އަދީބު އަތުން ފައިސާއެއް ނުނަގަން، ޖޭއެސްސީން ކުރާ ތުހުމަތުތަކަކީ ދޮގެއް: ފަނޑިޔާރު ދީދީ

ކުރީގެ ނައިބު ރައީސް އަހުމަދު އަދީބްގެ އަތުން އެއްވެސް ފައިސާއެއް ނަގާފަ ނުވާނެ ކަމަށާއި، ޖުޑީޝަލް ސާރވިސް ކޮމިޝަން (ޖޭއެސްސީ) ކުރާ ތުހުމަތުތަކަކީ ދޮގެއް ކަމަށް ސުޕްރީމް ކޯޓުގެ ފަނޑިޔާރު އަބްދުﷲ ދީދީ ވިދާޅުވެއްޖެ އެވެ.

ޖޭއެސްސީން އާންމުކޮށް ހުޅުވާލައިގެން ކުރިއަށްގެންދިޔަ ތަހުޤީޤްގައި އެ ކޮމިޝަނުން ފަނޑިޔާރު ދީދީގެ ނަމްބަރުން ކޮށްފައިވާ ބައެއް ޓެކްސްޓް މެސެޖުތައް އާންމުކޮށްފައިވާއިރު، އެ މެސެޖުތަކުގެ ތެރޭގައި ފައިސާ ހޯދުމަށް "ސަސްޕެކްޓް 1" ކޮށްފައިވާ މެސެޖުތަކެއް ހިިމެނެ އެވެ. އަދި ފަނޑިޔާރު ދީދީގެ ނަމްބަރުން ކޮށްފައިވާ އެ މެސެޖުތަކުން އެނގޭ ގޮތުގައި ފައިސާ ހޯދެވުމަށް މަސައްކަތްކުރައްވަނީ ރާއްޖެއިން ބޭރަށް ވަޑައިގެންނެވުމަށެވެ. ނަމަވެސް "ސަސްޕެކްޓް 1" އަކީ ކޮން މީހެއް ކަމެއް ޖޭއެސްސީން ހާމަކޮށްފައެއް ނުވެ އެވެ.

Advertisement

އޭގެ އިތުރުން ސިޔާސީ ފަރާތްތަކަށް ވަކި ގޮތަކަށް ހުކުމްކުރެއްވުމަށް، އެމްއެމްޕީއާރުސީގެ ހިޔާނާތުގެ ތުހުމަތުކުރެވޭ ފަރާތެއްގެ އަތުން ފައިސާ ނެގިކަން ވެސް ތަހުޤީޤުން ހާމަވެފައި ވެއެވެ. އަދި އެއެމްޕީއާރްސީގެ ހިޔާނާތުގެ ފައިސާ ލޯންޑަކުރުމުގެ ތުހުމަތުކުރެވޭ މީހުންގެ އަތުން އަބްދުﷲ ދީދީ އެކި ފަހަރުމަތިން ފައިސާ ނެންގެވި ކަމާއި މަގާމުގެ ނުފޫޒު ބޭނުންކޮށްގެން ނާޖާއިޒު މަންފާ ހޯދަން އުޅުއްވިކަން ވެސް ހާމަވެފައި ވެއެވެ.

"ސަސްޕެކްޓް 1" އަކީ ކުރީގެ ނައިބު ރައީސް އަހުމަދު އަދީބް ކަމަށް ތުހުމަތުކުރެވެއެވެ.

އެ ތުހުމަތުތަކާ ގުޅިގެން އަދީބުގެ އަތުން އެއްވެސް ފައިސާއެއް ނެންގެވިންތޯ ރާއްޖެއެމްވީން ސުވާލުކުރުމުން ފަނޑިޔާރު ދީދީ ވިދާޅުވީ އަދީބު އަތުން އެއްވެސް ފައިސާއެއް ނަންގަވާފައި ނުވާނެ ކަމަށެވެ. އަދި ޖޭއެސްސީން ކުރަނީ ދޮގު ތުހުމަތުތަކެއް ކަމަށާއި، އެއީ "ކަނޑައެޅިގެން، ދޮގު، ފޭކް އެއްޗެހިތަކެއް ހަދައިގެން" ޖޭއެސްސީން ކުރާ ކަމެއް ކަމަށް ފަނޑިޔާރު ދީދީ ވިދާޅުވި އެވެ.

ޖޭއެސްސީން ބުރާސްފަތި ދުވަހު އާންމުކޮށް ހުޅުވާލައިގެން ކުރިއަށް ގެންދިޔަ ތަހުޤީޤުން ގިނަ ތުހުމަތުތަކެއް ކޮށްފައިވާއިރު، ފަނޑިޔާރު ދީދީގެ އަނބިކަނބަލުންނަށް ނުފޫޒުން މަޤާމެއް ހޯދައިދެއްވުމަށް އެދިވަޑައިގެން ކޮށްފައިވާ މެސެޖުތަކެއް ވެސް ހިމެނެ އެވެ. އެގޮތުން މެލޭޝިއާގައި ހުންނަ ޑެޕިއުޓީ އެމްބެސެޑަރުގެ މަގާމަށް އޭނާގެ އަނބިކަނބަލުން ޣާނިޔާ އަބްދުލް ގަފޫރު ހަމައްޖައްސައިދޭން އެދިފައިވާކަން އެ މެސެޖުތަކުން ހާމަވެއެވެ.

އޭގެ އިތުރުން އޭސީސީ އަށް މީހަކު އައްޔަންކުރުމުގައި ވެސް ވަކި މީހެއްގެ ނަން އަބްދުﷲ ދީދީ "ސަސްޕެކްޓް 1" ގެ ފޯނަށް ފޮނުވާފައިވާކަން އެނގޭ ކަމަށް ޖޭއެސްސީން ބުނެފައި ވެއެވެ. އަދި ނޫސްވެރިޔާ އަހްމަދު ރިލްވާން ގެއްލުވާލި މައްސަލާގައި ހިމެނޭ މީހަކު ބަންދުން ދޫކޮށްލަން އަބްދުﷲ ދީދީ، ކުށުގެ ވެށީގައި ހިމެނޭ މީހަކު މުއާމަލާތް ކޮށްފައިވާކަން ވެސް ފުލުހުންގެ ތަހުގީގަށް އެނގިފައިވާ ކަމަށާއި، އަދި އެ މީހާ ވަނީ އަބްދުﷲ ދީދީ ބަންދުން ދޫކޮށްލާފައި ކަމަށް ވެސް ޖޭއެސްސީން ތަހުޤީޤްގައި ހާމަކޮށްފައި ވެެއެވެ.

ޖޭއެސްސީން ކުރިއަށްގެންދިޔަ ތަހުޤީޤުން ހާމަވި އިތުރު ކަންތައްތަކުގެ ތެރޭގައި ސިޔާސީ ފަރާތްތަކަށް ވަކި ގޮތަކަށް ހުކުމް ކުރުމަށް އަބްދުﷲ ދީދީ އަށް ފައިސާ ދިންކަން ފުލުހުންގެ ތަހުޤީޤަށް އެނގިފައިވާ ކަމަށް ބުނެފައި ވެއެވެ. އަދި އެއެމްޕީއާރްސީގެ ހިޔާނާތުގެ ފައިސާ ލޯންޑަކުރުމުގެ ތުހުމަތުކުރެވޭ މީހުންގެ އަތުން އަބްދުﷲ ދީދީ އެކި ފަހަރުމަތިން ފައިސާ ނެންގެވި ކަމާއި މަގާމުގެ ނުފޫޒު ބޭނުންކޮށްގެން ނާޖާއިޒު މަންފާ ހޯދަން އުޅުއްވި ކަމަށް ބެލެވޭ ހެކި އެމްއެމްޕީއާރްސީގެ ތަހުގީގުން ފުލުހުންނަށް ލިބިފައިވާކަން ވެސް ހާމަކޮށްފައި ވެއެވެ.