ފަނޑިޔާރު ދީދީގެ ތަހްގީގީ މަޖިލީހުގައި ހަމަނުޖެހުން ހިންގަން މަސައްކަތް ކޮށްފި
20 ޖޫން 2019 | ބުރާސްފަތި 07:15ފަނޑިޔާރު ދީދީގެ ތަހްގީގީ ކުރިއަށް ގެންދަނީ، އާންމުކޮށް ހުޅުވާލައިގެން ދަރުބާރުގޭގެ ރަންނަ ބަނޑޭރި މާލަމުގައި
ހަމަނުޖެހުން ހިންގަން މަސައްކަތްކުރި މީހަކު ތަހްގީގީ މަޖިލީހުން ބޭރަށް ވަނީ ނެރެފައި
ފަނޑިޔާރު އަބްދުﷲ ދީދީގެ ތަހްގީގީ މަޖިލިސް އަޑުއަހަން ވަން ބަޔަކު، ތަހްގީގީ މަޖިލިސް ކުރިއަށް ދިޔަ ވަގުތު ހަމަނުޖެހުން ހިންގަން މަސައްކަތް ކޮށްފިއެވެ.
ފަނޑިޔާރު ދީދީގެ ތަހްގީގީ މަޖިލިސް ޖޭއެސްސީން ކުރިއަށް ގެންދަނީ، އާންމުކޮށް ހުޅުވާލައިގެން ދަރުބާރުގޭގެ ރަންނަ ބަނޑޭރި މާލަމުގައެވެ. އެ މާލަމުގައި ގިނައިން ތިބީ އިދިކޮޅު އެކްޓިވިސްޓުންކަން ފާހަގަކޮށްލެވެއެވެ. އޭގެ ތެރޭގައި ޕީޕީއެމް އާއި ޕީއެންސީ އަދި ރައީސް ޔާމީނަށް ތާއީދުކުރާ ފަރާތްތައް ހިމެނެއެވެ.
ތަހްގީގް ކުރިއަށް ދަނިކޮށް، އާންމުންގެ ތެރެއިން ބަޔަކު ތެދުވެ އަޑުގަދަ ކުރަން ފެށުމުން، ރަންނަ ބަނޑޭރި މާލަމުގައި ސެކިއުރިޓީ ބަލަހައްޓަވަމުން ގެންދަވާ ފަރާތްތަކުން ވަނީ، އެމީހުން މާލަމުން ނެރެފައެވެ. ތަހްގީގީ މަޖިލިސްގެ ސަލާމަތީ ކަންކަން ބަލަހައްޓަމުން ގެންދަނީ އެމްއެމްއެންޑީއެފުންނެވެ.
ތަހްގީގް ދަރުބާރު ފެއްޓެމުގެ ކުރިން ޖޭއެސްސީން ވަނީ، އާންމުކޮށް ހުޅުވާލައިގެން ކުރިއަށް ގެންދާ މަޖިލީހަކަށް ވާތީ، މަޖިލިސް ބަލަން ވަން ފަރާތްތަކުން މަޖިލިސް ކުރިއަށްދާ ވަގުތު ސުލޫކީ މިންގަނޑު ހިފަހައްޓާ ތަހުގީގަށް ހުރަސް އެޅޭ ފަދަ އެއްވެސް އަމަލެއް ނުކުރުމަށް އިލްތިމާސްކޮށްފައެވެ.
ތަހްގީގް ކުރިއަށް ދިޔަ ވަގުތު ބައެއް ފަރާތްތަކުން އަޑުގަދަ ކުރަން ފެށުމުން، ފަނޑިޔާރު ދީދީގެ މައްސަލަ ބަލާ ކޮމިޓީގައި ހިމެނިވަޑައިގަންނަވާ ތުޅާދޫ ދާއިރާގެ މެމްބަރު ހިސާން ހުސެއިން ވިދާޅުވެފައިވަނީ، ތަހްގީގީ މަޖިލިސްގެ ސުލޫކީ މިންގަނޑާ ހިލާފުވާ ފަރާތްތައް ތަހްގީގީ މަޖިލީހުން ބޭރުކުރެވޭނެ ކަމަށެވެ.
މި މަޖިލިސް ހުޅުވާލައިގެން ކުރިއަށް ގެންދަން ޖޭއެސްސީން ނިންމީ ފަނޑިޔާރު އަބްދުﷲ ދީދީގެ އެދިވަޑައިގަތުމަކަށެވެ.
