ސަގާފީ ކޮންސެޕްޓަކަށް ރިސޯޓެއް ތަރައްގީ ކުރާނަން: އަލީ ވަހީދު
ކޮންސެޕްޓް ތަަރައްގީ ކުރާނީ ތާރީހާބެހޭ ވުޒާރާއާ ގުޅިގެން
ހިރިގަލުވަޑާން ކޯސް ފެށުމުގެ ރަސްމިއްޔާތުގައި އަލީ ވަހީދު ވާހަކަފުޅު ދައްކަވަނީ
ދިވެހިވަންތަ، ދިވެހި ސަގާފަތް ދައްކުވައިދޭ ރިސޯޓެއްގެ ކޮންސެޕްޓެއް ތައްޔާރު ކުރައްވާނެ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
ސަގާފީ ދިވެހި ހިރިގަލުވަޑާން ދަސްކޮށްދޭ ކޯސް އިފްތިތާހު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުން އަލީ ވަހީދު ވިދާޅުވީ މި މަސައްކަތަކީ އެކި ވައްތަރުގެ ޓޫރިޒަމް ރާއްޖެއަށް ތައާރަފް ކުރަން ރައީސް ސޯލިހު ގެންގުޅުއްވާ ތަސައްވުރުގެ ދަށުން ކުރާ ކަމެއް ކަމަށެވެ.
މިނިސްޓަރ ވިދާޅުވީ މިއީ ތާރީހަށް ލޯބިކުރައްވާ ބޭފުޅުންގެ ވަރަށް ބޮޑު އެދިލުމެއް ކަމަށާއި، މިކަން ހަގީގަތަކަށް ހެދުމަށް ތާރީހާބެހޭ ވުޒާރާއިން ދެއްވާ އެއްބާރުލުމަށް މިނިސްޓަރ ޔުމްނާ އަށާއި ސްޓޭޓް މިނިސްޓަރ ތޯރިގަށް ވަރަށް ބޮޑަށް ޝުކުރު އަދާކުރައްވާފައެވެ.
މީގެ އިތުރުން އަލީ ވަހީދު ވިދާޅުވީ، ރާއްޖޭގެ އެކި ސަރަހައްދުތަކުގައި ކަލްޗަރަލް ސެންޓަރތަކެއް ގާއިމް ކުރުމަކީ މި ސަރުކާރުގެ މެނިފެސްޓޯގައި ހިމަނާފައިވާ ވަރަށް މުހިންމު ވައުދެއް ކަމަށެވެ. އެގޮތުން އެ މަސައްކަތް ވެސް ތާރީހާބެހޭ ވުޒާރާއާ ގުޅިގެން މަސައްކަތް ކުރައްވާ އެކަން ވެސް ކުރައްވާނެ ކަމަށް ވިދާޅުވިއެވެ.
އެގޮތުން މިފަހަރުގެ ޕާޓްނާޝިޕް ފޯރަމްގައި ވެސް މޮރޮކޯ އަދި ސައުތް އެފްރިކާ ފަދަ ގައުމުތަކުން، ރާއްޖެއާ އޮތް ތާރީހީ ގުޅުންތައް ދެނެގަނެ އެކަންކަން ކުރިއަރުވަން އެހީ ވެދެއްވާނެ ކަމަށް ވެސް އަލީ ވަހީދު ވިދާޅުވިއެވެ.
މިނިސްޓަރގެ ވާހަކަފުޅުގައި ރާއްޖޭގެ ނެތެމުންދާ ސަގާފީ ފަންނުތައް ކުރިއަރުވަން ކުރާ މަސައްކަތްތަކަށް ވެސް އަލި އަޅުއްވާލެއްވިއެވެ.
އެގޮތުން އަލީ ވަހީދު ވަނީ ރާއްޖޭގައި ނެތެމުންދާ ފަންނީ ހުނަރުތައް ކުރިއަރުވަން ކުރާ މަސައްކަތައްތަކަށް މަޓީ އަދި ގަދީމީ ކަލެކްޝަން ގުޅިގެން ފަށާފައިވާ މަސައްކަތަށް ތައުރީފުކުރައްވާފައެވެ. އަދި މިކަމަށް ތާރީހާ ބެހޭ ވުޒާރާއިން ދެއްވާ އެއްބާރުލުމަށް ވެސް ޝުކުރު އަދާކުރެއްވިއެވެ.
އަލީ ވަހީދު އިތުރަށް ވިދާޅުވީ ޓޫރިޒަމް މިނިސްޓްރީން ވެސް މިކަމަށް، ހާއްސަކޮށް އުފައްދާ އުފެއްދެންތައް ސުވެނިއަރޒްގެ ގޮތުގައި ބާޒާރަށް ނެރެ ވިއްކުމަށް، ހާއްސަ އަހައްމިއްޔަތުކަމެއް ދީގެން އެއްބާރުލުން ދެއްވާނެ ކަމަށެވެ. މިނިސްޓަރގެ ވާހަކަފުޅުގައި ވަނީ ޒުވާނުން މި ދާއިރާއަށް ނިކުމެ ނެތެމުންދާ ފަންނުތައް ކުރިއަރުވަން ޒުވާނުން މަސައްކަތް ކުރުމަށް ގޮވާލައްވާފައެވެ.
މަޓީ އަދި ގަދީމީ ކަލެކްޝަން ގުޅިގެން ފަށާ ސަގާފީ ހިރިގަލުވަޑާން ކޯހަކީ، ގަލުވަޑާމުގެ ފަންނު ޒުވާނުންނަށް ދަސްކޮށްދިނުގެ ގޮތުން ފަށާފައިވާ މަސައްކަތެކެވެ. އެގޮތުން ދިހަ ބައިވެރިންނާއި އެކު ދެ މަސް ދުވަހުގެ މުއްދަތައް ގެންދާ ކޯހުގައި، ހިރިގަލުވަޑާން ކުރާނެ ގޮތާއި ބޭނުންކުރާ އާލާތްތައް ބޭނުންކުރަން ދަސްކޮށްދިނުމާއި މިހާރު ބޭނުންކުރާ "ގާ" އުފައްދާނެ ގޮތް ވެސް ކިޔަވައިދެވޭނެއެވެ.
