އޭޝިއާ ކައުންޓަރ ޓެރަރިޒަމް ލީޑަރުންގެ ފޯރަމް ފަށައިފި
ފޯރަމް ކުރިއަށްދާނީ ތިން ދުވަހުގެ މުއްދަތަށް
ފޯރަމް ކުރިއަށްދާނީ ތިން ދުވަހުގެ މުއްދަތަށް
ޓެރަރިޒަމްގެ ސަބަބުން ކުރިމަތިވާ ނުރައްކާތަކާއި ދަތިތަކާ ބެހޭ ގޮތުން މަޝްވަރާ ކުރުމަށްޓަކައި ބާއްވާ، އޭޝިއާ ކައުންޓަރ ޓެރަރިޒަމް ލީޑަރުންގެ ފޯރަމް ފަށައިފިއެވެ.
ތިން ދުވަހުގެ މުއްދަތަށް ކުރިއަށްދާ މި ފޯރަމް ފަށްޓަވައިދެއްވީ، އިސްކަންދަރު ކޮށީގައި މިކަމަށްޓަކައި ބޭއްވި ހާއްސަ ރަސްމިއްޔާތެއްގައި، އޮސްޓްރޭލިއާގެ ފެޑެރަލް ޕޮލިސް ކޮމާންޑާ ގްލެން މެކްއެވަން އެވެ.
މި ފޯރަމް ކުރިއަށް ދާނީ ޖޫން 17 އިން 19 ގެ ނިޔަލަށެވެ. އަދި މި ފޯރަމުގައި ރާއްޖޭގެ އިތުރުން ސްރީލަންކާ، ބަންގްލަދޭޝް، ތައިލެންޑް، މިޔަންމާ، އަފްޣާނިސްތާން އަދި އޮސްޓްރޭލިއާގެ ފަރާތުން އޮފިޝަލުން ބައިވެރިވެވަޑައިގަންނަވައެވެ.
ފޯރަމް ފެށުމުގެ ރަސްމިއްޔާތުގައި ވާހަކަ ދައްކަވަމުން އޮސްޓްރޭލިއާ ފުލުހުންގެ ކޮމާންޑަރ ވިދާޅުވީ، މިހާރު ޓެރަރިޒަމަކީ ވަރަށް ފުޅާވެފައިވާ ކަމެއް ކަމަށާއި އެފަދަ ހަމަލާތައް ދޭނީ ކޮން އިރަކު ކަމެއް ވެސް އެނގެން ނޯންނަ ކަމަށެވެ.
ސީރިއާއަށާއި އީރާގަށް ހަނގުރާމައަށް ދާ މީހުންގެ ވާހަކަ ދައްކަމުން ގްލެން ވިދާޅުވީ، އޮސްޓްރޭލިއާ އިން، 2012 އިން ފެށިގެން ގާތްގަނޑަކަށް 230 މީހުން އެ ގައުމުތަކަށް ހަނގުރާމައަށް ގޮސްފައިވާ ކަމަށެވެ. އަދި އޭގެ ތެރެއިން ގާތްގަނޑަކަށް 40 މީހުން އަނބުރާ އޮސްޓްރޭލިއާ އަށް ދާން ބޭނުންވާ ކަމަށް ވެސް އޭނާ ވިދާޅުވިއެވެ.
މީގެ އިތުރުން، ގްލެން ވިދާޅުވީ ދުނިޔޭގެ އެހެން ގައުމުތަކެކޭ އެއްވަރަށް ރާއްޖެއިން ވެސް ޓެރަރިޒަމާ ދެކޮޅަށް އަޑުއުފުލާ ކަމަށް އޭނާ ދެކޭ ކަމަށެވެ.
ފޯރަމް ފަށްޓަވައި ދެއްވުމުގެ ރަސްމިއްޔާތުގައި ވާހަކަ ދައްކަވަމުން ރާއްޖޭގެ ޕޮލިސް ކޮމިޝަނަރ މުހައްމަދު ހަމީދު ވިދާޅުވީ، ޓެރަރިޒަމާ ދެކޮޅަށް މަސައްކަތް ކުރުމަކީ ވޭތުވެ ދިޔަ 15 އަހަރުގެ ތެރޭގައި ވެސް، ފުލުހުން އެކަމަށް ބޮޑު އަހައްމިޔަތުކަމެއް ދީފައިވާ ކަމެއް ކަމަށެވެ. ރާއްޖޭއިން ވެސް ގިނަ ބަޔަކު ވަނީ، ހައްދުފަހަނައަޅާފައިވާ ޖަމާއަތްތަކާ އެކު ހަނގުރާމަ ކުރުމަށް ސީރިއާ ފަދަ ގައުމުތަކަށް ހަނގުރާމައަށް ގޮސްފައިވާކަން އޭނާ ވަނީ ފާހަގަކުރައްވާފައެވެ.
މީގެ އިތުރުން، ކޮމިޝަނަރ ހަމީދު ވިދާޅުވީ، މި ފޯރަމުގެ މަގުސަދަކަށްވަނީ، ފޯރަމުގައި ބައިވެރިވާ ގައުމުތަކުގެ ގާނޫނު ތަންފީޒު ކުރާ މުއައްސަސާތަކުގެ މެދުގައި ތަހުގީގުތައް ހިންގުމާއި ކައުންޓަރ ޓެރަރިޒަމްގެ ކަންކަމުގައި ކޯޑިނޭޝަން އިތުރަށް ހަރުދަނާ ކުރުން ކަމަށެވެ.
