ކަބީރު ސިންހްގެ ފެށުން ވަރަށް ކާމިޔާބު!
23 ޖޫން 2019 | އާދީއްތަ 15:01"ކަބީރް ސިންހް" ވެގެން ގޮސްފައިވަނީ ޝާހިދު ކުޅުނު ފިލްމްތަކުގެ ތެރެއިން އެންމެ ބޮޑު އާމްދަނީ ލިބިގެން ގޮސްފައިވާ ފިލްމަށް
ޝާހިދު ކަޕޫރް
ބޮލީވުޑްގެ އެކްޓަރ ޝާހިދު ކަޕޫރު ލީޑް ރޯލް ކުޅެފައިވާ ފިލްމް "ކަބީރު ސިންހް" އަށް ފުރަތަމަ ދުވަހު ވެސް 20.21 ކްރޯޑް ރުޕީސް ލިބިއްޖެ އެވެ.
ޓްރޭޑް އެނަލިސްޓް ތަރަން އާދާޝް ކޮށްފައިވާ ޓްވީޓްގައި ވަނީ މިދިޔަ ހުކުރު ދުވަހު ރިލީޒްކުރި "ކަބީރް ސިންހް" ވެގެން ގޮސްފައިވަނީ ޝާހިދު ކުޅުނު ފިލްމްތަކުގެ ތެރެއިން ފިލްމް ރިލީޒް ކުރި ދުވަހު އެންމެ ބޮޑު އާމްދަނީ ލިބިގެން ދިޔަ ފިލްމަށް ކަމަށެވެ.
މީގެ ކުރިން ޝާހިދު ކުޅުނު ފިލްމްތަކުގެ ތެރެއިން އެންމެ ބޮޑު އާމްދަނީއެއް ލިބިގެން ގޮސްފައިވަނީ "ޕަދްމާވަތް" އަށެވެ. އެ ފިލްމަށް ފުރަތަމަ ދުވަހު 19 ކްރޯޑް ރުޕީސް ލިބުނެވެ.
'ކަބީރް ސިންހް' އަކީ ކާމިޔާބު ތެލުގޫ ފިލްމު 'އަރްޖުން ރެއްޑީ'ގެ ރީމޭކް އެކެވެ.
ސަންޑީޕް ވަންގާ ޑައިރެކްޓް ކޮށްފައިވާ މި ފިލްމްގައި ފެނިގެންދަނީ ވަރަށް ތޫނުފިލި މެޑިކަލް ސުޓޫޑެންޓެއްގެ ދިރިއުޅުން ބަނަވެގެންދާ ގޮތެވެ. އޭނާގެ ލޯބިވެރިޔާ އެހެން މީހަކާއި ކައިވެނި ކުރުމުން އެކަމާއި ރުޅިގަދަވެ މަސްތުގެ ހާލަތުގައި ހުރެ އަމިއްލަ ނަފްސަށް ގެއްލުން ދޭ މަންޒަރު މި ފިލްމުން ފެނިގެންދެއެވެ.
މި ފިލްމްގައި ޝާހިދު އާއި އެކު ލީޑްރޯލުން ފެނިގެން ދަނީ ކިއާރާ އަދްވާނީ އެވެ.
