ގިނަ ދުވަސްތަކެއް ވަންދެން ވާރޭ ނުވެހި އޮތުމާއި ގުޅިގެން ފެނަށް ޖެހިފައި އޮތް ޗެންނާއީއަށް ވާރޭ ވެހިއްޖެއެވެ.
ޗެންނާއީއަށް ވާރޭ ނުވެހޭތޭ 195 ދުވަސް ފަހުން ވެހުނު ވާރެއާއެކު އެ އަވަށުގައި ދިރިއުޅޭ މީހުން ވަނީ ސޯޝަލް މީޑިއާގައި އުފާ ފާޅުކޮށްފައެވެ. ކުރިޔަށް އޮތް ހަ ދުވަހުގެ ވެސް ޗެންނާއީއަށް ވާރޭ ވެހޭނެ ކަމަށް ޓަމިލް ނާޑޫ ސްޓޭޓްގެ މޫސުމާ ބެހޭ ވުޒާރާއިން ލަފާ ކޮށްފައިވެއެވެ.
މި މަހުގެ 13 ވަނަ ދުވަހު ކުރިން ވާރޭ ވެހޭނެ ކަމަށް ލަފާކޮށްފައިވިޔަށް، ވާރޭ ނުވެހުނީ ތޫފާނު "ވާޔޫ" ގެ ރާސްތާ ބަދަލުވުމާއި ގުޅިގެންނެވެ. ވާރޭ ވެހުމާއި އެކު ހުސްވެފައި ހުރި ފެނުގެ ރިޒާވްތައް ވެސް ފުރާލެވޭނެ ކަމަށް އެ އަވަށުގެ އޮފިޝަލުންތަކެއް މީޑިއާތަކަށް މައުލޫމާތު ދީފައިވެއެވެ.
ފެން ނުލިބުމާއި ގުޅިގެން އެ އަވަށުގެ މީހުންގެ މެދުގައި ހަމަނުޖެހުން ހިނގާ، ރައްޔިތުންނަށް ފެން ފޯރުކޯށްދޭނެ ގޮތަކާއި ސަރުކާރު އޮތީ ގޮތް ހުސްވެފައެވެ. މީގެ ކުރިން ސަރުކާރުގެ އޮފިޝަލުން ވެސް ބުނެފައިވަނީ ފެނުގެ ދަތިކަމަށް އޮތް ހަމައެކަނި ހައްލަކީ ވާރޭ ވެހުން ކަމުގައެވެ.
