އީރާނުން އެމެރިކާގެ ޑްރޯނެއް ވައްޓާލައިފި
20 ޖޫން 2019 | ބުރާސްފަތި 19:30ޑްރޯން ވައްޓާލީ ވައިގެ ސަރަހައްދަށް ވަނުމުން: އީރާން
ިހޮރުމޫޒް ކަނޑުއޮޅި: މެދު އިރުމަތީގެ ތެލު އެކްސްޕޯޓްތަކަށް މުހިންމު
އީރާނުގެ ވައިގެ ސަރަހައްދަށް ވަންކަމަށް ބުނެ، އެ ގައުމުގެ ރިވޮލިއުޝަނަރީ ގާޑުން އެ އެމެރިކާގެ ޑްރޯނެއް ވައްޓާލުމާއި ގުޅިގެން ދެ ގައުމުގެ ގުޅުން އިތުރަށް ގޯސްވެ، އަސްކަރީ ކުރިމަތިލުމަކަށް ހިނގައިދާނެ ކަމުގެ ބިރު ހީވެއްޖެއެވެ.
އީރާނުގެ ވައިގެ ސަރަހައްދަށް ވަންކަމަށް އެ ގައުމުން ބުނި ކަމުގައިވީ ނަމަވެސް، އެމެރިކާއިން ބުނީ ޑްރޯން ދަތުރުކުރަމުން ދިޔައީ ބައިނަލްއަގްވާމީ ވައިގެ ސަރަހައްދުގައި ކަމަށެވެ. ޑްރޯން ވައްޓާލާފައި ވަނީ ބިމުން ޖައްވަށް ދަތުރުކުރާ (ސާފަސް-ޓު-އެއަރ) މިސައިލަކުންނެވެ.
އީރާނުގެ އެލީޓް ރިވޮލިއުޝަނަރީ ގާޑު (އައިއާރްޖީސީ) އިން ނެރުނު ބަޔާނެއްގައި ބުނެފައިވަނީ ޑްރޯން ވައްޓާލާފައިވަނީ ކޫމްބަރަކް ޑިސްޓްރިކްޓްއާ ދިމާލުން އީރާނުގެ ވައިގެ ސަރަހައްދަށް ވަނުމުން ކަމަށެވެ. އީރާނުގެ ހާރިޖީ ވުޒާރާއިން ވަނީ އެމެރިކާގެ އަމަލު ކުށްވެރިކޮށް، މިފަދަ ހުރިހާ ކަމަކަށް އެކަށީގެންވާ ރައްދު ދޭނެ ކަމަށެވެ.
ރައްދުގައި އެމެރިކާގެ އަސްކަރިއްޔާއިން ބުނެފައިވަނީ، އިރާނުގެ ވައިގެ ސަރަހައްދުން އެމެރިކާގެ ޑްރޯންއެއް ދަތުރުކޮށްފައި ނުވާނެ ކަމަށެވެ. ނަން ނުޖަހަން ޝަރުތުކޮށް އަލް ޖަޒީރާއަށް މައުލޫމާތު ދިން ދެ އޮފިޝަލަކު ބުނެފައިވަނީ، އީރާނުން އެ ޑްރޯންތައް ވައްޓާލީ ހޮރްމުޒް ކަނޑުއޮޅި މަތިން ބައިނަލްއަގްވާމީ ވައިގެ ސަރަހައްދުން ދަތުރުކުރަނިކޮށް ކަމަށެވެ.
އެމެރިކާ އާއި އީރާނުގެ މައްސަލަ ހޫނުވެ، އަސްކަރީ ކުރިމަތިލުމަކަށް ހިނގައިދާނެ ކަމުގެ ބިރު ހީވެފައިވާ ދަނޑިވަޅެއްގައި ދެ ގައުމުން ވެސް ބުނަނީ ގޮތް ދޫނުކުރާނެ ކަމަށެވެ. ދެ ގައުމުގެ ގުޅުން ގޯސްވީ ރައީސް އޮބާމާގެ ސަރުކާރުގައި އީރާނާއެކު 2015 އަހަރު ވެވުނު ނިއުކްލިއަރ އެއްބަސްވުން ޓްރަމްޕް ސަރުކާރުން އުވާލުމާއި ގުޅިގެންނެވެ.
ދެ ގައުމުގެ ގުޅުން ގޯސްވެ، އެމެރިކާ އަސްކަރިއްޔާއިން މެދުއިރުމައްޗަށް އިތުރު ސިފައިންނާއި ބީ-52 ބޮމްބަރޒް ފޮނުވާފައިވެއެވެ. ނަމަވެސް ޓްރަމްޕް ވަނީ އީރާނާއެކު ހަނގުރާމައެއް ފަށަން ބޭނުންނުވާ ކަމަށް ވެސް ވިދާޅުވެފައެވެ. އެމެރިކާއިން ވަނީ މި ފަހުން ހޮރުމުޒް ކަނޑުއޮޅީގައި ޓޭންކަރުތަކަކަށް ދިން ހަމަލާތަކަކީ އީރާނު ފަހަތުގައި އޮވެގެން ދިން ހަމަލާތަކެއް ކަމަށް ތުހުމަތުކޮށްފައެވެ. އީރާނުން ވަނީ މި ތުހުމަތުތަކައް އިންކާރުކޮށްފައެވެ.
