ކަރެކްޝަނަލް ސާވިސްއަކީ ގޭންގެއް ގޮތަށް ހަރަކާތްތެރިވާ ތަނެއް: ހަސީން
24 ޖޫން 2019 | ހޯމަ 03:32ފޯނާ އެއްޗެހި ޖަލަށް ވެއްދެނީ ގައިދީންގެ އެއްބާރުލުމާއެކު
މަޝްހޫރު ގާނޫނީ ވަކީލް އަބްދުﷲ ހަސީން
މޯލްޑިވްސް ކަރެކްޝަނަލް ސާވިސްއަކީ ގޭންގެއް ގޮތަށް ހަރަކާތްތެރިވާ ތަނެއް ކަމަށް މަޝްހޫރު ގަނޫނީ ވަކީލް އަބްދުﷲ ހަސީން ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަދައްކަވަމުން ހަސީން ވިދާޅުވީ، ވަރަށް ހިތާމަކުރައްވާ ކަމަށާއި، ނަމަވެސް ކަރެކްޝަންސްއަކީ ގޭންގެއްގެ ގޮތުގައި ހަރަކާތްތެރިވާ ތަނެއް ކަމަށެވެ. އަދި ޖަލުގައި ތިބޭ މީހުން އަތުގައި ފޯނުފަދަ މަނާ ތަކެތި ހުންނަ ކަމަށާއި، އެތަކެތި އެތެރެވަނީ ޖަލު އޮފިސަރުންގެ އެހީތެރިކަމާއެކުގައި ކަމަށް ހަސީން ތުހުމަތުކުރެއްވި އެވެ. އަދި ޖަލުގެ ކަންތައް ބެލެހެއްޓޭނެ ރަނގަޅު ނިޒާމެއްވެސް ނެތް ކަމަށް އޭނާ ވިދާޅުވި އެވެ.
ހަސީން ވިދާޅުވީ، ޖަލުގައި އަނިޔާކުރުމަކީ އޮތް ސަގާފަތެއް ކަމަށާއި، އެ ސަގާފަތް ނައްތާލަން މަސައްކަތް ފެށުނީ އިސްލާހީ ހަރަކާތެއް ރާއްޖޭގައި އުފެދުނު ހިސާބުން ކަމަށެވެ. އެގޮތުން އެ ހަރަކާތް ފެށުމުގެ ކުރިން ޖަލުގައި ކުރެވޭ އަނިޔާއަކީ ކޮބައިކަންވެސް ނޭނގޭ ކަމަށްވެސް ހަސީން ވިދާޅުވި އެވެ. ނަމަވެސް އޭނާ ވިދާޅުވީ، މިވަގުތަކީ ޖަލުގެ ކަންތައް ބެލުމުގެ ނިޔަތުގައި ބަޔަކު މަސައްކަތް ކުރަމުންދާ ވަގުތެއް ކަމަށެވެ.
ބޯދާ ޒަމާނުގައި ޖަލަކީ މުޖުތަމައުއިން ބާކީކޮށް އަދަބުދޭން ހުންނަ ތަނެއް ކަމަށް ފާހަގަކުރައްވަމުން ހަސީން ވިދާޅުވީ، ދުނިޔެ ތަހުޒީބުވެގެން އައިއިރު، ޖަލު ވެގެންގޮސްފައިވަނީ މީހާ ދެވަނަ ފަހަރަށް މުޖުތަމައުއަށް ނެރުމަށް ތައްޔާރުކުރާ ތަނެއްގެ ގޮތުގައި ކަމަށެވެ. އެގޮތުން ރާއްޖޭގެ ޖަލުތައް ހުރީ ކުށްވެރިން ރިހެބިލިޓޭޓްކުރެވޭނެ ފެންވަރެއްގައިތޯ ސުވާލު އުފައްދަމުން ހަސީން ވިދާޅުވީ، ކުށްވެރިން އެކަހެރިކުރަނީ ކޮންމެވެސް ސަބަބަކާ ހެދި އިސްލާހުކުރުމަށް ކަމަށެވެ. އަދި އެ ކުށްވެރިން އިސްލާހުވުމުން މުޖުތަމައުއަށް ނެރެންޖެހޭނެ ކަމަށްވެސް އޭނާ ވަނީ ވިދާޅުވެފައެވެ.
މީގެއިތުރުން ހަސީން ވިދާޅުވީ، ކުށްވެރިޔަކަށް ލިބޭނެ އެންމެ ބޮޑު އަދަބަކީ މިނިވަންކަން ނިގުޅައިގަތުން ކަމަށާއި، އޭގެ އިތުރަށް އެއްވެސް އަދަބެއް ދީގެން ނުވާނެ ކަމަށެވެ. އެގޮތުން އެ ކުށްވެރިޔަކަށްވެސް ބޭސްފަރުވާ އާއި އެހެނިހެން ހިދުމަތްތައްވެސް ލިބެންޖެހޭނެ ކަމަށެވެ.
