ކޯޓުތަކާއި ފަނޑިޔާރުންގެ މައްސަލަތައް ފިޔަވައި، ޝަރުއީ އެހެން ކަންކަން ބެލުމުގެ ބާރު ޖުޑިޝަރީ ކޮމިޓީއަށް
10 ޖޫން 2019 | ހޯމަ 19:47ކޮމިޓީތަކުގެ މަސްއޫލިއްޔަތުގެ ދާއިރާގެ ތެރޭގައި ހިމެނޭ މުއައްސަސާގެ މެމްބަރުންނާއި ސުވާލުކޮށް ޖަވާބުދާރީ ކުރުވުން ހިމެނޭ
އުއްތަމަ ފަނޑިޔާރާއި، ރައީސް އިބްރާހިމް މުހައްމަދު ސޯލިހް
ކޯޓުތަކާއި ފަނޑިޔާރުންގެ މައްސަލަތައް ފިޔަވައި، ޝަރުއީ ދާއިރާއާ ގުޅުން ހުރި އެހެނިހެން ކަންކަން ބެލުމުގެ ބާރު ރައްޔިތުންގެ މަޖިލިހުގެ ޖުޑިޝަރީ ކޮމިޓީއަށް ދިނުމަށް ވަގުތީ ކޮމިޓީން ނިންމައިފިއެވެ.
ނަވާރަ ވަނަ ރައްޔިތުންގެ މަޖިލީހުގައި ދާއިމީ، އާ ފަސް ކޮމިޓީ އެކުލަވާލަން ވަނީ ނިންމާފައެވެ. އޭގެ ތެރޭގައި ކޯޓުތަކަށް ޚާއްސަ، ޖުޑީޝަރީ ކޮމިޓީއެއް ވެސް ވަނީ އުފައްދާފައެވެ. މީގެކުރިން ޖުޑީޝަރީ އާއި ބެހޭ ކަންތައްތައް ބަލަމުން އައީ މިނިވަން މުއައްސަސާތަކުގެ ކޮމިޓީންނެވެ.
ކޮމިޓީތަކުގެ މަސްއޫލިއްޔަތުތައް ކަނޑައެޅުމަށް ވަގުތީ ގަވައިދު ކޮމިޓީން ހޯމަ ދުވަހު ބޭއްވި ބައްދަލުވުމުގައި ޖުޑީޝަރީ ކޮމިޓީގެ މަސްއޫލިއްޔަތުތައް ވަނީ ހާމަކޮށްފައެވެ. އެގޮތުން ޖުޑިޝަލް ސާވިސް ކޮމިޝަން (ޖޭއެސްސީ) އާއި ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އާއި ޕްރޮސެކިއުޓާ ޖެނެރަލް (ޕީޖީ) އޮފީހާއި އެޓާނީ ޖެނެރަލް (އޭޖީ) އޮފީހާއި، ވަޒީފާއާ ބެހޭ ޓްރައިބިއުނަލް އާއި މޯލްޑިވްސް އާބިޓްރޭޝަން ސެންޓަރުގެ ކަންކަން ބެލުން ކޮމިޓީގެ މަސްއޫލިއްޔަތު އެ ކޮމެޓީގައި ހިމަނާފައިވެ އެވެ. އަދި މި ނޫން ވެސް ޝަރުއީ ދާއިރާއާ ގުޅޭ ކަންކަން އެކޮމިޓީގެ މަސްއޫލިއްޔަތުތަކުގެ ތެރޭގައި ވަނީ ހިމަނާފައެވެ.
އެ ކޮމިޓީގެ މަސްއޫލިއްޔަތުތަކުގެ ތެރޭގައި ވަނީ ކޮމިޓީތަކުގެ މަސްއޫލިއްޔަތުގެ ދާއިރާގެ ތެރޭގައި ހިމެނޭ މުއައްސަސާގެ މެމްބަރުންނާއި ސުވާލުކޮށް ޖަވާބުދާރީ ކުރުވުމާއި އަހަރީ ރިޕޯޓު ހުށަހަޅާތޯ ބެލުމާއި ކޮމިޓީ އަށް ހުށަހަޅާ މައްސަލަތައް ދިރާސާކޮށް އެޅިދާނެ ފިޔަވަޅުތަކާ ގުޅޭ ގޮތުން ލަފާ ދިނުން ހިމެނެއެވެ.
ޝަރުއީ ދާއިރާއާ ގުޅުން ހުރި ބިލުތައް ދިރާސާކޮށް ފުރިހަމަ ކުރުމަށް މަޖިލީހަށް ރިއާޔަތް ކޮށްދިނުމާއި މުއައްސަސާތަކަށް އައްޔަން ކުރުމަށް މަޖިލިހުން ރުހުން ދީފައިވާ ބޭފުޅުންގެ ތެރެއިން މަގާމުން ވަކިކުރަން ޖެހޭ ބޭފުޅަކާ ގުޅޭ ގޮތުން މަޖިލިހަށް ލަފާ ދިނުން ވެސް ޖުޑީޝަރީ ކޮމިޓީގެ މަސްއޫލިއްޔަތު ތެރޭގައި ވަނީ ހިމަނާފައެވެ.
ހޯމަ ދުވަހު ބޭއްވި ވަގުތީ ކޮމިޓީގައި ވަނީ ލާމަރުކަޒީ ކޮމިޓީގެ އުސޫލުތައް ވެސް ކަނޑައަޅާފައެވެ. ލާމަރުކަޒީ ކޮމިޓީ އަކީ ވެސް މަޖިލީހުގައި އަލަށް އުފެއްދި ކޮމިޓީއެކެވެ.
ލާމަރުކަޒީ ކޮމިޓީގެ މަސްއޫލިއްޔަތުތަކުގެ އުސޫލުތަކުގެ ތެރޭގައި ހިމެނޭ މުއައްސަސާތަކަކީ ލޯކަލް ގަވަރމަންޓް އޮތޯރިޓީ އާއި ސިޓީ ކައުންސިލްތަކާއި އަތޮޅު ކައުންސިލްތަކާއި، ރަށު ކައުންސިލް ތަކެވެ. އެކޮމިޓީގެ މަސްއޫލިއްޔަތު ތަކުގެ ތެރޭގައި އެލްޖީއޭއަށް އައްޔަން ކުރެވޭ ފަރާތްތަކާއި އެކޮމިޓީއިން އިންޓަވިއު ކުރުމާއި ލާމަރުކަޒީ އުސޫލުން ކަންކަން ހިންގުމަށް އިންތިޚާބު ކުރެވޭ ކައުންސިލްތަކުގެ މަސްއޫލިއްޔަތައް ވަނީ ހިމަނާފައެވެ.
މީގެ އިތުރުން މަޖިލީހުން އަލަށް ހެދި ހިއުމަން ރައިޓްސް އެންޑް ޖެންޑަ ކޮމިޓީ އާއި އެންވަޔަރަމަންޓް އެންޑް ކްލައިމެޓް ޗޭންޖް ކޮމިޓީ އާއި ސްޓޭޓް އޯން އެންޓަޕްރައިސަސް ކޮމިޓީގެ އުސޫލު ހިމެނޭ ގޮތަށް 16 ކޮމިޓީގެ މަސްއޫލިއްޔަތުތައް ވަގުތީ ގަވައިދު ކޮމިޓީއިން ވަނީ ނިންމާފައެވެ.
ވަގުތީ ކޮމިޓީން 16 ކޮމިޓީތަކުގެ މަސްއޫލިއްޔަތުތައް ކަނޑައެޅި ނަމަވެސް އަދި މަޖިލީހުގެ ތަޅުމުން އެ ކަމާއި މެދު ގޮތެއް ކަނޑައަޅާނެއެވެ. އެނގިފައިވާ ގޮތުގައި އަންގާރަ ދުވަހު ބާއްވާ މަޖިލީހުގެ ޖަލްސާގައި ކޮމިޓީ އިން ނިންމި ނިންމުމަށް ވޯޓަށް އަހާނެއެވެ.
