ދަނޑުވެރިންނަށް ހިލޭ ފޯނުކޮށް ބޯނަސް ޑޭޓާ ލިބޭ ޕެކޭޖެއް އުރީދޫ އިން ތައާރަފް ކޮށްފިއެވެ.

މި ޕެކޭޖް ތައާރަފު ކޮށްފައިވަނީ އުރީދޫ އާއި ފިޝަރީޒް އެންޑް އެގްރިކަލްޗާ މިނިސްޓްރީ ގުޅިގެންނެވެ.

މި ހިދުމަތް ތައާރަފްކުރުމުގެ ގޮތުން ކަމާ ގުޅޭ އެއްބަސްވުމުގައި އުރީދޫ އާއި މިނިސްޓްރީގެ ފަރާތުން އެއްބަސްވުމެއްގައި ވަނީ ސޮއިކޮށްފައެވެ. މި އެއްބަސްވުމުގައި އުރީދޫގެ ފަރާތުން އެ ކުންފުނީގެ ޑައިރެކްޓަރު އޮފް ސޭލްސް އެންޑް ބްރޭންޑިން ހުސެއިން ނިޔާޒް ސޮއިކުރެއްވިއިރު، ފިޝަރީޒް މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ޕާމަނަންޓް ސެކްރެޓަރީ ޑރ. އައިމިނަތު ޝަފީގާއެވެ.

މި ޕެކޭޖުގެ ދަށުން، އެގްރިކަލްޗާ މިނިސްޓްރީގައި ރަޖިސްޓްރީވެފައިވާ 7،000 އަށް ވުރެ ގިނަ ދަނޑުވެރިންގެ މެދުގައި ހިލޭ ކޯލާއި އެސްއެމްއެސް ކުރެވުމުގެ އިތުރުން، ބޯނަސް ޑޭޓާ ވެސް ލިބޭނެ ކަމަށް އުރީދޫ އިން ބުންޏެވެ. ގިނަ ފިހާރަތަކުން ދަނޑުވެރިކަމުގެ މަސައްކަތަށް ބޭނުންވާ ސާމާނު ހާއްސަ ހެޔޮ އަގެއްގައި ލިބޭނެ ކަމަށް ވެސް އުރީދޫ އިން މައުލޫމާތުދެއެވެ.

ދަނޑިވެރިންނަށް ހާއްސަ ޕެކޭޖެއް ތައާރަފު ކޮށްފައިވާއިރު އުރީދޫގެ ފަރާތުން ވަނީ މިދިޔަ އަހަރުގެ ޑިސެމްބަރުގައި މަސްވެރިންނަށް ހާއްސަ ޕެކޭޖެއް ތައާރަފު ކޮށްފައެވެ.

އުރީދޫ މަސްވެރިންގެ ޕެކޭޖު ރާއްޖޭގައި ރެޖިސްޓަރ ކޮށްފައިވާ އެންމެހާ މަސްވެރިންނަށް ހުޅުވާލާފައިވާއިރު އެ ޕެކޭޖް ޚިޔާރުކުރުމާއި އެކު، ޕެކޭޖް ބޭނުން ކުރައްވާ އެންމެހާ މަސްވެރިންގެ މެދުގައި ކުރަންޖެހޭ ހުރިހާ ކޯލެއް އަދި އެސްއެމްއެސްވެސް ހިލޭ ކުރުމުގެ މަގުފަހިވެގެންދާ ކަމަށް ވެސް އުރީދޫ އިން ބުންޏެވެ. ހަމައެއާއެކު، 4 ޢަދަދުގެ ކުރު ނަންބަރެއް ބޭނުންކޮށްގެން، މަސްވެރިންގެ ޕެކޭޖުގައި ހިމެނޭ ބޭފުޅުންގެ މެދުގައި، އެކަކު އަނެކަކަށް ފަސޭހަކަމާއި އެކު ގުޅާލުމުގެ ފުރުސަތު ލިބިގެންދާ ގޮތަށް އެ ކުންފުނިން ވަނީ ޕެކޭޖް ތައާރަފު ކޮށްފައެވެ.