ކ. އަތޮޅު ޖުޑީޝަލް ސަރވިސްގެ އިސް މެޖިސްޓްރޭޓް މުހައްމަދު ރާޣިބް އަހްމަދުގެ މައްސަލައެއް ބަލަމުންދާ ކަމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ބުނެފިއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ޖޭއެސްސީން ބުނީ، ރާޣިބާ ބެހޭ ގޮތުން ކޮމިޝަނަށް ހުށައެޅިފައިވާ ޝަކުވާތަކާއި ގުޅިގެން އޭނާގެ މައްސަލައެއް ބަލަމުންދާ ކަމަށެވެ.
ރާއްޖެ.އެމްވީ އަށް އެނގިފައިވާ ގޮތުން ޖޭއެސްސީން ބަލަމުންދާ ރާޣިބްގެ މައްސަލައަކީ، އަންހެން މުވައްޒަފަކަށް ޖިންސީ ގޯނާ ކުރި މައްސަލައެވެ. އިތުބާރު ހުރި ފަރާތަކުން ބުނީ، އެ މައްސަލަ ހުށައަޅާފައި ވަނީ ދާދި ފަހުން ކަމަށެވެ.
ޖޭއެސްސީން ވަނީ ރާޣިބްގެ މައްސަލަ ބެލުމަށް ކޮމިޝަންގެ ފަސް މެމްބަރުންގެ ހިމެނޭ ކޮމިޓީ އެއް އެކުލަވައިލާފައެވެ.
ޖޭއެސްސީން ރާޣިބްގެ މައްސަލަ އެއް ބަލަމުންދާކަމަށް ބުނެފައިވާއިރު، ފެމިލީ ކޯޓުގެ މެޖިސްޓްރޭޓް ހުޒައިފާގެ މައްސަލައެއް ވެސް ޖޭއެސްސީ އަށް ހުށައަޅާފައިވާ ކަމުގެ މައުލޫމާތު ވަނީ ލިބިފައެވެ.
ޖޭއެސްސީން މިހާރު އެންމެ އިސްކަމެއްދީގެން ބަލަމުން ދަނީ ސުޕްރީމް ކޯޓުގެ ފަނޑިޔާރު އަބްދުﷲ ދީދީގެ މައްސަލައެވެ. އެގޮތުން އޭނާއާ ބެހޭ ގޮތުން މިހާތަނަށް ފަސް މައްސަލައެއް ހުށައެޅިފައިވާއިރު ބުރާސްފަތި ދުވަހު އޭނާގެ ދެ މައްސަލައެއް އާއްމުންނަށް ހުޅުވާލައިގެން ދަރުބާރު ގޭގައި ތަހުގީގު ކުރިޔަށް ގެންދިޔުމަށް ވަނީ ހަމަޖެހިފައެވެ.
ދީދީގެ އިތުރުން ސުޕްރީމް ކޯޓުގެ އިތުރުން ތިން ފަނޑިޔާރެއްގެ މައްސަލަވެސް އެ ކޮމިޝަނުން ދަނީ ބަލަމުންނެވެ.
