ފޮޓޯއެއް ހިއްސާ ކުރުމަށް ފަހު، ބެލާ ހަޑީޑް އެކަމާ މެދު މާފަށް އެދިއްޖެ
19 ޖޫން 2019 | ބުދަ 09:33ބެލާ އަކީ ދެ ގައުމަކަށް ނިސްބަތްވާ މޮޑެލްއެއް
ބެލާ ހަޑީޑް
އަރަބިންނަށް މަލާމާތް ކުރާ ގޮތަކަށް ނަގާފައިވާ ފޮޓޯއެއް ހިއްސާ ކުރުމަށް ފަހު، އެމެރިކާގެ މޮޑަލް ބެލާ ހަޑީޑް އެކަމަށް މާފަށް އެދިއްޖެއެވެ.
އެއާޕޯޓެއްގެ ލޯންޖެއްގައި ނަގާފައިވާ އެ ފޮޓޯއިން ފެންނަނީ ސައުދީ އަރަބިއްޔާ އަދި އެމިރޭޓްސްގެ މަތިންދާބޯޓަކަށް އަމާޒުވާ ގޮތަށް އޭނާ އަރައިގެން ހުރި ބޫޓުގެ ދަށްފުށް ދިމާކޮށްފައިވާ ތަނެވެ.
ބައެއް ސަގާފަތްތަކުގައި އެފަދަ ގޮތަކަށް ބަޔަކާ ދިމާއަށް ފައިވާން ނުވަތަ އެފަދަ އެހެނިހެން ތަކެތީގެ ދަށްފުށް ދެއްކުމަކީ އެބަޔަކަށް ކުރާ މަލަމާތެއް ފަދަ ކަމެކެވެ. އެގޮތުން، އެފަދަ ކަމެއް ކުރުމުން އެބަޔަކީ ފައިވާނުގެ ދަށްފުށުގައި ހުންނަ ކިލައަށް ވުރެ ވެސް ދަށު ދަރަޖައިގެ ބައެއް ކަމުގައި އެ މީހަކު ދެކޭ ކަމަށް ވެގެންދެއެވެ.
22 އަހަރުގެ ބެލާއަކީ ދެ ގައުމަކަށް ނިސްބަތްވާ މޮޑަލެކެވެ. އޭނާގެ މަންމައަކީ އެމެރިކާ މީހަކަށް ވާއިރު އޭނާގެ ބައްޕައަކީ ފަލަސްތީނާއި އެމެރިކާއަށް ނިސްބަތްވާ މީހެކެވެ.
އޭނާ އެ ފޮޓޯ އިންސްޓަގްރާމުގައި ހިއްސާ ކުރުމުން ގިނަ ބަޔަކު ވަނީ އެކަމާ ނުރުހުން ފާޅުކޮށްފައެވެ. އެހެންކަމުން ބެލާ ވަނީ މާ ގިނައިރުތަކެއް ނުވަނީސް އެކަމަށް މާފަށް އެދި އިނގިރޭސި ބަހުންނާއި އަރަބި ބަހުން އޭނާގެ މީސް މީޑިއާ އެކައުންޓުތަކުގައި ތަފާތު ޕޯސްޓުތައް ކޮށްފައެވެ.
މާފަށް އެދުމުގެ ގޮތުން އޭނާ ވަނީ ފަހުން ޓްވީޓެއް ވެސް ކޮށްފައެވެ.
މާފަށް އެދުނު ނަމަވެސް ބެލާއާ މެދު ގިނަ ބަޔަކު ވަނީ އެ އަށް ފަހު ވެސް ނުރުހުން ފާޅުކޮށްފައެވެ. ނަމަވެސް ބައެއް މީހުން ވަނީ އެފަދަ ކަމެއް ނޭނގިގެން ކުރެވިދާނެ ކަމަށާއި އޭނާއަކީ ރަނގަޅު ހިތެއްގެ ވެރިއެއް ކަމަށް ބުނެފައެވެ.
