މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ އަހަރީ އާންމު ޖަލްސާ ފަސްކޮށްފިއެވެ.

އެ ކުންފުނިން ކުރިން ޖަލްސާ ބޭއްވުމަށް ނިންމާފައިވަނީ ޖޫން މަހުގެ 15 ވަނަ ދުވަހުއެވެ. އެހެންނަމަވެސް އެމްޓީސީސީން ބުނީ ދިމާވީ ކުއްލި ކަމަކާއި ގުޅިގެން ޖަލްސާ ފަސް ކުރަން ޖެހިފައިވާ ކަމަށް އަހަރީ އާންމު ޖަލްސާ އޮންނާނެ ދުވަހެއް ފަހުން އިއުލާން ކުރެވިގެންދާނެ ކަމަށެވެ.

2018 ވަނަ އަހަރުގެ ތިން ވަނަ ކުއާޓަރގައި އެމްޓީސީސީގެ ސާފު ފައިދާ ވަނީ ދަށަށް ގޮސްފައެވެ.

އެމްޓީސީސީގެން އާންމުކޮށްފައިވާ ތިން ވަނަ ކުއާޓާގެ މާލީ ތަފާސްހިސާބުތަކުން ދައްކާ ގޮތުގައި އެކުންފުންޏަށް ސާފު ފައިދާގެ ގޮތުގައި ލިބިފައިވަނީ 327،963ރ. އެވެ. 2017 ވަނަ އަހަރުގެ ތިން ވަނަ ކުއާޓާގައި ސާފު ފައިދާގެ ގޮތުގައި އެ ކުންފުންޏަށް ވަނީ 17.4 މިލިއަން ރުފިޔާ ލިބިފައެވެ. އެހެންކަމުން އެ އަހަރުގެ އެ މުއްދަތާ އަޅާބަލާއިރު 17 މިލިއަން ރުފިޔާގެ ފަރަގެއް އުޅެއެވެ. 2018 ވަނަ އަހަރުގެ ދެވަނަ ކުއާޓާގައި ސާފު ފައިދާގެ ގޮތުގައި 13 މިލިއަން ލިބިފައިވެއެވެ.

އެމްޓީސީސީގެ ތިން ވަނަ ކުއާޓާގައި ކުންފުންޏަށް އާމްދަނީގެ ގޮތުގައި 308 މިލިއަން ރުފިޔާ ލިބިފައިވާ އިރު 2017 ވަނަ އަހަރުގެ އެ މުއްދަތުގައި ލިބިފައި ވަނީ 264 މިލިއަން ރުފިޔާއެވެ. 2018 ވަނަ އަހަރުގެ ތިން ވަނަ ކުއާޓާގެ އާމްދަނީ އިތުރުވި ނަމަވެސް ކުންފުނީގެ ހަރަދު ވަނީ ވަރަށް ބޮޑަށް އިތުރުވެފައެވެ. އެގޮތުން 2017 އަހަރުގެ ތިން ވަނަ ކުއާޓާއާ އަޅާ ބަލާ އިރު ކުންފުނީގެ "ކޯސްޓް އޮފް ސޭލް" ވަނީ 55 މިލިއަން ރުފިޔާ އިތުރުވެފައެވެ.

މީގެ އިތުރުން ތިން ވަނަ ކުއަޓާގައި ފައިނޭންސް ކޮސްޓްގެ ގޮތުގައި 11 މިލިއަން ހޭދަކޮށްފައިވާއިރު ކުންފުނީގެ އިދާރީ ހިންގުމުގެ ހަރަދުގެ ގޮތުގައި 35 މިލިއަން ރުފިޔާ ހަރަދުކޮށްފައިވެއެވެ.