ޤައިދީންނަށް އަނިޔާ ކުރާ ކަމަށް ބުނެ ފަސް ފަރާތަކުން މައްސަލަ ހުށައަޅާފައިވޭ: އެޗްްއާރްސީއެމް
25 ޖޫން 2019 | އަންގާރަ 07:13ކޮމިޝަނުގެ ރެޕިޑް ރެސްޕޮންސް ޓީމާއި، ތަހުޤީޤު ޓީމުން މަސައްކަތް ކޮށްފައިވޭ
މާފުށީ ޖަލު
މާފުށީ ޖަލުގެ ޤައިދީންނަށް އަނިޔާ ކުރާ ކަމަށް ބުނެ ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އަށް މިހާތަނަށް ފަސް ފަރާތަކުން މައްސަލަ ހުށައަޅާފައިވާ ކަމަށް އެ ކޮމިޝަނުން ބުނެފިއެވެ.
މާފުށީ ޖަލު ބަލަހައްޓާ އޮފިސަރުންނާ ޤައިދީންނާ ދެމެދުގައި ހަމަނުޖެހުންތަކެއް ހިނގާފައިވާއިރު، އެކަމާ ގުޅޭ ގޮތުން އެ ކޮމިޝަނުން ނެރުނު ބަޔާނެއްގައި ބުނީ، މާފުށީ ޖަލު ބަންދުގައި ތިބި މީހުންނަށްް އަނިޔާ ކުރާ ކަމަށް ބުނެ، ފަސް ފަރާތަކުން ކޮމިޝަނުގެ ހޮޓްލައިން އަށް ގުޅާ މައްސަލަ ހުށައަޅާފައިވާ ކަމަށާއި، ވަރަށް ހައްސާސް މައްސަލަތަކެއްގެ ގޮތުގައި އެ މައްސަލަތައް ބަލަމުން އަންނަ ކަމަށެވެ.
އެގޮތުން މާފުށީ ޖަލުގައި ހިނގި ކަންތައްތަކުގެ މައުލޫމާތު ކޮމިޝަނަށް ލިބުމާ އެކު، އެންޓި ޓޯޗަރ ޤާނޫނާއި، އދ. ގެ އެންޓި ޓޯޗަރއާ ގުޅޭ ކޮންވެންޝަންތަކުން ކޮމިޝަނާ މަތިކޮށްފައިވާ ޒިންމާތައް އަދާ ކުރުމަށް ކުރާ މަސައްކަތްތަކުގެ ދަށުން ކޮމިޝަނުގެ ރެޕިޑް ރެސްޕޮންސް ޓީމާ، ތަހުޤީޤު ޓީމުން މަސައްކަތް ކޮށްފައިވާ ކަމަށް ކޮމިޝަނުން ބުނެފައި ވެއެވެ.
ކޮމިޝަނުން އިތުރަށް ބުނީ، ކޮމިޝަނުން އިސްނަަގައިގެން އެ މައްސަލަ ތަހުޤީޤު ކުރަމުންދާ ކަމަށާއި، ޖަލުގައި ހިނގާދިޔަ ހަމަނުޖެހުންތަކާ ގުޅިގެން ކޮމިޝަނުން ކޮށްފައިވާ މަސައްކަތްތަކާ ގުޅޭ ރިޕޯރޓް ހޯމަ ދުވަހު މަޖިލިސް އިދާރާއަށް ހިއްސާކޮށްފައިވާނެ ކަމަށެވެ.
ކޮމިޝަނުން އެހެން ބުނެފައިވާއިރު، އަންގާރަ ދުވަހުގެ ރޭ މާފުށީ ޖަލުގައި ހަމަނުޖެހުންތަކެއް ހިނގައި ގައިދީން ތިބި ގޮޅިތަކަކަށް ކަރުނަ ގޭސް ޖަހާފައިވާ ކަމަށް މީޑިއާގައި ދަނީ ރިޕޯޓް ކުރަމުންނެވެ. އަދި ކަރުނަ ގޭސް ޖެހީ އެސްއޯ ފުލުހުން ކަމަށް ބައެއް މީޑިއާތަކުން ވަނީ ރިޕޯޓް ކޮށްފައެވެ.
