މިނިސްޓްރީ އޮފް ޔޫތް ސްޕޯޓްސް ކޮމިނިޓީ އެންޑް އެންޕަވަރމަންޓާއި އިންޑިއަން އެމްބަސީ ގުޅިގެން ފަސް ވަނަ ބައިނަލްއަޤްވާމީ ޔޯގާ ދުވަސް ރާއްޖޭގައި ފާހަގަކުރުމަށް ނިންމައިފިއެވެ.
އަންގާރަ ދުވަހު ޔޫތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރް ވިދާޅުވީ ބައިންލް އަގްވާމީ ޔޯގާ ދުވަސް ފާހަގަ ކުރުމުގެ ގޮތުން އަންނަ ހޮނިހިރު ދުވަހު ހެނދުނު 7:00 ގައި ހެންވޭރު ދަނޑުގައި ޔޯގާ ސެޝަންތަކެއް ކުރިއަށްގެންދިއުމަށް ހަމަޖެހިފައިވާ ކަމަށެވެ.
ރާއްޖޭގައި ޔޯގާއަށް މީހުންގެ ޝައުގުވެރިކަން އިތުރުވަމުންދާކަން ސަފީރު ވަނީ ފާހަގަ ކުރައްވާފއެވެ. އަދި ވީހާވެސް ގިނަ ފަރާތްތަކުން މިހަރަކާތުގައި ބައިވެރިވުމަށް ވަނީ އެދިވަޑައިގެންފައެވެ.
މިނިސްޓަރ އޮފް ޔޫތް ސްޕޯޓްސް ކޮމިއުނިޓީ އެމްޕަވަރމަންޓް އަހުމަދު މަހުލޫފް ވިދާޅުވީ ޔޯގާއަކީ ރާއްޖޭގައި ކުރިއަރަމުންދާ ކަސްރަތެއް ކަމަށެވެ. އަދި ބައިނަލް އަޤްވާމީ ޔޯގާ ދުވަސް ފާހަގަ ކުރަމުންދާއިރު ވީހާވެސް ގިނަ ފަރާތްތަކުން މިހަރަކާތުގައި ބައިވެރިވުމަށް މިނިސްޓަރ ވަނީ އެދިވަޑައިގެންފައެވެ.
އިންޑިއާ އެމްބަސީ އާއި ގުޅިގެން ރާއްޖޭގައި އިތުރަށް ޔޯގާ ފުޅާކުރެވޭނެ ގޮތްތަކާއި ގުޅޭގޮތުން މަޝްވަރާ ކުރަމުންދާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ޔޯގާގެ އެކިއެކި ހަރާކާތްތަކުގައި ބައިވެރިވެވިފައިވާ ކަމަށާއި، ޔޯގާގެ މުހިއްމު ކަމާއި، ޔޯގާ ހެދުމުން އުމުރުން ދުވަސްވެފައި ތިބޭ މީހުނަށްވެސް ހަށިގަނޑަށް ލިބޭ ލުއިތަކުގެ ވާހަކަ އަޑުއިވިފައިވާ ކަމަށެވެ.
މީގެ އިތުރުން ވެސް މިނިސްޓްރީ އޮފް ޔޫތް އެންޑް ސްޕޯޓްސް އިން ކުރަމުންދާ މަސައްކަތްތަކުގައި އިންޑިއާއިން ވަރަށް ބޮޑު އެހީތެރިކަމެއް ފޯރުކޮށްދެމުންދާ ކަން މިނިސްޓަރ ވަނީ ފާހަގަ ކުރައްވަފައެވެ. އިންޑިއާއިން ވެދޭ އިހީތެރިކަމުގެ ބަދަލުގައި އެގައުމުން ކަމެއް ކޮށްދޭން އެދިފައި ނުވާކަމަށް މިނިސްޓަރ ވިދާޅުވިއެވެ.
