ޔޫތް ލީޑާރސް ނެޓްވޯކް ފޯރަމް ފަށައިފި

މިއަހަރުގެ ދެވަނަ ޔޫތް ލީޑާރސް ނެޓްވޯކް ފޯރަމް ފަށައިފިއެވެ.

ފޯރަމް ފެށުމަށް ހުޅުމާލޭ ހުރަވީ ސްކޫލްގައި ބޭއްވި ރަސްމިއްޔާތު ޝަރަފްވެރިކޮށްދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ.

Advertisement

މިފަހަރުގެ ފޯރަމްގައި ކޮލެޖް ޔުނިވަރސިޓީތަކުން 150 ދަރިވަރުން ބައިވެރިވާނެއެވެ. ފޯރަމްގެ ސެޝަންތައް ކުރިއަށްގެންދާނީ ހުކުރު އަދި ހޮނިހިރު ދުވަހުއެވެ.

މިފަހަރުގެ ފޯރަމް އަމާޒުކޮށްފައިވަނީ "ތަހައްމަލުކުރުމުގެ ޘަޤާފަތް - މުޖުތަމަޢުގެ ހަމަޖެހުން" މިޝިޢާރުގެ މައްޗަށެވެ. ޝިއާރާ ގުޅުންހުރި ތަފާތު ހަ ދާއިރާއަކުން ތަޖުރިބާ ލިބިވަޑައިގެންތިއްބެވި ބޭފުޅުން މައުލޫމާތު ހިއްސާކޮށް، މަޝްވަރާކުރާނެއެވެ.

ފޯރަމް ފެށުމުގެ ރަސްމިއްޔާތު ޝަރަފްވެރިކޮށްދެއްވާ ވާހަކަފުޅުދައްކަވަމުން ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވީ މިފަދަ ފޯރަމްތަކުގެ ނަތީޖާއަކަށް ވެގެންދާނީ މުޖުތަމައުގެ އެކި ދާއިރާތަކުގައި މަސައްކަތްކުރުމުގެ އިތުރު ފުރުސަތުތަކެއް ޒުވާނުންނަށް ލިބިގެންދިއުންކަމަށެވެ.

އެމަނިކުފާން ވިދާޅުވީ ތަހައްމުލުކުރުމުގެ ހިތްވަރާއި، ކެތްތެރިވުމުގެ ހިތްވަރު ޒުވާނުންގެ ކިބައިގައި ހުންނާނެކަމަށެވެ. ދިމާވާ އެކި ކަންކަމާ ކުރިމަތިލުމުގެ ހިތްވަރުވެސް ހުންނަންވާނެކަމަށް އެމަނިކުފާން ވިދާޅުވިއެވެ. ސަރުކާރުން ވެސް އަދި ރައީސުލްޖުމްހޫރިއްޔާ ވެސް އެންމެބޮޑު ސަމާލުކަމެއްދެނީ ޒުވާނުންނަށް ކަމަށާއި، ޚާއްސަކޮށް ތައުލީމަށްކަމަށް ނައިބް ފައިސަލް ވިދާޅުވިއެވެ. ފުރުސަތު ލިބިފައި އޮންނަ ވަގުތު އެފުރުސަތުގެ ބޭނުން ހިފަން ޖެހޭކަމަށާއި، ޒުވާންކަމަކީވެސް އަބަދު އޮންނާނެކަމެއް ނޫންކަން ޤަބޫލުކުރަންޖެހޭކަމަށްވެސް އެމަނިކުފާން ވިދާޅުވިއެވެ.

މިރަސްމިއްޔާތުގައި ވާހަކަފުޅުދައްކަވަމުން ހޯމް މިނިސްޓަރު އިމްރާން އަބްދުﷲ ވިދާޅުވީ ހޯމް މިނިސްޓްރީގެ އެންމެ މުހިންމު އެއް ޒިންމާއަކީ ސުލުހަވެރި، އަމާން، ރައްކާތެރި ވެއްޓެއް ރައްޔިތުންނަށް ކަށަވަރުކޮށްދިނުމަށް މަސައްކަތްކުރުންކަމަށެވެ. މިނިސްޓަރު ވިދާޅުވީ މިއީ ބިޔަ ބޮޑު ބުރަ ޒިންމާއެއްކަމަށެވެ.

މިޒިންމާ އަދާކުރުމަށް ހޯމް މިނިސްޓްރީން ކުރާ މަސައްކަތްތަކުގެ ތެރެއިން އެއް މަސައްކަތަކީ ޒިންމާދާރު ރައްޔިތެއް ބިނާކުރުމަށް ރާއްޖޭގެ އެކިކަންކޮޅުތަކުގައި ތަފާތު ފަންތީގެ ތަފާތު ގިންތީގެ އޯޑިއަންސްތަކަށް އަމާޒުކޮށްގެން ބާއްވާ ފޯރަމްތަކާއި، ވޯކްޝޮޕް ފަދަ ޕްރޮގްރާމްތައްކަމަށް މިނިސްޓަރު ވިދާޅުވިއެވެ.

ފޯރަމްގައި މައުލޫމާތު ހިއްސާކުރާ ދާއިރާތަކަކީ ޓޮލަރަންސް އަދި ޚިޔާލުފާޅުކުރުމުގެ މިނިވަންކަމާއި، ހެރިޓޭޖް އެންޑް ޓޮލަރަންސާއި، ލީޑަރޝިޕާއި ޓޮލަރަންސާއި، އިސްލާމް އަދި ޓޮލަރަންސާއި، ޕީސް އެންޑް ޓޮލަރަންސާއި، ޕޮލިޓިކަލް ޓޮލަރަންސެވެ.

އިސްލާމް އަދި ޓޮލަރަންސް ސެޝަން ކުރިއަށްގެންގޮސްދެއްވާނީ މިނިސްޓަރު އިމްރާންއެވެ.

ޔޫތް ލީޑާރސް ނެޓްވޯކަކީ ޒިންމާދާރު ރައްޔިތުން ބިނާކޮށް ޤައުމީ ރޫހާއި އެއްބައިވަންތަކަން ދިރުވަން ޔުނިވަރސިޓީ އަދި ކޮލެޖް ދަރިވަރުން އެކުލެވޭ ގޮތަށް އުފައްދާފައިވާ ކައުންސިލެކެވެ. އެކައުންސިލް އެކުލަވާލެވި މަސައްކަތްކުރަމުންދާނީ ހޯމް މިނިސްޓްރީގެ ބެލުމުގެ ދަށުންކަމަށް 2014 ވަނަ އަހަރުގެ ނޮވެމްބަރު މަހުގެ 5 ވަނަ ދުވަހު ސޯޝަލް ކައުންސިލްގެ ބައްދަލުވުމުގައި މަޝްވަރާކޮށް ވަނީ ނިންމަވާފައެވެ.

ޔޫތް ލީޑާރސް ނެޓްވޯކުން ވަނީ މިހާތަނަށް އައްޑު އަތޮޅާއި، ފުވައްމުލަކާއި، ހދ. ކުޅުދުއްފުއްޓާއި، ލ. ގަމާއި، ދ. ކުޑަހުވަދޫއާއި، ގއ. ވިލިނގިލީގެ އިތުރުން ހޯރަފުށީގައިވެސް ފޯރަމް ކުރިއަށްގެންގޮސްފައެވެ. މިއަހަރުގެ ފުރަތަމަ ފޯރަމް ފެބްރުއަރީ މަހު ބޭއްވީ ހޯރަފުށީގައެވެ.