ގިނަ އަދަދެއްގެ ތޫނު ހަތިޔާރާ މަސްތުވާތަކެއްޗާ އެކު، ސ. މަރަދޫއިން ދެ މީހަކު ހައްޔަރު ކޮށްފައިވާ ކަމަށް ފުލުހުން ބުނެފިއެވެ.

ފުލުހުން ބުނީ ހަތިޔާރުތައް ފެނިފައިވަނީ، ތޫނު ހަތިޔާރު ގެންގުޅޭ ކަމަށް ފުލުހުންނަށް ލިބުނު މައުލޫމާތަކާއި ގުޅިގެން ހޯމަ ދުވަހު 11:30 ހާއިރު ހިންގި އޮޕަރޭޝަނެއްގައި، ކޯޓު އަމުރެއްގެ ދަށުން ގެއެއް ބަލާ ފާސްކުރަނިކޮށް ކަމަށެވެ.

މި މައްސަލައާއި ގުޅިގެން ހައްޔަރު ކޮށްފައިވަނީ 18 އަހަރުގެ މީހަކާއި 23 އަހަރުގެ މީހެކެވެ. ފުލުހުން ފާސްކުރި ގެއިން ފެނުނު ހަތިޔާރުގެ ތެރޭގައި ކަނޑިއަކާއި، ތިން ވަޅި، ތިލަ އަދި ޕޮކެޓް ވަޅި ހިމެނެއެވެ. އަދި މަސްތުވާ ތަކެތި ކަމަށް ޝައްކު ކުރެވޭ އެއްޗެއް ހުރި ހަ ޕެކެޓު ވެސް ފެނިފައިވާ ކަމަށް ފުލުހުން ބުނެފައިވެއެވެ.

އެގެއިން އިންޖެކްޝަނާއި މާސްކެއް ވެސް ފެނިފައިވާ ކަމަށް ފުލުހުން ބުނެފައިވެއެވެ. ފުލުހުން ދަނީ އިތުރަށް މި މައްސަލަ ތަހުގީގު ކުރަމުންނެވެ.