ވިލާތާއި، އިނގިރޭސި ވިލާތް އަދި ސްރީލަންކާއިން އެތެރެކުރަން އުޅުނު މަސްތުވާ ތަކެއްޗެވެ.
އަތުލައިގެންފައިވަނީ ކެނަބިސް އާއި އައިއެމްޑީއެމްއޭ (އެކްސްޓެސީ) އެވެ.
ޖުމްލަ 132 ގްރާމްގެ މި މަސްތުވާތަކެއްޗާއި އެކު މި މައްސަލަ އިތުރަށް ތަހުގީގު ކުރުމަށް ފުލުހުންނާއި ހަވާލު ކުރެވިފައިވާ ކަމަށް ކަސްޓަމްސް އިން މައުލޫމާތު ދެއެވެ.
