ދީނީ އިލްމުގެ އިތުރުން ސައިންސާއި ޓެކްނޮލޮޖީއަށްވެސް މުސްލިމުން އަހުލުވެރިވާންޖެހޭ ކަމަށް ހުކުރު ޚުތުބާގައި ބުނެފިއެވެ.

"އިލްމު އުނގެނުމުގެ މާތްކަން" މި މައުޟޫގެ މައްޗަށް ބިނާކޮށްފައިވާ ޚުތުބާގައި ބުނީ، ދީނީ އިލްމުގެ އިތުރުން ސައިންސާއި ޓެކްނޮލޮޖީއަށްވެސް މިއަދު މުސްލިމުން އަހުލުވެރިވާންޖެހޭ ކަމަށާއި، އެފަދަ ދިރާސާތަކާ ގުޅޭ އެކަޑަމީތައް ހަދައި އެކި ރޮނގު ރޮނގުން މުސްލިމުން ދިރާސާތައް ހަދަންޖެހޭ ކަމަށެވެ.

ޚުތުބާގައި އިތުރަށް ބުނީ، އިސްލާމް ދީނުގައި އިލްމު އުނގެނުމަށް ވަރަށް ބޮޑަށް ބާރުއަޅާ ކަމަށާއި، އިިލްމު އުނގަންނައި ދިނުމަށްވެސް ވަރަށް ބޮޑު އަހައްމިއްޔަތުކަމެއް ދެއްވާ ކަމަށެވެ. އެގޮތުން ބަދުރު ހަނގުރާމައިގެ އަސީރުންގެ ފިދްޔާއަކަށް މަދިނާގެ 10 މީހަކަށް ލިޔަން ކިޔަން ދަސްކޮށްދިނުމަށް ރަސޫލާ ހަމަޖެއްސެވުމަކީ އޭގެ މިސާލެއް ކަމަށް ޚުތުބާގައި ބުނެފައިވެއެވެ.

ޚުތުބާގައި އިތުރަށް ބުނީ، މުޅި ދުނިޔޭގައި އިސްލާމީ ހަޟާރަތް ފެތުރިގެން ދިއުމުގެ އަސްލަކީވެސް އިސްލާމް ދީީނުގައި އިލްމަށް ދެއްވާފައިވާ ސަމާލުކަން ކަމަށެވެ. އެގޮތުން ހިސާބު އިލްމާއި، ޖިއޮގްރަފީއާއި، އިމާރަތް ކުރުމުގެ ފަންނާއި، ބޭސްވެރިކަމާއި ފަލަކީ އިލްމު ފަދަ އިލްމުތަކުގައި މުސްލިމުން އާ އީޖާދުތައް އުފައްދައި ކުރިއަރައިގެން ދިޔަ ސަބަބަކީވެސް އިލްމު އުނގެނުމަށްދޭ އަހައްމިއްޔަތުކަން ކަމަށް ޚުތުބާގައި ބުނެފައިވެއެވެ.