ހޯރަފުށީގައި 500 ގަސް މުޑުވައްކުރުމުގެ ޕްރޮގްރާމެއް ނައިބްރައީސް ފައްޓަވައިދެއްވައިފި
21 ޖޫން 2019 | ހުކުރު 06:59މި ޕްރޮގްރާމުގެ ތެރެއިން 10،000 ގަސް މުޑުވައް ކުރުމަށް ވަނީ ނިންމާފައި
ހޯރަފުށީ ފެނަކަ ބްރާންޗުން ގަސް މުޑުވައްކުރުމުގެ ޕްރޮގްރާމްގައި ނައިބް ރައީސް ފައިސަލް ނަސީމު ބައިވެރިވެ ވަޑައިގަންނަވަނީ
ހއ ހޯރަފުށީގައި އަޅާ އެއާޕޯރޓު ފެހި ކުރުމުގެ ގޮތުން ހިންގާ ޚާއްސަ ޕްރޮގްރާމްގެ ތެރެއިން 500 ގަސް މުޑުވައް ކުރުމުގެ ޕްރޮގްރާމެއް ރައީސުލް ޖުމްހޫރިއްޔާގެ ނައިބް ފައިސަލް ނަސީމް ފައްޓަވައިދެއްވައިފިއެވެ.
ހުކުރު ދުވަހު ފެށި މި ޕްރޕގްރާމަކީ ހޯރަފުށީ އެއަރޕޯޓް ފެހިކުރުމަށް ހިންގާ 10،000 ގަސް އިންދުމުގެ ޕްރޮގްރާމްގެ ތެރެއިން ފެނަކަ ހޯރަފުށީ ބްރާންޗްއިން ފެށި ޕްރޮގްރާމެކެވެ.
ހޯރަފުށީ ދާއިރާގެ މެންބަރު އަހުމަދު ސަލީމް ކުރައްވަފއިވާ ޓްވީޓްގައި ވަނީ ހޯރަފުށީ އެއަރޕޯޓް ފެހިކުރުމަށް ހިންގާ 10،000 ގަސް އިންދުމުގެ ޕްރޮގްރާމްގެ ތެރެއިން ފެނަކަ ހޯރަފުށީ ބްރާންޗްގައި 500 ގަސް ހެއްދުމުގެ ޕްރޮގްރާމެއް ފަށައިފި ކަމަށެވެ.
މި ޕްރޮގްރާމުގައި ނައިބްރައީސް ގެ އިތުރުން ހޯރަފުށީ ދާއިރާގެ މެންބަރު އަހުމަދު ސަލީމް، ފެނަކައިގެ މެނޭޖިން ޑިރެކްޓަރ އަހުމަދު ސައީދުގެ އިތުރުން ސްޕެޝަލް އެޑްވައިޒަރ އޮން ސޯޝަލް ޕޮލިސީ މުސްތަފާ ލުތުފީ ބައިވެރިވެ ވަޑައިގެންނެވިއެވެ.
ހޯރަފުށީ އެއާޕޯރޓް އަޅާ ސަރަހައްދުގެ ބިން ހިއްކައި ނިމެންވާއިރަށް އެ ސަރަހައްދުގެ ހޭޅި ހެދުމަށާއި، ބިން ފެހި ކުރުމަށް ބޭނުންވާ ގަސް ހޯދުމަށް 10،000 ގަސް މުޑުވައް ކުރަން ފަށާފައިވާ އިރު މި މަސައްކަތް ކުރުމަށް ނިންމާފައިވަނީ ހޯރަފުށީ ކައުންސިލާއި، އާންމު ރައްޔިތުންނާއި، މުއައްސަސާތައް ގުޅިގެންނެވެ.
ނިމިދިޔަ ސަރުކާރުން މާފިނޮޅުގައި އަޅަން ނިންމި އެއާޕޯރޓް ހޯރަފުށީގައި އެޅުމަށް ނިންމައި، އެއާޕޯޓް މަޝްއުރޫއުގެ އަމަލީ މަސައްކަތް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙް ފައްޓަވައިދެއްވައިފައި ވަނީ މިދިޔަ މާރޗް މަހުގެ 31 ވަނަ ދުވަހު އެވެ.
