ދެމެހެއްޓެނިވި ތަރައްޤީ ގެނައުމަށް ރާއްޖެއަށް އެއްބާރުލުން ދޭނެކަމުގެ ޔަޤީންކަން ޔޫއެންޑީޕީން ދީފި

މޫސުމަށް އަންނަ ބަދަލުތަކުން ކުރާ އަސަރު ކުޑަކުރުމަށާއި ދެމެހެއްޓެނިވި ތަރައްޤީ ހާސިލްކުރުމަށް ދިވެހި ސަރުކާރުން ކުރާ މަސައްކަތްތަކަށް ފުރިހަމަ އެއްބާރުން ދެއްވާނެ ކަމަށް އދ. ގެ އެސިސްޓެންޓް ސެކްރެޓަރީ ޖެނެރަލް ހައުލިއަންގް ޝޫ ވިދާޅުވެއްޖެއެވެ.

ޔޫއެންޑީޕީގެ އޭޝިއާ އަދި ޕެސިފިކް ސަރަހައްދުގެ ރީޖަނަލް ޑިރެކްޓަރކަން ވެސް ކުރައްވާ ޝޫ އެހެން ވިދާޅުވީ، ރ. މަޑުއްވަރީގައި ދިވެހި ސަރުކާރާއި ޔޫއެންޑީޕީ ގުޅިގެން ކުރިޔަށް ގެންދާ ސާފު ބޯފެން ފޯރުކޮށްދިނުމުގެ ޕްރޮގްރާމް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އެގޮތުން ދެމެހެއްޓެނިވި ތަރައްޤީ ހާސިލްކުރުމަށް ދިވެހި ސަރުކާރުން ކުރާ މަސައްކަތްތަކަށް ފުރިހަމަ އެއްބާރުން ދިނުމަށް ޔޫއެންޑީޕީން ތައްޔާރަށް އޮތް ކަމަށާއި، އެ ޖަމާއަތުން ފޯރުކޮށްދޭ އެހީތެރިކަމުގެ ސަބަބުން މޫސުމަށް އަންނަ ބަދަލުތަކުން ލިބޭ ގެއްލުން ކުޑަކުރުމަށް ދިވެހި ސަރުކާރުން ކުރާ މަސައްކަތްތަކަށް އިތުރު ބާރެއް ލިބިގެންދާނެ ކަމަށް އޭނާ ވިދާޅުވިއެވެ.

ދިވެހި ރާއްޖޭގެ ސަރުކާރާއި ޔޫއެންޑީޕީއާ ގުޅިގެން ކުރިޔަށް ގެންދާ މި މަޝްރޫއުގެ ތެރެއިން ރާއްޖޭގެ އެކި ސަރަހައްދުތަކުގައި ހަތަރު ޑިސެލިނޭޝަން ޕްލާންޓެއް ގާއިމްކުރުމަށް ހަމަޖެހިފައިވާއިރު، ވާރޭ ފެން ރައްކާކުރާނެ ބޮޑެތި ތާންގީތަކެއް ބެހެއްޓުމަށާއި ބިމުން ފެން ނެގޭނެ ހަރުދަނާ ނިޒާމުތަކެއް ގާއިމްކުރުމަށް ވަނީ ހަމަޖެހިފައެވެ. އެގޮތުން މި ނިޒާމު ގާއިމްކުރުމުން 49 ރަށަކަށް ދަތިކަމެއް ނެތި މުޅި އަހަރު ފެން ފޯރުކޮށްދެވޭނެ ވިއުގައެއް އުފެދިގެން ދާނެ ކަމަށް ރާއްޖޭގެ އެކި ސަރަހައްދުތަކުގައި އިން މައުލޫމާތުދެއެވެ.

މޫސުމަށް އަންނަ ބަދަލުތަކާ ގުޅިގެން ވާރޭ ވެހޭ މިންވަރު ބަދަލުވެ ސާފު ބޯފެން ލިބުމުގެ ދަތިކަން ރާއްޖޭގެ އެތައް ރަށަކަށް ކޮންމެ އަހަރަކު ވެސް ފޯރާއިރު، ފެން ރައްކާކުރެވޭނެ ހަރުދަނާ ނިޒާމުތަކެއް ރަށްރަށުގައި ގާއިމްކުރެވިފައި ނެތުމުންނާއި އަދި ބިމުން ނެގޭ ފެން ތަގައްޔަރު ވުމުގެ ސަބަބުން ރަށްރަށުން ސާފު ފެން ލިބުން ވަރަށް ބޮޑަށް ދަތިވެފައިވާކަމުގެ ޝަކުވާ ވަރަށް ގިނަ ބަޔަކު ކުރެއެވެ.